ނައިބު ރައީސްކަމުން ޖަމީލް ވަކިކުރި މައްސަލާގެ ޝަރީއަތް ސުޕްރީމް ކޯޓުން ފަށަނީ

ކުރީގެ ނައިބު ރައީސް މުހައްމަދު ޖަމީލް އަހުމަދު އެ މަގާމުން ވަކިކުރި މައްސަލާގެ ޝަރީއަތް މި މަހު ފަށަން ސުޕްރީމް ކޯޓުން ހަމަޖައްސައިފި އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ނައިބު ރައީސަކަށް ޖަމީލް ހުންނަވަނިކޮށް ރައްޔިތުންގެ މަޖިލީހުން އޭނާގެ އިތުބާރު ނެތްކަމުގެ ވޯޓެއް ނަގައި މަގާމުން ދުރުކުރީ އޭރުގެ އިދިކޮޅު ފަރާތްތަކާ އޭނާ ގުޅިވަޑައިގެން އުޅުއްވި ކަމަށް ތުހުމަތުކޮށެވެ. އޭރުގެ އިދިކޮޅު ފަރާތްތަކުން މެއި، 2015 ގައި ބޭއްވި ބޮޑު މުޒާހަރާއާ ވެސް ޖަމީލާ ގުޅުވައި، ތުހުމަތުތަކެއް އޭރުކުރި އެވެ.

ޖަމީލް މަގާމުން ވަކިކުރީ ގާނޫނު އަސާސީއާ ޚިލާފަށް ކަމަށް ބުނެ ދައުލަތާ ދެކޮޅަށް ދުސްތޫރީ މައްސަލައެއް އޭނާގެ ފަރާތުން ހުށަހެޅުއްވީ މިދިޔަ އަހަރު އެވެ.

އެ މައްސަލާގެ ފުރަތަމަ އަޑުއެހުން މިމަހުގެ 19 ވަނަ ދުވަހު ބާއްވަން ހަމަޖައްސާފައިވާއިރު އެ މައްސަލަ ބައްލަވަނީ އުއްތަމަ ފަނޑިޔާރު އަހުމަދު މުއުތަސިމް އަދުނާން ހިމެނިވަޑައިގަންނަވާ ގޮތަށް ސުޕްރީމް ކޯޓުގެ ފަސް ފަނޑިޔާރުންގެ ބެންޗަކުންނެވެ.

ޖަމީލް ނައިބު ރައީސް ކަމުން ވަކި ކުރެއްވުމުގެ މަސައްކަތް އޭރުގެ ޕީޕީއެމްގެ މެމްބަރުން ކުރިއަށް ގެންދަނިކޮށް އޭނާ ބޭސްފަރުވާއަށް ރާއްޖެއިން ބޭރަށް ވަޑައިގަތުމަށް ފަހު އިނގިރޭސިވިލާތުގައި މަޑުކުރެއްވި އެވެ. ޖަމީލް ވަކި ކުރެއްވުމަށް ފަހު ނައިބު ރައީސް ކަމަށް އައްޔަން ކުރެއްވީ އަހުމަދު އަދީބެވެ. އެކަމަކު ރިޔާސީ ލޯންޗްކޮޅުގައި އެއްޗެއް ގޮއްވާލި ހާދިސާއަށް ފަހު އޭނާ ހައްޔަރު ކުރުމުން އެ މަގާމުން އޭނާ ވެސް ދުރުކުރި އެވެ. ޔާމީންގެ ވެރިކަމުގައި އެންމެ ފަހުން ނައިބު ރައީސަކަށް ހުުންނެވީ އަބްދުﷲ ޖިހާދެވެ.