ޖެނުއަރީގައި ލަންކާ ހުޅުވައިލަނީ، ކުރިޔާލައި ވިސާ ނަގަން ޖެހޭ

އަންނަ އަހަރުގެ ޖެނުއަރީގައި ލަންކާގެ ވައިގެ ބަނދަރު ހުޅުވައިލަން ނިންމައިފި އެވެ.

އަންނަ މަހު ހުޅުވައިލާ އިރު އެ ގައުމަށްދާ މީހުން އަމަލު ކުރާނެ ހާއްސަ އުސޫލެއް ވަނީ އާއްމުކޮށްފަ އެވެ. ލަންކާގެ ޓޫރިޒަމް ޑިވެލޮޕްމެންޓް އޮތޯރިޓީން އާއްމުކޮށްފައިވާ އުސޫލުގައިވާ ގޮތުން، އެ ގައުމަށް ދާ ކޮންމެ މީހަކު 14 ދުވަހަށް ކަރަންޓީން ވާން ޖެހެ އެވެ.

އެ ގައުމަކީ އޮންއެރައިވަލް ވިސާ ދޭ ގައުމެއް ނަމަވެސް ޖެނުއަރީގައި ހުޅުވައިލާ އިރު އޮން އެރައިވަލް ވިސާއެއް ނުހެއްދޭނެ އެވެ. އެހެންކަމުން އެ ގައުމަށް ދާ އެންމެން ވެސް ކުރިއާލައި ވިސާ ހައްދަން ޖެހެ އެވެ. ވިސާ ހައްދާ މީހުންނަށް ހަ މަސް ދުވަހަށް ޓޫރިސްޓް ވިސާ ލިބޭނެ އެވެ. ވިސާ ހައްދަން ޖެހޭނީ އޮންލައިންކޮށެވެ. ނުވަތަ އިލެކްޓްރޯނިކް ޓްރެވަލް އޮތޮރައިޒޭޝަން (އީޓީއޭ) މެދުވެރިކޮށެވެ.

މީގެ އިތުރުން އެ ގައުމަށް އެތެރެވާ ހުރިހާ ޓޫރިސްޓުން ކޮވިޑް އިންޝުއަރެންސެއް އޮންނަ ޖެހެ އެވެ. އަދި ޕޮޒިޓިވްވާ ހާލަތުގައި އެ މީހެއްގެ ސިއްހީ ހުރިހާ ހަރަދެއް ބަލަހައްޓަން ޖެހޭނީ އެ މީހަކު އަމިއްލައަށެވެ. ލަންކާއިން ވަނީ ޓޫރިސްޓުން ގޮސް ތިބޭނެ ހޮޓާތަކުގައި ރައްކާތެރިކަމުގެ މިންގަނޑު ކަނޑައަޅައި މިހާރު ސަ\ެޓިފައިކޮށްފަ އެވެ.

ޓޫރިސްޓުންނަށް އާންމުކޮށް އެ ގައުމުގެ އެންމެ މަގްބޫލު ތަންތަނަށް ދިއުމުގެ ހުއްދަ އޮތް ނަމަވެސް ޕަބްލިކް ޓްރާންސްޕޯޓެއް ބޭނުމެއް ނުކުރެވޭނެ އެވެ.

މީގެ ކުރިން ލަންކާއިން އޮގަސްޓްމަހު ވެސް ބޯޑަރު ހުޅުވައިލުމަށް އިއުލާނު ކުރި އެވެ. އެހެން ނަމަވެސް ކޮވިޑް ޖެހޭ މީހުން އިތުރުވާން ފެށުމުން އޭރު ބޯޑަރު ހުޅުވުން ފަސްކުރި އެވެ.