އޯޝަން ގްރޭންޑް: ދުނިޔޭގެ ފެންވަރުގެ އެވޯޑަކާ އެކު ފުރިހަމަ ދެ އަހަރު

ބޭރުން ފެންނައިރު ވެސް އެ ތަނުގެ ހައިބަތު ސިފަވެ އެވެ. ދޮރު ހުޅުވާލުމަށް ފަހު އެތެރެ އަަށް ވަނުމާ އެކު، އެ ތަނުގެ މުވައްޒަފަކު އައިސް ބޭނުންވަނީ ކޮން ކަމެއްތޯ ސުވާލު ކުރި އެވެ. އެހީތެރިވެދެވޭނެ ގޮތަކީ ކޮބައިތޯ އޮޅުންފިލުވި އެވެ. ކުރިއަށް ދާންވާ މަގު ދެއްކި އެވެ. ރިސެޕްޝަނާ ހިސާބަށް ގެންގޮސްދިނެވެ. ހިނިތުންވުމާ އެކީގަ އެވެ.

މިއީ ހުޅުމާލޭގައި ހުރި ގިނަ އަދަދެއްގެ ގެސްޓްހައުސްތަކުގެ ތެރޭން ވެސް އެންމެ ނަން ހިނގާ އަދި އެންމެ މަގުބޫލު އެއް ތަނެވެ. މި ތަން ހަދާފައިވާ ގޮތުން ފެށިގެން ގެސްޓުންނަށް ދޭ ހިދުމަތްތަކާ ހަމައަށް ބައްޓަންކޮށްފައި ވަނީ ތަފާތު ކަމެއް ގެނެސްދެވޭނެ ގޮތަށެވެ. ފްލެޓް އިމާރާތެއް ނުވަތަ ރޯހައުސްއެއް ގެސްޓްހައުސަކަށް ބަދަލުކޮށްލުމުގެ ބަދަލުގައި މި ތަން ފުރަތަމަ ވެސް ބައްޓަންކޮށްފައި ވަނީ ހޮޓަލެއްގެ ގޮތަށެވެ. އިމާރާތްކުރުމުގައި، މި ތަނުގެ ޑިޒައިން ހަދާފައި ވަނީ ހޮޓަލަކާ އެއްގޮތަށެވެ. މެދުގައި ވޯކްވޭއެއް އޮވެފައި އެ ވޯކްވޭގެ ދެ ފަރާތުގައި ކޮޓަރި ހުންނަ ގޮތަށެވެ.

"ލޮބީ އަށް ވަދެގެން ކޮޓަރިއާ ހަމައަށް ދާއިރު، މުޅި ތަނުން ވެސް ކުރެވޭނީ ހޮޓަލެއްގެ އިހުސާސް. ގެއަކަށް ވަދެގެން ދެވޭހެންނެއް ނޫން ހީވާނީ،" އޯޝަން ގްރޭންޑްގެ ރެޒިޑެންޓް މެނޭޖަރު ހަސީބް ޝަރީފު ވިދާޅުވި އެވެ.

ޖުމްލަ 18 ކޮޓަރީގެ އޯޝަން ގްރޭންޑްގައި ހަތަރު ވައްތަރެއްގެ ކޮޓަރި ހުރެ އެވެ. އެއީ ބޮޑު މިނުގައި 163 އަކަފޫޓު ހުންނަ ޑީލަކްސް ޑަބްލް ސުއިޓާއި 171 އަކަފޫޓު ހުންނަ ސުޕަ ޑީލަކްސް ޑަބްލް ކޮޓަރި އާއި ސުޕަ ޑީލަކްސް ޓުވިން ކޮޓަރި އަދި އެންމެ މަތީ ފެންވަރުގެ އޯޝަން ވިއު ސުއިޓެވެ. ހަތަރު ތަރީގެ ހޮޓަލެއްގައި ހުންނަ ހުރިހާ ވަސީލަތްތަކެއް ގާއިމްކޮށްފައި ވާއިރު، ހުރިހާ ހިދުމަތެއް ވެސް ބައްޓަންކޮށްފައި ވަނީ އެ ތަނުގައި ހުންނަ މީހަކަށް ވީހާ ވެސް ބޮޑަކަށް އަރާމުކޮށްލެވޭނެ ގޮތަށެވެ.

