މަގުމަތީ ނިދާ މީހުންގެ ފޮޓޯ ފޭކް ކަމަށް ވިދާޅުވުމުން ގޮވާލީ ޝިފާ އިސްތިއުފާއަށް

މާލޭގެ އުތުރު ފަރާތު ބަނދަރުގެ ކަނޑިންމަ ފައިކަށިމަތީ، ފޮށިގަނޑުތަކެއް އަޅައިގެން ތިބި ބައެއްގެ ފޮޓޯ އަކީ ފޭކެއް ކަމަށް ދޭހަވާ ގޮތަށް، މާލޭގެ މޭޔަރު ޝިފާ މުހައްމަދު ޓްވީޓްކުރެއްވުމުން ގިނަ ބަޔަކު އެކަމަށް ފާޑުކިޔަން ފަށައިފި އެވެ.

ޝިފާ ޓެގްކޮށް، މީހަކު ސޯޝަލް މީޑިއާއަށް ދޫކޮށްލި ފޮޓޯތަކުގައި ފެންނަނީ ހަތަރު ޒުވާނަކު ނިދާފައި ތިއްބަ އެވެ. ގެންގުޅޭ ސާމާނުތަކާ އެކު އެ މީހުން، ނިދާފައި ތިބި މި ފޮޓޯތައް ގިނަ މީހުން ސިފަކުރީ، ބޯހިޔާވަހިކަން ނެތި ގިނަ ދިވެހިން، ބިކަވެފައިވާ ކަމުގެ "ބޮޑު މަންޒަރު" ފެންނަ ފޮޓޯތަކެއްގެ ގޮތުގަ އެވެ.

އެކަމަކު މޭޔަރު ވިދާޅުވި ގޮތުގައި "މާގިނަ ސާމާނުތައް ހިފައިގެން ގޮސް ނިދާފައި ތިބީމައި މާ އޯވާ އެބަ ވެ" އެވެ.

"ތަންކޮޅެއް ޖެނުއިން [ހަގީގީ] ފޮޓޯއެއް ލަމާ،" އޭނާ ވިދާޅުވި އެވެ.

ޝިފާގެ މި ރައްދު ގިނަ މީހުންނަކަށް ކަމަކު ނުދިޔަ އެވެ. މޭޔަރުގެ ބަސްމަގު މިހެން ހުރެގެން ނުވާނެ ކަމާއި މި ފަދަ ސީރިއަސް މައްސަލަތަކުގައި މި ފަދަ ޖަވާބު ދޭން ނުވާނެ ކަމަށް ބުނެ އޭނާގެ އިސްތިއުފާއަށް ގޮވި އެވެ.

ރައްޔިތުންގެ މަޖިލީހުގެ ވިލިމާލޭ ދާއިރާގެ މެމްބަރު އަހުމަދު އުޝާމް ވިދާޅުވީ އިތުރު ގެއްލުން ދިނުމުގެ ކުރިން ޝިފާގެ އިތުބާރު ނެތް ކަމުގެ ވޯޓު ނެގުމަކީ ދެން ތިއްބެވި ކައުންސިލަރުންގެ މައްޗަށް މިހާރު ޒިންމާއެއް ކަމަށެވެ. އަދި މިއީ ލަދުގަންނަން ޖެހޭ ކަމެއް ކަމަށް ވެސް ވިދާޅުވި އެވެ.

"ހަމަ މިހާރު އިސްތިއުފާ ދެއްވާ،" އޭނާ ވިދާޅުވި އެވެ.

ޝިފާއަށް ފާޑުކީ އެހެން މީހަކު ބުނީ މަސައްކަތު ފަންތީގެ ރައްޔިތުންނާއި މެދު ވިސްނުން ބަހައްޓާގޮތް ވަރަށް ދެރަކަމަށާއި ކޮވިޑަށް ފަހު އެތަކެއް ރައްޔިތުންނެއް ހާލުގައި ޖެހިފައިވާ ކަމަށެވެ. އަދި ރައްޔިތުން އުޅޭ ނިކަމެތި ކަމަށް ޖޯކް ޖަހަނީ ތޯ ވެސް މީހަކު ސުވާލު ކުރި އެވެ.

ފޮޓޯތައް ފޭކް ކަމަށް ޝިފާ ސިފަކުރެއްވި ނަމަވެސް މިއީ އަސްލު ފޮޓޯތަކެއް ކަމުގެ ޔަގީންކަން ލިބިފައިވާ ކަމަށް ވެސް ބައެއް މީހުން ބުނެފައިވެ އެވެ.

މާލޭގައި ފަހަކަށް އައިސް، ސަލާން ޖަހާ މީހުންނާއި ބޯހިޔާވަހިކަމެއް ނެތި މަގުމަތީގައި ނިދާ މީހުން ވަނީ ގިނަވެފަ އެވެ. ކޮވިޑް-19ގެ ސަބަބުން އަތްމަތި ދަތިވެ، ސަލާން ޖަހާ މީހުން ގިނަވި ނަމަވެސް، ކަމާ ބެހޭ އިދާރާތްތަކުން ބުނާގޮތުން މިގޮތަށް މަގުމަތީގައި ގިނައިން ނިދާ އުޅެނީ މަސްތުވާތަކެއްޗަށް ދެވިހިފާފައި ތިބޭ މީހުންނެވެ.