ފައުޗީއަކީ "ގަމާރެއްގެ" ގޮތުގައި ޓްރަމްޕް ސިފަ ކުރައްވައިފި

ވޮޝިންޓަން (އޮކްޓޯބަރު 19) - އެތައް ބައެއްގެ ލޯތްބާއި އިހްތިރާމް ހޯއްދަވާފައިވާ އެމެރިކާ ސަރުކާރު އެންމެ އިސް އެއް ސައެންސްވެރިޔާ އެންތަނީ ފައުޗީ އަކީ "ގަމާރު" ބޭފުޅެއްގެ ގޮތުގައި ރައީސް ޑޮނަލްޑް ޓްރަމްޕް ސިފަ ކުރައްވައިފި އެވެ.

ވައިޓް ހައުސްގެ ކޮރޯނާވައިރަސް ޓާސްކް ފޯހުގެ އިސް މެންބަރު ފައުޗީ އަކީ ކޮރޯނާވައިރަހާ ގުޅިގެން ޓްރަމްޕުގެ ފާޑުކިޔުން އެންމެ ބޮޑަށް އަމާޒުވާ އެއްބޭފުޅާ އެވެ.

"ކޮވިޑްއާ ހެދި މީހުން ވަރުބަލިވެއްޖެ. މީހުން މިހާރު ބުނަން ފަށައިފި ހުރިހާ ކަމެއް ވެސް އެ މީހުންނަށް ދޫކޮށްލުމަށް. ފައުޗީ އާއި މި ހުރިހާ ގަމާރުންގެ ވާހަކަތައް އަޑު އަހަން މީހުން މިހާރު ފޫހިވެއްޖެ،" ކެމްޕޭން ޓީމަށް ކުރެއްވި ފޯން ކޯލެއްގައި ޓްރަމްޕް ވިދާޅުވި އެވެ.

އުމުރުން 79 އަހަރުގެ ފައުޗީ އަށް އިޝާރާތް ކުރައްވައި ޓްރަމްޕް ވިދާޅުވީ "އޭނާ މިތާނގައި އުޅޭތާ 500 އަހަރު ވެއްޖެ" ކަމަށެވެ.

އެމެރިކާގެ ނޭޝަނަލް އިންސްޓްޓިއުޓް އޮފް އެލާޖީސް އެންޑް އިންފެކްޝަސް ޑިޒީޒްގެ އެންމެ އިސްވެރިޔާގެ ގޮތުން ފައުޗީ ކުރައްވަމުން ގެންދަވާ މަސައްކަތް މުޅި ދުނިޔެ ބަލައިގަނެ އެވެ.

"ފައުޗީގެ ބަސް އަހައިގެން ކަންތައްކޮށްފި ނަމަ، އެމެރިކާއިން މިހާރު ހަތް ލައްކަ ނޫނީ އަށް ލައްކަ މީހުން މަރުވެއްޖައީސް،" ޓްރަމްޕް ވިދާޅުވި އެވެ.

ޓްރަމްޕުގެ މި ފާޑުކިޔުން އައިސްފައި ވަނީ ކޮރޯނާވައިރަހާ ގުޅޭ ގޮތުން ފައުޗީ ދެއްކެވި ވާހަކަތަކުގެ ބައެއް އެޑިޓްކޮށްގެން ޓްރަމްޕުގެ ކެމްޕޭނުން ހެދި ވީޑިއޯ އިޝްތިހާރަށް ފައުޗީ ނުރުހުން ފާޅުކޮށްފައި ވަނިކޮށެވެ.

"އަޅުގަނޑުގެ 50 އަހަރުގެ ސަރުކާރުގެ ޚިދުމަތުގައި މިހާތަނަށް ފާޅުގައި އަޅުގަނޑު ނުވާނެ އެއްވެސް ކެންޑިޑޭޓަކަށް ތާއީދުކޮށްފައެއް،" ފައުޗީ ނެރުއްވި ބަޔާނުގައި ބުނެފައިވެ އެވެ.