އެއީ އޯޝަން ގްރޭންޑުގެ އެންމެ ހާއްސަ ސިފަ އެވެ. ކިތަންމެ ކުޑަ ތަނަކަށް ވިޔަސް، އެ ތަނުގައި މަސައްކަތް ކުރާ 27 މުވައްޒަފުންގެ އެންމެ ބޮޑު އަމާޒަކީ އެންމެ މަތީ ފެންވަރުގެ ހިދުމަތްތަކެއް ދިނުމެވެ. އެއާޕޯޓުން ފެށިގެން ގެސްހައުސްއާ ހިސާބަށް އަދި އެ ތަނަށް ވަނުމަށް ފަހު ކޮޓަރިއާ ހަމައަށް ދެވެންދެން އެއްވެސް ވަރަކަށް ބީރަށްޓެހި ކަމުގެ އިހުސާސެއް ނުކުރެވޭނެކަން ކަށަވަރު ކުރުމެވެ. ކޮޓަރިން ލިބޭ ހިދުމަތްތަކުން ފެށިގެން ކާއެއްޗެއްސާއި އެ ނޫން ހިދުމަތްތައް ވެސް ބިނާކޮށްފައި ވަނީ އެ ހިދުމަތްތައް ލިބިގަންނަ ކޮންމެ މީހަކު ހިތްހަމަޖެހިގެން ދާނެ ގޮތަކަށެެވެ.

އެކަން ކަށަވަރު ކުރުމަށް، އޯޝަން ގްރޭންޑުން ގެންގުޅެނީ އެންމެ ޒަމާނީ އުސޫލުތަކެވެ. މުވައްޒަފުން ހޯދުމުގައި ބަލަނީ އެކަށީގެންވާ ތަމްރީނާއި ތަޖުރިބާ އަށެވެ. އޮކްޓޯބަރު 29، 2014 ގައި އޯޝަން ގްރޭންޑް ހުޅުވުމުގެ ގާތްގަނޑަކަށް ތިން މަސްދުވަސް ކުރިން އެފަދަ ގާބިލު މުވައްޒަފުން ނެގި އެވެ. އިތުރު ތަމްރީނު ދިނުމަށް ބައެއް ފަރާތްތައް ރާއްޖޭން ބޭރަށް ފޮނުވިއިރު، ރިސޯޓުތަކުގައި ގިނަ ދުވަހު މަސައްކަތްކޮށްފައިވާ ޓޫރިޒަމް ދާއިރާގެ އެކި ތަޖުރިބާކާރުންނާއި ރިސޯޓުތަކުގެ މަތީ މަގާމުތަކުގައި ތިބޭ ފަންނީ ފަރާތްތައް އޯޝަން ގްރޭންޑަށް ގެނެސް ބައިތިއްބައިގެން، އެ ތަނުގެ މުވައްޒަފުން އެކި ކަންކަމަށް އަހުލުވެރިކުރުވުމަށް ތަފާތު ޕްރޮގްރާމްތައް ހިންގި އެވެ.

"މިހާރު ވެސް މަދުވެގެން މަހަކު ދެ ފަހަރު އަޅުގަނޑުމެންގެ ހަރަދުގައި ރިސޯޓުތަކުން މީހުން ގެނެސް، މި ތަނުގައި ދެތިން ދުވަހު ބައިތިއްބައިގެން އަޅުގަނޑުމެންގެ މުއައްޒަފުންނަށް ތަމްރީނު ދީ، ޓްރޭނިން ސެޝަންތައް ނަގައިދެން،" ވިލާ ކުންފުނީގެ ރިސޯޓުތަކުގައި ކުރިން މަސައްކަތްކޮށް އަދި ހޮޓެލް އެންޑް ރިސޯޓް މެނޭޖްމަންޓުގެ ދާއިރާ އިން ގްރެޖުއޭޓް ވެފައިވާ ހަސީބު ވިދާޅުވި އެވެ.

