މޫދުގައި މަރުވެފައިވާ އޮއްވައި ފެނުނީ ވެލާނާ އެއާޕޯޓުގެ ޕްރޮޖެކްޓް ކޮންސަލްޓަންޓު ހެޑް

މާލޭގެ ދެކުނު ފަރާތު ފަޅުތެރޭގައި މަރުވެފައި އޮއްވައި މިއަދު ފެނުނީ ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ ޕްރޮޖެކްޓް ކޮންސަލްޓަންޓު ހެޑް ކަމަށް އެމްއޭސީއެލް އިން ބުނެފި އެވެ.

ވީއައިއޭ ހިންގާ ކުންފުނީގެ އިސް އޮފިޝަލަކު "މިހާރު" އަށް ވިދާޅުވީ، އިނގިރޭސި ވިލާތުގެ ރައްޔިތެއް ކަމަށްވާ ޕޯލް އަޑޫ 58، މަރުވެފައި އޮއްވައި ފެނުމާ ގުޅިގެން ފުލުހުން އެ މައްސަލަ ބަލަމުން ފަށާފައިވާ ކަމަށެވެ.

ކޮންސަލްޓަންޓު ދިރިއުޅެނީ ހުޅުމާލޭގައި ކަމަށް ވިޔަސް މޫދަށް އެރެން މާލެ އައި ސަބަބެއް މިހާތަނަކަށް ނޭނގެ އެވެ. އެމްއޭސީއެލް އަށް ވެސް އެކަން އެނގިފައެއް ނުވެ އެވެ.

ވީއައިއޭގެ ކޮންސަލްޓަންޓު ހެޑުގެ ގޮތުގައި މަސައްކަތް ކުރާތާ ތިން އަހަރު ވެފައިވާ އެ ފިރިހެންމީހާ އަރައިގެން ހުރި އޮފީސް ބޫޓާއި ދަބަސް ބަހައްޓާފައި މާލޭ ޖަލު ކުރިމަތިން ފަޅަށް ފުންމާލާތަން އެ ސަރަހައްދުގައި ހުރި ކެމެރާ އިން ވެސް ފެނެ އެވެ. މިކަމާ ގުޅޭ އިތުރު ތަފްސީލެއް ނުލިބެ އެވެ.

މީހަކު މޫދަށް ވެއްޓިފައި އޮތް ކަމުގެ މައުލޫމާތު ފުލުހުންނަށް ހުށަހަޅާފައިވަނީ ހެނދުނު 9:45 ގަ އެވެ. ނަމަވެސް އޭނާ މޫދަށް ފުންމާލީ ކިހާ އިރަކު ކަމެއް އަދި ސާފެއް ނުވެ އެވެ.

ވެލާނާ އެއާޕޯޓުގައި ބޭރުގެ އެކި ކުންފުނިތަކުން އަންނަނީ ތަރައްގީގެ މަޝްރޫއުތައް ހިންގަމުންނެވެ.