އެމެރިކާގެ ސްޕޭސް ފޯސްގެ ފައުޖަކީ "ގާޑިއަންސް"

އެމެރިކާގެ އަސްކަރިއްޔާގެ ގޮތްޕެއްގެ ގޮތުގައި، ރައީސް ޑޮނަލްޑް ޓްރަމްޕް މިދިޔަ އަހަރު އުފެއްދެވި "ސްޕޭސް ފޯސް" އަށް އެއް އަހަރުވުމާ ދިމާކޮށް އޭގެ މެމްބަރުންނަށް ރަސްމީކޮށް ބޭނުންކުރާނެ ނަމަކަށް "ގާޑިއަންސް" ހަމަޖައްސައިފި އެވެ.

"ސްޕޭސް ފޯސް" ގެ ފައުޖަށް "ގާޑިއަންސް" ގެ ނަން ދިނުމުގެ އަސްލަކަށް ބަލާފައި ވަނީ ކުރީގެ އެއާ ސްޕޭސް ކޮމާންޑްގައި 1983 ގައި މޮޓޯއަކަށް ބޭނުންކުރި އިބާރާތް "ގާޑިއަންސް އޮފް ދަ ހަޔާ ފްރޮންޓިއާ" ކަމަށް ސްޕޭސްގެ ފޯސްގެ ވެބްސައިޓްގައި ބުންޏެވެ.

"ސްޕޭސް ފޯސް" ގެ މެމްބަރުންނަކީ "ގާޑިއަންސް" ކަމަށް ކަނޑައެޅި އިރު، އެ ލަފުޒު އާންމުންގެ ތެރޭގައި އެންމެ މަޝްހޫރުވާނީ މާވެލް ސްޓޫޑިއޯ އާއި ޑިޒްނީ ފަދަ ހޮލީވުޑްގެ ކުންފުނިތަކުން ގެނެސްދޭ ސުޕަހީރޯ ފިލްމުތަކުގައި ދައްކުވައިދޭ ޖައްވީ ފައުޖުތަކާ ގުޅުވައިގެންނެވެ.

"ސްޕޭސް ފޯސް" ގެ ފައުޖަކީ "ގާޑިއަންސް" ކަމަށް ނިންމި އިރު، އެ ތަނުގެ ލޯގޯ ވެސް ފިލްމުތަކުން ފެންނަ ހިޔާލީ ފައުޖެއްގެ ލޯގޯއަކާ ވައްތަރެވެ. އެގޮތުން މި އަހަރުގެ ކުރީކޮޅު "ސްޕޭސް ފޯސް" ގެ ލޯގޯ އާންމުކުރި އިރު އެއީ "ސްޓާ ޓްރެކް" ފިލްމުތަކުން ފެންނަ ސްޕޭސް ސްޓާފްލިޓް ކޮމާންޑްގެ ލޯގޯ ކޮޕީކޮށްފައި ކަމަށް ބުނެ ފާޑުކިޔުންތައް ވެސް އަމާޒުވި އެވެ.

ޓްރަމްޕްގެ 2018 ގެ އަމުރަކަށް އުފެއްދި "ސްޕޭސް ފޯސް" އަކީ ނެޝަނަލް ޑިފެންސް އޮތޮރައިޒޭޝަން އެކްޓްގެ ދަށުން އުފެއްދި ތަނެކެވެ. މީގެ މައިގަނޑު މަގުސަދަކީ އެމެރިކާގެ އަސްކަރިއްޔާގެ ތެރޭގައި ޖައްވީ މިޝަންތައް ވަރުގަދަކޮށް ފުޅާކުރުމެވެ.

"ސްޕޭސް ފޯސް" އަކީ އެމެރިކާގެ އަސްކަރިއްޔާގެ ހިމެނޭ ހަ ގޮފީގެ ތެރެއިން އެއް ގޮތްޕެވެ. ގޮފި ރަސްމީކޮށް ވުޖޫދަށް އައީ ޑިސެމްބަރު 20، 2019 ގަ އެވެ. "ސްޕޭސް ފޯސް" ގެ ފައުޖު އެކުލެވިގެން ވަނީ 2،501 ގާޑިއަނުންނާއި 77 ސްޕޭސްކްރާފްޓާގެ ފްލީޓަކާ އެކީގަ އެވެ.