އިންޓަނެޓު ބޭންކިން މެދުވެރިކޮށް ކާޑުގެ ޕިން ބަދަލު ކުރެވޭ ގޮތް ހަދައިފި

އިންޓަނެޓް ބޭންކިން މެދުވެރިކޮށް، ކްރެޑިޓު ކާޑާއި ޑެބިޓް އަދި ޕްރިޕެއިޑް ކާޑުތަކުގެ ޕިން ބަދަލު ކުރެވޭގޮތް ބޭންކް އޮފް މޯލްޑިވްސް (ބީއެމްއެލް) އިން މިއަދު ހަދައިފި އެވެ.

ބީއެމްއެލުން ބުނީ، މިއި އެ ބޭންކުން ދޭ ހިދުމަތުގެ ފެންވަރު އިތުރަށް ރަނގަޅު ކުރުމަށް، ހިދުމަތްތައް ޑިޖިޓަލައިޒް ކުރުމުގެ ސްޓްރެޓެޖީގެ ދަށުން ތައާރަފު ކުރި ހިދުމަތެއް ކަމަށެވެ.

މި ހިދުމަތާއެކު، ކާޑުގެ ޕިން ހޯދަން ނުވަތަ ޕިން ބަދަލު ކުރުމަށް މިހާރު ބޭންކަށް ދާކަށް ނުޖެހޭނެ އެވެ. ބޭރު ގައުުމުތަކުގައި ދިރިއުޅޭ މީހުން ވެސް ޕޯސްޓް މެދުވެެރިކޮށް ޕިން ލިބެންދެން މަޑުކުރަން ނުޖެހޭނެ ކަމަށް ބޭންކުން ބުންޏެވެ.

ބީއެމްއެލްގެ ސީއީއޯ އަދި މެނޭޖިން ޑިރެކްޓަރު ޓިމް ސޯޔާ ވިދާޅުވީ ޑިޖިޓަލް ޕިންގެ ހިދުމަތާއެކު ކަރުދާހުގައި ދޫކުރަމުން އަންނަ ޕިން ލިބެން ނަގާ ވަގުތު ސަލާމަތްވެ، ކަސްޓަމަރުންނަށް ހިދުމަތް ހޯދުން އިތުރަށް ފަސޭހަވާނެ ކަމަށެވެ.

"މިއީ ހިދުމަތްތައް ޑިޖިޓަލައިޒް ކުރުމުގެ މަގު ޗާޓާ އެއްގޮތް ވާ ގޮތުގެ މަތިން ތައާރަފު ކުރެވުނު ހިދުމަތެއް. ބޭންކުން މިހާރު މިވަނީ ވަރަށް ގިނަ ހިދުމަތްތަކެއް އޮންލައިން ކޮށްފައި. މީގެ ތެރޭގައި އިންޓަނެޓް ބޭންކިން އަށް ރަޖިސްޓްރީ ވުމާއި ބޭންކުން އަލަށް ތައާރަފްކުރި އޮންލައިން ކިއުގެ ހިދުމަތް ވެސް ފާހަގަކޮށްލަން،" ޓިމް ވިދާޅުވި އެވެ.