ފަސޭހަ އިން ރެސިޑެންޓް ވިސާ ދޭ ގޮތަށް ހެދީ ނުބައި ނިޔަތެއްގައި: ޝިޔާމް

ރާއްޖޭގައި 250،000 ޑޮލަރު (3.8 މިލިއަން ރުފިޔާ) އިންވެސްޓްކުރާ ބިދޭސީންނަށް ރެސިޑެންޓް ވިސާ ލިބޭ ގޮތަށް އިމިގްރޭޝަން ގާނޫނު އިސްލާހުކުރީ ނުބައި ނިޔަތެއްގައި ކަމަށް ވިދާޅުވެ ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެމްބަރު އަހްމަދު ޝިޔާމް މިއަދު ފާޑުވިދާޅުވެއްޖެ އެވެ.

އިމިގްރޭޝަން ގާނޫނަށް ސަރުކާރުން ހުށަހެޅި އިސްލާހު ކޮމިޓީން ދިރާސާކޮށް އެކުލަވައިލި ރިޕޯޓްގައިވާ ގޮތުން ކޯޕަރޭޓް ރެސިޑެންޓް ވިސާ ދެ ގޮތަކަށް ދޫކުރާނެ އެވެ. އެއް ގޮތަކީ 250،00 ޑޮލަރު ރާއްޖޭގައި އިންވެސްޓްކުރުމެވެ. ދެވަނަ ގޮތަކީ އެ އަދަދުގެ ފައިސާ ރާއްޖޭގެ ބޭންކެއްގައި ފަސް އަހަރު ދުވަހަށް ފިކްސްޑް ޑިޕޮޒިޓް އެކައުންޓެއްގައި ބެހެއްޓުމެވެ.

ޝިޔާމް ވިދާޅުވީ އެހާ ފަސޭހަ އިން ވިސާ ދޭ ގޮތަށް ނިންމުމަކީ ރާއްޖޭގެ ކުދި އަދި މެދު ފަންތީގެ ވިޔަފާރިތަކަށް ކުރިމަތިވާނެ ވަރަށް ބޮޑު ގެއްލުމެއް ކަމަށެވެ. އެންމެ 250،000 ޑޮލަރު އިންވެސްޓް ކުރާ ފަރާތްތަކަށް ކޯޕަރޭޓް ވިސާ ދޭން ފެށުން އޭނާ ސިފަކުރެއްވީ "ގައުމަށް ގައްދާރުވުމުގެ ގޮތުގަ" އެވެ.

"..ނުބައި ދުރު އަމާޒެއްގެ މަގްސަދު ހާސިލްކުރުމުގެ ކޮޅުމަތި،" ޝިޔާމް ވިދާޅުވި އެވެ.

ރައްޔިތުންގެ މަޖިލީހުން އިއްޔެ ފާސްކުރި ރިޕޯޓުގައިވާ ގޮތުގައި އިމިގްރޭޝަން ގާނޫނަށް ގެނައި އިސްލާހުތައް ފާސްކުރާތާ 14 ދުވަހުގެ ތެރޭގައި ކަމާ ބެހޭ ގަވައިދުތައް ދައުލަތުގެ އިދާރާތަކުން ހަދަން ޖެހެ އެވެ.

މިހާރު އަމަލުކުރަމުން އަންނަ ގަވައިދުގައިވާ ގޮތުން ރާއްޖޭން ރެސިޑެންޓް ވިސާ ދޫކުރަނީ މަދުވެގެން 50 މިލިއަން ޑޮލަރު (771 މިލިއަން ރުފިޔާ) އިންވެސްޓްކުރާ މީހުންނަށެވެ.

އިމިގްރޭޝަން ގާނޫނަށް ސަރުކާރުން ހުށަހެޅި އިސްލާހު ކޮމިޓީން ދިރާސާކޮށް ހިމެނި އެހެން ކަންތައްތަކުގެ ތެރޭގައި ދިވެހިންނާ ކައިވެނިކޮށްގެން އުޅޭ މީހުންނަށް މެރިޖް ވިސާ ދޫކުރުން ވެސް ހިމެނެ އެެވެ. އެއީ ކޮންމެ ފަސް އަހަރަކުން އާކުރާ ގޮތަށް ދޫކުރާ ވިސާއެކެވެ.

ފަސޭހަ އިން ވިސާ ލިބޭ އިސްލާހަށް މަޖިލީހުގެ ކޮމިޓީގައި ބަހުސްކުރިއިރު ހިޔާލު ތަފާތުވުންތަކެއް އުފެދުނެވެ. އެ ހިޔާލު ތަފާތުވުން އުފެދުނީ، ރާއްޖޭގައި 10 އަހަރަށް ވުރެ ދިގު މުއްދަތަށް ގެއެއް ކުއްޔަށް ހިފާ ބިދޭސީންނަށާއި ރާއްޖޭގައި އެއް ލައްކަ ރުފިޔާ އަށް ވުރެ ބޮޑު އިންވެސްޓެއް ކުރާ ބިދޭސީންނަށް ވެސް ރެޒިޑެންސް ވިސާ ދޭ ގޮތަށް ބަދަލު ގެނައުމާ މެދު ވިސްނަން ރިޔާސަތުން ކުރީގެ ރައީސް މުހައްމަދު ނަޝީދު އެދިވަޑައިގަތުމުންނެވެ. އެކަމަކު ކޮމިޓީގެ ގިނަ މެމްބަރުން ވަނީ އެކަމާ ދެކޮޅު ހައްދަވައިފަ އެވެ.