ހިޔާ ފްލެޓްތަކުގައި ހަރުކުރާނީ ސްމާޓް މީޓަރު: މުގުނީ

ހުޅުމާލޭ ދެވަނަ ފިޔަވަހީގައި ހަދާފައިވާ 7،000 ފްލެޓުގައި ސްޓެލްކޯ އިން އިންސްޓޯލްކުރާނީ ސްމާޓް މީޓަރު ކަމަށް ސްޓެލްކޯގެ މެނޭޖިން ޑިރެކްޓަރު ހަސަން މުގުނީ ވިދާޅުވެއްޖެ އެވެ.

ޕައިލެޓް ޕްރޮޖެކްޓެއްގެ ގޮތުގައި ހިޔާ ފްލެޓްތަކުގައި ސްމާޓު މީޓަރު ބަހައްޓާ އިރު އެ ފްލެޓްތަކަށް ކަރަންޓު ލުމުގެ މަސައްކަތް އެޗްޑީސީން ހަވާލުކޮށްފައިވަނީ ޗައިނާ ކުންފުންޏަކަށެވެ. ކަރަންޓު ލުމުގެ މަަސައްކަތް އެ ކުންފުނިން ކުރި ނަމަވެސް ކަރަންޓު މީޓަރު ބަހައްޓާ ހިސާބަށް މަސައްކަތް ދިއުމުން ސްޓެލްކޯ އިން ގޮސް މީޓަރުތައް އިންސްޓޯލްކުރާނެ އެވެ.

ހިޔާ މަޝްރޫއުގެ ދަށުން ހުޅުމާލެ ދެވަނަ ފިޔަވަހީގައި 25 ބުރީގެ 16 އިމާރާތް ހަދާފައިވެ އެވެ. މި އިމާރާތްތަކަށް މިހާރު ވަނީ ފެން ގުޅައިފަ އެވެ.

"ސްމާޓު މީޓަރުން ރިއަލް ޓައިމްގައި ކޮންމެ ކަސްޓަމަރަކަށް ވެސް މައުލޫމާތު ބަލައިލެވޭނެ. ކަރަންޓު ބޭނުންކުރާ މިންވަރާއި އަމިއްލައަށް ކަނޑައަޅާ ލިމިޓަށް ވުރެ އިތުރުވަންޏާ ވެސް އެނގޭނެ،" މުގުނީ ވިދާޅުވި އެވެ.

ސްޓެލްކޯއިން މިހާރު ކުރިއަށް ކުރަނީ ހުޅުމާލޭ ފުރަތަމަ ފިޔަވަހިން ދެވަނަ ފިޔަވައްސަށް ކަރަންޓް ގުޅައިލުމުގެ މަސައްކަތެވެ. އެ މަސައްކަތް މާޗް މަހަށް ނިންމާލެވޭނެ ކަމަށް މުގުނީ ވިދާޅުވި އެވެ.

ވަކި ވަރަކަށް ކަރަންޓް ބޭނުން ކުރުމުން ކަސްޓަމަރަށް އެނގޭނެ ގޮތް ހެދުމުގެ އިތުރުން ކަރަންޓު ހޭދަވާ ވަރު ކޮންމެ ވަގުތެއްގައި ވެސް އެޕްލިކޭޝަނެއް މެދުވެރިކޮށް ބަލައިލުމަކީ ސްމާޓް މީޓަރުން ކުރެވޭނެ ކަންކަމެވެ.