ޗެމްޕިއަންސް ލީގަށްވުރެ ޕްރިމިއާ ލީގު މުހިންމު: ގާޑިއޯލާ

މެންޗެސްޓާ (8 މެއި) - ޔޫއެފާ ޗެމްޕިއަންސް ލީގު ކާމިޔާބު ކުރުމަށް ވުރެ، ޕްރިމިއާ ލީގު ކާމިޔާބު ކުރުން މުހިންމު ކަމަށް މެންޗެސްޓާ ސިޓީގެ ކޯޗް ޕެޕް ގާޑިއޯލާ ބުނެފި އެވެ.

މި ސީޒަންގައި އެ ދެ މުބާރާތް ކާމިޔާބު ކުރުމުގެ ފުރުސަތު ވެސް ސިޓީއަށް އެބައޮތެވެ. ޗެމްޕިއަންސް ލީގުގެ ފައިނަލަށް ސިޓީ ފުރަތަމަ ފަހަރަށް ދަތުރު ކޮށްފަ އެވެ. މި މަހު 29 ގައި ކުޅޭ ފައިނަލުގައި އެ ޓީމާ ދެކޮޅަށް ނުކުންނަ ޗެލްސީ އާ ދެކޮޅަށް، ޕްރިމިއާ ލީގުގައި މިއަދު އިއްތިހާދު ސްޓޭޑިއަމްގައި ކުޅޭ މެޗުން މޮޅުވެ ލީގު ޗެމްޕިއަންކަން ސިޓީއަށް ހޯދޭނެ އެވެ.

"އަބަދުވެސް އަހަރެން ބުނަމުން މި އަންނަނީ ޕްރިމިއާ ލީގޭ އެންމެ މުހިންމު ތައްޓަކީ،" މިއަދުގެ ކުޅޭ މެޗުގެ ކުރިން ވާހަކަ ދައްކަމުން ގާޑިއޯލާ ބުންޏެވެ. "ކްލަބަށް މާލީ ގޮތުން ފައިދާވާ މުބާރާތަކަށް ޗެމްޕިއަންސް ލީގު ވާތީ ޗެމްޕިއަންސް ލީގު އެގޮތުން މުހިންމު ވެދާނެ."

ބާސެލޯނާއަށް ޗެމްޕިއަންސް ލީގު ދެ ފަހަރު ހޯދައިދިން ކޯޗް ބުނީ، އެ މުބާރާތަކީ ހާއްސަ މުބާރާތެއް ކަމަށެވެ. ނަމަވެސް މުޅި ސީޒަންގައި އެއްވަރެއްގައި ޓީމު ފެންވަރު ދެމެހެއްޓޭކަން ސާބިތު ކުރެވޭނީ ލީގު ކާމިޔާބު ކޮށްގެން ކަމަށް އޭނާ ބުންޏެވެ.

"ޗެމްޕިއަންސް ލީގުގެ ފައިނަލަކާ މެދު އަހަރެމެން އެއްވެސް ވަރަކަށް ނުވިސްނަން. ސަބަބަކީ ޕްރިމިއާ ލީގު އަދިވެސް އަހަރެމެންނަކަށް ނުލިބޭ،" ގާޑިއޯލާ ބުންޏެވެ. "މިއަދުގެ މެޗުން އަހަރެމެންނަށް ލީގު ލިބުމުން ދެން އަހަރެމެން ވިސްނާނީ ޗެމްޕިއަންސް ލީގާ މެދު."

ސިޓީ އާއި ޗެލްސީ ކުޅޭ މެޗު ފަށާނީ މިރޭ ރާއްޖޭ ގަޑިން 9:30 ގަ އެވެ. ސިޓީއަށް ބާކ އޮތީ ހަތަރު މެޗެވެ. ހަތަރު މެޗު ދެ ޕޮއިންޓް ހޯދިޔަސް އެ ޓީމަށް ލީގު ލިބިގެންދާނެ އެވެ.