އައްޑޫ މީދޫގެ ފުރަތަމަ ޓޫރިސްޓް ހޮޓާ ހުޅުވައިފި

އައްޑޫ ސިޓީ މީދޫގެ ފުރަތަމަ ޓޫރިސްޓް ހޮޓާ ހުޅުވައިފި އެވެ.

މި ހޮޓާ ހުޅުއްވައިދެއްވީ ޓޫރިޒަމް މިނިސްޓަރު ޑރ. އަބްދުﷲ މައުސޫމެވެ. ހޮޓާ ހުޅުއްވައި ދެއްވުމަށްފަހު މިނިސްޓަރު ވަނީ އެ ސަރަހައްދުގައި ހުރި "ޓޫރިސްޓް އެޓްރެކްޝަންތައް" ބައްލަވައިފަ އެވެ.

މިނިސްޓަރު އިއްޔެ ކުރެއްވި ޓްވީޓެއްގައި ވިދާޅުވީ މީދުއަކީ ކުރިއަށް އޮތްތާނގައި ޓޫރިޒަމް ދާއިރާއިން ގިނަ ފުރުސަތުތައް އޮތް ރަށެއް ކަމަށެވެ.

"ޒެން"ގެ ނަމުގައި ހުޅުވި މި ޓޫރިސްޓް ހޮޓާ އައްޑޫ ގިނަ ބައެއްގެ މެދުގައި މަގުބޫލުވެފައިވަނީ އެ ހޮޓަލުގައި އޮތް ސްވިމިން ޕޫލުގެ ސަބަބުންނެވެ. ޕޫލަށް އެރެން އައްޑޫގެ އެކި ރަށްރަށުން މީހުން ދާ ކަމަށް އެ ހޮޓަލުގެ ވެރިޔާ އަބްދުﷲ ރާފިއު ވިދާޅުވި އެވެ.

ރާފިއު ވިދާޅުވީ ކަނެކްޓިވިޓީގެ މައްސަލަތަކާ ގުޅިގެން މި ދުވަސްވަރު ހޮޓަލުގެ ބުކިންތައް ކެންސަލްވާ ކަމަށެވެ. ނަމަވެސް ދިވެހިންގެ ބުކިންތައް ފުލްކޮށް އުޅޭ ކަމަށާއި، ބޭރުން އަންނަ ޓޫރިސްޓުންގެ ބުކިންތައް ރަނގަޅުވާނީ އައްޑު އަށް އިންޓަނޭޝަނަލް ދަތުރުތައް ފެށުމުން ކަމަށް އޭނާ ވިދާޅުވި އެވެ.

"ޓޫރިސްޓުން ރާއްޖެ އަންނަނީ ދެތިން ދުވަހަށް. މާލެއިން އައްޑު އަށް ދާން އެބަ ނަގާ ދުވަހެއްހާ ވަގުތު. އެހެންވީމަ ބުކިންތައް އެބަ ކެންސަލްވޭ. އެކަމަކު މިހާރު ވެސް އައްޑޫ މީހުން ފުލްކޮށް ހަމަ އުޅެނީ،" ރާފިއު ވިދާޅުވި އެވެ.

މި ހޮޓަލުގައި ދިހަ ކޮޓަރި ހުންނައިރު ބައެއް ކޮޓަރިތަކުން ކަނޑުގެ ރީތި މަންޒަރުތައް ފެންނާނެ އެވެ. އަދި އެ ހޮޓަލުގެ އެންމެ ބޮޑު ސުއީޓުގައި ޖަކޫޒީއެއް ވެސް ވަނީ ބަހައްޓައިފައި ހުރި އިރު ހޮޓަލުގައި ރޫފްޓޮޕް ރެސްޓޯރެންޓެއް ވެސް ހުންނާނެ އެވެ.

މީގެ އިތުރުން މި ހޮޓަލަކީ މީހުން ދިރިއުޅޭ ސަރަހައްދާ ދުރުގައި ހުންނަ ތަނަކަށްވުމުން ގެސްޓުންނަށް ފުރިހަމަ ޕްރައިވެސީ ލިބޭނެ ކަމަށް ރާފިއު ވިދާޅުވި އެވެ. އަދި އެ ސަރަހައްދުގައި ހުރި ޓޫރިސްޓު އެޓްރޭކްޝަންތައް ބަލާލަން ބޭނުންވާ މީހުންނަށް އެ ފުރުސަތު ވެސް ލިބޭނެ ކަމަށް އޭނާ ވިދާޅުވި އެވެ.

ރާފިއު ވިދާޅުވިގޮތުގައި މި ހޮޓާ ހެދުމަށް އަށް މިލިއަން ރުފިޔާ ހޭދަވި އެވެ.