އެމްޓީޑީސީ އަށް މިދިޔަ އަހަރު 50.9 މިލިއަން ރުފިޔާގެ ފައިދާ

އެމްޓީޑީސީ އަށް މިދިޔަ އަހަރު 50.9 މިލިއަން ރުފިޔާގެ ފައިދާއެއް ލިބިއްޖެ އެވެ.

އެމްޓީޑީސީން އާންމުކޮށްފައިވާ ޕްރެސް ރިލީސްގައި ބުނީ މިއީ 2019 ވަނަ އަހަރަށް ވުރެ 115 ޕަސެންޓް ބޮޑު ފައިދާއެއް ކަމަށެވެ. އެމްޓީޑީސީން ބުނީ މިއީ ޓެކްސް ނުލާ އެންމެ ބޮޑު ފައިދާއެއް ލިބުނު އަހަރު ކަމަށެވެ.

އެމްޓީޑީސީ އަށް ފައިދާ ލިބުނު އިރު އެ ކުންފުނިން، އެކި ރަށްރަށުގެ ކުލީގެ ގޮތުގައި ދައްކަން ޖެހޭ 13 މިލިއަން ޑޮލަރު ދެއްކުން މިދިޔަ އަހަރު އަހަރު ވަނީ ތިން އަހަރަށް ފަސް ވެސް ކޮށްފަ އެވެ.

މިދިޔަ އަހަރަކީ 11 އަހަރަށް ފަހު އެ ކުންފުނިން ހިއްސާގެ ފައިދާ ބެހި އަހަރެވެ. ހިއްސާގެ ފައިދާގެ ގޮތުގައި ހިއްސާއަކަށް 50 ލާރި ބެހުމަށް ވަނީ ނިންމައިފަ އެވެ.

އެމްޓީޑީސީން އެންމެ ފުރަތަމަ ހިއްސާ ވިއްކަން ފަށާފައިވަނީ 2007 ވަނަ އަހަރު އެވެ. އެ އަހަރުން ފެށިގެން 2014 ވަނަ އަހަރާ ހަމައަށް ހިއްސާއެއް ވިއްކަމުން އައީ 100ރ. އަށެވެ. ނަމަވެސް 2014 ވަނަ އަހަރުން ފެށިގެން ހިއްސާއެއްގެ މޫނުމަތީ އަގު 10ރ. އަށް ވަނީ ބަދަލުކޮށްފަ އެވެ.