"ތިއަރީ ކްލާސްތައް ވެސް ކޮންމެވެސް ވަރަކަށް ހިމެނޭނެ. އަދި މި ގޮތަށް ތަމްރީނު ދިނުމުގައި ސަމާލުކަން ދެނީ ވީހާ ވެސް ގިނަ ދާއިރާތަކުގެ ތަޖުރިބާކާރުން ގެނެވޭތޯ. މިސާލަކަށް، އެފްއެންޑްބީ، ހައުސް ކީޕިން، ފްރަންޓް އޮފީސް، ގެސްޓް ރިލޭޝަންސް."

އެ މަސައްކަތުގެ ނަތީޖާ ވެސް ވަރަށް ރަނގަޅެވެ. އޯޝަން ގްރޭންޑަށް ދެ އަހަރު ފުރުމުގެ މުނާސަބަތު ފާހަގަކުރީ ދުނިޔޭގެ ފެންވަރުގެ އެވޯޑަކާ އެކުގަ އެވެ. ޓޫރިޒަމް ދާއިރާގައި ދޭ އެންމެ މަގުބޫލު އެއް އެވޯޑު ކަމަށްވާ ވޯލްޑް ލަގްޒަރީ ހޮޓެލް އެވޯޑްސްގެ އެންމެ ފެންވަރު ރަނގަޅު ގެސްޓްހައުސްގެ އެވޯޑު އޯޝަން ގްރޭންޑަށް ލިބުނީ ދުނިޔޭގެ ފެންވަރުގެ ކެޓަގަރީންނެވެ. އެއީ ސަރަހައްދީ އަދި ގައުމީ ފެންވަރުގެ ވަނަތައް ހޯދި އިޓަލީ އަދި ޖަރުމަނު ފަދަ ދުނިޔޭގެ ޓޫރިޒަމް ސިނާއަތުގައި ނަން ހިނގާ ތަފާތު އެކި ގައުމުތަކުގެ ގެސްޓްހައުސްތަކާ ވާދަކޮށްގެންނެވެ.

"މިއީ ވަރަށް ބޮޑު ޝަރަފެއް. ވަކިން ހާއްސަކޮށް، ހުޅުމާލޭގައި ހުންނަ ކުޑަކުޑަ ގޮޅިއެއްގައި ހަދާފައިވާ މި ވަރުގެ ތަނެއް ދުނިޔޭގެ ފެންވަރުގެ އެންމެ ރަނގަޅު ގެސްޓްހައުސަކަށް ހޮވުމުން އަޅުގަނޑުމެންގެ ހިދުމަތްތަކާ މެދު ވަރަށް ބޮޑު ޔަގީންކަމެއް ލިބިގެން ހިނގައްޖެ،" ހަސީބް ވިދާޅުވި އެވެ.

ލަގްޒަރީ ހޮޓެލް އެވޯޑްސް އަށް ނަން ހުށަހަޅަނީ އެވޯޑުގެ ކަންކަން ބަލަހައްޓާ ފަރާތުން ނުވަތަ ޓްރެވަލް އެޖެންޓުންނާއި ޓުއަ އޮޕަރޭޓަރުންނެވެ. ބުކިން ހަދާ ވެބްސައިޓުތަކުގައި ހުންނަ ރިވިއުތަކަށް ބެލުމަށް ފަހު އެންމެ މަތީގައި އުޅޭ ހޮޓާތައް މި އެވޯޑަށް ނޮމިނޭޓުކޮށް، އެ ތަންތަނުގެ މައުލޫމާތު ޔަގީންކުރުމަށް ފަހު އެ ހޮޓަލަކާ ގުޅައި އެކަން އަންގަ އެވެ. އާއްމުންގެ ވޯޓަށް ހުޅުވާލަނީ އޭގެ ފަހުންނެވެ.

