ޓްރަމްޕް މައާފް ދެއްވި މީހުންގެ ތެރޭގައި އިރާގުން މީހުން މެރި މީހުން ވެސް ހިމެނޭ

ވޮޝިންޓަން (ޑިސެމްބަރު 26) - ވެރިކަމުން ފައިބައިވަޑައިގަތުމުގެ ކުރިން ރައީސް ޑޮނަލްޑް ޓްރަމްޕް މައާފް ދެއްވި މީހުންގެ ތެރޭގައި އިރާގުގެ 14 މީހަކު މެރި ބްލެކްވޯޓާގެ ހަތަރު މީހަކު ހިމެނިއްޖެ އެވެ.

ބްލެކްވޯޓާގެ ހަތަރު ގާޑުން 2007 ވަނަ އަހަރު ވަނީ ބަޣުދާދުގެ ނިސޫރު މައިދާނުގައި ބަޑިޖަހައި އިރާގުގެ 14 މީހުން މަރާލައިފަ އެވެ. އެ ހަތަރު މީހުންނަށް މައާފް ދިނުމުން އދ.ގެ ހިއުމަން ރައިޓްސް އޮފީހުން ވަނީ ފާޑު ކިޔައިފަ އެވެ. އަދި އެފަދަ ބޮޑެތި ޖަރީމާތައް ހިންގާފައިވާ ބަޔަކަށް މައާފް ދިނުމަކީ އެ ބާވަތުގެ އަނިޔާވެރިކަމަށް ދެވޭ ހިތްވަރެއް ކަމަށް ވެސް ބުނެފައިވެ އެވެ.

ބަޑީގެ ހަމަލާގައި މަރުވި ނުވަ އަހަރުގެ ކުއްޖެއްގެ ބައްޕަ ބުނީ ޓްރަމްޕް އަނެއްކާވެސް އެ ވަނީ "އޭނާގެ ހަޔާތް ބަރުބާދުކޮށްލާފައި" ކަމަށެވެ.

ބްލެކްވޯޓާގެ ގާޑުން އިރާގުގައި ހަރަކާތްތެރިވީ ޕްރައިވެޓް ސެކިއުރިޓީ ކޮންޓްރެކްޓަރުންގެ ގޮތުގަ އެވެ. އެމެރިކާ ގެ ފައުޖެއް ސެޕްޓެމްބަރު 16، 2007 ގައި ސަލާމަތީ ފިޔަވަޅުތައް ވަރުގަދަކޮށްފައިވާ ވެހިކަލްތަކެއްގައި ދަތުރުކުރަމުން ދިޔައިރު އެ މީހުންނަށް ސެކިއުރިޓީ ދީފައި ވަނީ ބްލެކްވޯޓާގެ 19 ގާޑުންނެވެ. އެމެރިކާގެ ޖަސްޓިސް ޑިޕާޓްމަންޓުން ބުނެފައި ވަނީ ބްލެކްވޯޓާގެ ވަރަށް ގިނަ ގާޑުން އެ ދުވަހު ވަނީ، ގްރީން ޒޯނާ ކައިރީގައި އޮންނަ ނިސޫރް މައިދާނުގައި ބަޑި ޖަހާފައި ކަމަށެވެ. ބްލެކްވޯޓާގެ ގާޑުންގެ ހަމަލާތަކުގައި މަރުވި މީހުންގެ ތެރޭގައި 10 ފިރިހެނުންނާއި ދެ އަންހެނުންނާއި ނުވައެއް އަދި 11 އަހަރުގެ ދެ ކުޑަ ކުދިން ހިމެނެ އެވެ.

ޓްރަމްޕް މައާފް ދެއްވި ހަތަރު މީހުންގެ ތެރޭން އެކަކު ހުރީ އުމުރަށް ޖަލަށްލައިފަ އެވެ. އަނެއް ތިން މީހުންނަށް އިއްވާފައި ވަނީ 30 އަހަރުގެ ޖަލު ހުކުމެކެވެ. ނަމަވެސް އެ ތިން މީހުންގެ ޖަލު ހުކުމުގެ މުއްދަތު 2019 ވަނަ އަހަރު ވަނީ ލުއިކޮށްދީފަ އެވެ.

ޑިމޮކްރެޓިކް ސެނެޓަރެއް ކަމަށްވާ ކްރިސް މާފީ ވިދާޅުވީ އެފަދަ ގާތިލުންނަށް ޓްރަމްޕް މައާފް ދެއްވުމަކީ ލަދެއް ކަމަށެވެ. އެ މީހުން ބަޑި ޖެހީ އަންހެނުންނާއި ކުޑަ ކުދިން އަމާންދީ އަތް މައްޗަށް ނަގައިގެން ތިއްބާ ކަމަށް އޭނާ ވިދާޅުވި އެވެ.

ޓްރަމްޕް ވަނީ އެމަނިކުފާނުގެ ކުރީގެ ކެމްޕޭން މެނޭޖަރު ޕޯލް މެނަފޯޓާއި ކުރީގެ އެޑްވައިޒަރު ރޮޖާ ސްޓޯން އަދި ދަނބިދަރިކަލުން ޖާރެޑް ކުޝްނާގެ ބައްޕާފުޅު ޗާލްސް ކުޝްނާ އަށް މައާފް ދެއްވައިފަ އެވެ.

މަނަފޯޓް 2018 ވަނަ އަހަރު ކުށްވެރިވީ އެމެރިކާގެ 2016 ގެ އިންތިޚާބުގެ ތެރެއަށް ރަޝިޔާގެ ނުފޫޒް ފޯރުވިކަމަށް ބުނާ މައްސަލައާ ގުޅިގެންނެވެ. އޭނާ ވަނީ ހަތް އަހަރާއި ބައިގެ މުއްދަތަށް ޖަލަށްލައިފަ އެވެ. ސްޓޯން ކުށްވެރިވީ ކޮންގްރެސް އަށް ދޮގު ހެދި ކަމުގެ ކުށުގަ އެވެ. ޗާލްސް ކުޝްނާ ކުށްވެރިވީ ޓެކްސް އަށް މަކަރު ހެދުމުގެ ކުށުގަ އެވެ. އޭގެ ކުރިން ޓްރަމްޕް ވަނީ ކުރީގެ ނޭޝަނަލް ސެކިއުރިޓީ އެޑްވައިޒަރު މައިކަލް ފްލައިން އަށް މައާފް ދެއްވައިފަ އެވެ.