އެމެރިކާ ރައީސަށް ޚާއްސަ އާ ދެ މަތިންދާބޯޓުގެ އޯޑަރު ޓްރަމް ކެންސަލްކޮށްފި

ނިއު ޔޯކް(ޑިސެމްބަރު 7) - އެމެރިކާގެ ރައީސްގެ ދަތުރުފުޅުތަކަށް ޚާއްސަކޮށްގެން ބޯއިންގެ އާ މަތިންދާބޯޓު ގަންނަން އެމެރިކާ ސަރުކާރުން އޯޑަރު ދީފައި ވަނިކޮށް އެ އޯޑަރު ކެންސަލް ކުރަން، އަންނަ ޖެނުއަރީ މަހު އެ ގައުމުގެ ރައީސް ކަމާ ހަވާލުވާ ޑޮނަލްޑް ޓްރަމްޕް ނިންމަވައިފި އެވެ.

ވެރިކަމާ ހަވާލުވެ ވަޑައިގަންނަވަން މަހަކަށް ވުރެ ގިނަ ދުވަސް ބާކީ އޮއްވާ ޓްވިޓާ މެދުވެރިކޮށް ޓްރަމްޕް އިއްޔެ އިއުލާން ކުރެއްވީ އެމެރިކާގެ ރައީސްގެ ދަތުރުފުޅުތަކަށްޓަކައި ބޯއިން 747 ގެ އިތުރު ދެ މަތިންދާބޯޓު އުފައްދަން ބޯއިން ކުންފުންޏަށް ދީފައިވާ އޯޑަރު ކެންސަލް ކުރައްވާނެ ކަމަށެވެ. ހަތަރު ބިލިއަން ޑޮލަރު ޚަރަދުކޮށްގެން އުފައްދާ އެ ދެ މަތިންދާބޯޓުގެ އޯޑަރު ކެންސަލް ކުރަން ޓްރަމްޕް ނިންމެވީ ޚަރަދު މާ ބޮޑު ކަމަށް ވިދާޅުވެ އެވެ.

ބޯއިން ކުންފުނިން އެ ދެ މަތިންދާބޯޓުގެ މަސައްކަތް ނިންމައި، އެމެރިކާ ސަރުކާރާ ހަވާލުކުރަން ޖެހެނީ 2024 ވަނަ އަހަރު އެވެ. އެހެންވެ، އެ މަތިންދާބޯޓު ގަންނަން ޓްރަމްޕް ބޭނުންފުޅުވިޔަސް އޭގެ ބޭނުން އޭނާއަށް ކުރެއްވޭނީ 2020 ވަނަ އަހަރުގެ އިންތިޚާބުން އޭނާ ދެވަނަ ދައުރަކަށް ހޮވިވަޑައިގެންފި ނަމަ އެވެ.

ބޯއިން ކުންފުންޏަށް ދީފައިވާ އޯޑަރު ކެންސަލް ކުރާނެ ކަމަށް ވިދާޅުވެ، ޓްރަމްޕް ޓްވީޓް ކުރެއްވުމާ އެކު ދުުނިޔޭގެ ހިއްސާގެ ބާޒާރުގައި ބޯއިން ކުންފުނީގެ ހިއްސާ އެއް ޕަސެންޓް ވަނީ ދަށަށް ގޮސްފަ އެވެ.

ޓްރަމްޕް މިހާރު ދަތުރުފުޅު ކުރައްވަނީ އޭނާގެ އަމިއްލަ މަތިންދާބޯޓެއްގައި ނަމަވެސް ވެރިކަމާ ހަވާލުވެ ވަޑައިގަތުމަށް ފަހު އޭނާ ދަތުރު ކުރައްވަންޖެހޭނީ އެމެރިކާގެ ރައީސަށް ޚާއްސަކޮށް މިހާރު ބޭނުންކުރާ އެއާ ފޯސް ވަން މަތިންދާބޯޓުގަ އެވެ.

މިހާރު ބޭނުންކުރާ މަތިންދާ ބޯޓަކީ ވެސް ވަރުގަދަ ދިފާއީ ނިޒާމުތަކާއި މުވާސަލާތީ ވަސީލަތްތަކާއި ރައީސަށް ޚާއްސަ އޮފީސް ކޮޅަކާއި ރައީސްގެ ސެކިއުރިޓީންނާއި އަރިސް ބޭފުޅުންނަށް ވެސް ޚާއްސަ ބައިތަކެއް ހިމެނޭ ގޮތަށް ތައްޔާރުކޮށްފައިވާ ބޯޓެކެވެ.