އާއްމުންގެ ވޯޓުން ދުނިޔޭގެ އެންމެ ފެންވަރު ރަނގަޅު ގެސްޓްހައުސަކަށް އޯޝަން ގްރޭންޑް ހޮވުނީ، އެ ތަނުން ދޭ ހިދުމަތްތައް މިދިޔަ ދެ އަހަރުދުވަހުގެ ތެރޭގައި އެ ތަނަށް ޒިޔާރަތްކޮށްފައިވާ މީހުން ބަލައިގަނެފައިވާތީ އެވެ. މޫދު ކައިރީގައި ތިބެ، ޗުއްޓީ ހޭދަކޮށްލަން އަންނަ މީހުންނަށް ހުޅުމާލެ ފަދަ ސިޓީއެއްގައި ޗުއްޓީ ހޭދަކުރުމުގައި ދިމާވެދާނެ ކަންކަން ދުރާލާ އޮޅުން ފިލުވައިދެ އެވެ. ރަލުގެ އެއްވެސް ބާވަތެއް ނުލިބޭނެ ކަމާއި ބިކިނީގައި މޫދަށް ނޭރެވޭނެކަން ފަދަ މުހިއްމު މައުލޫމާތުތައް ބުކިން ހަދާ ހިސާބުން ފެށިގެން ކިޔައިދެ އެވެ. އޭގެ ބަދަލުގައި ކުރެވިދާނެ ކަންކަން ވެސް އަންގައިދެ އެވެ.

"މިސާލަކަށް، ރިސޯޓުތަކަށް ޑޭ ވިޒިޓް ހަދައިދިނުން. އެޗްއައިއެޗުން ލިކަ ލިބުން. މިފަދަ ހުރިހާ އޮލްޓަނެޓިވް ކަންތައްތަކެއް ކިޔައިދެން. އެހެންވީމަ، ޓޫރިސްޓަކަށް އޮޅިފައެއް ނޯންނާނެ. އެހާ ވެސް ގާތްކޮށް ހިދުމަތް ދެނީ،" ބައިނަލްއަގުވާމީ އެވޯޑެއް ހޯދި ރާއްޖޭގެ ފުރަތަމަ ގެސްޓްހައުސްގެ ހިދުމަތްތަކާ ގުޅޭ ގޮތުން ހަސީބް ވިދާޅުވި އެވެ

ހުޅުމާލެ ފަދަ މީހުން އާބާދުވެފައިވާ ސިޓީއެއްގައި ފުރިހަމަ އިންތިޒާމެއްގެ ދަށުން ގެސްޓްހައުސެއް ހިންގުމަކީ ގޮންޖެހުންތައް ގިނަ ކަމެކެވެ. އެކަމަކު، ދުނިޔޭގެ އެންމެ ފެންވަރު ރަނގަޅު ގެސްޓްހައުސްގެ ގޮތުގައި އޯޝަން ގްރޭންޑް ހޮވުނީ އެ ދަތިތަކާ އެކު ވެސް މަތީ ފަންތީގެ ހިދުމަތްތަކެއް ދެވޭތީ އެވެ. ދުނިޔޭގެ އެކި ކަންކޮޅުތަކުން އަންނަ މީހުންނަށް ކަމުދާނެ ރަހަ މީރު ކާއެއްޗެހި ފޯރުކޮށްދިނުން ފަދަ ކަންކަމުން ފެށިގެން އެންމެ އާދައިގެ ކަންތައްތައް ވެސް ވީހާ ވެސް ގާތުން ބަލަހައްޓާތީ އެވެ. ގެސްޓުންނަށް ދޭ ހިދުމަތް ވީ އެންމެ ރަނގަޅަކަށް، އަބަދުވެސް އެއް ފެންވަރެއްގައި ބަހައްޓަން ހާއްސަ ސަމާލުކަމެއް ދޭތީ އެވެ.

އޯޝަން ގްރޭންޑުގެ އަމާޒަކީ އެކަން އެ ގޮތުގައި ކުރިއަށް އޮތް ތާނގައި ވެސް ދެމެހެއްޓުމެވެ. މަތީ ފަންތީގެ ރިސޯޓްތަކުން ލިބޭ ހުރިހާ ވަސީލަތްތަކެއް ނެތަސް، އެފަދަ ރިސޯޓުތަކުން ދޭ ހިދުމަތާ ދާދި އެއް ފެންވަރެއްގެ ހިދުމަތްތަކެއް ގެސްޓުންނަށް ފޯރުކޮށްދިނުމެވެ. ވޯލްޑްސް ބެސްޓް ލަގްޒަރީ ގެސްޓްހައުސް އެވޯޑުން އެކަން ވަރަށް ރަނގަޅަށް ސާބިތުވެ އެވެ.