ބޯހިޔާވަހިކަމާ ގުޅޭގޮތުން ސިޓީ ކައުންސިލުން މާލޭގެ ރައްޔިތުންނާ މިރޭ ބައްދަލުކުރަނީ

ބޯހިޔާވަހިކަމުގެ މައްސަލައާ ގުޅޭގޮތުން ސިޓީ ކައުންސިލުން މާލޭގެ ރައްޔިތުންނާ މިރޭ ބައްދަލުކުރަން ނިންމައިފި އެވެ.

ސިޓީ ކައުންސިލުން އިއްޔެ ބޭއްވި ނިއުސް ކޮންފަރެންސްގައި މޭޔަރު ޑރ. މުހައްމަދު މުއިއްޒު ވިދާޅުވީ ފާއިތުވި ތިން ހަފުތާގެ ތެރޭގައި މާލެ، ހުޅުމާލެ އަދި ވިލިމާލޭގެ ރައްޔިތުންނާ ބައްދަލުކޮށްފައިވާ ކަމަށެވެ. އެ ކޮންމެ ސަރަހައްދެއްގެ ރައްޔިތުންނާ ވަކިން ބައްދަލުކޮށް ތަރައްގީގެ ޕްލޭނާއި މާލޭގެ ލޭންޑު ޔޫސް ޕްލޭން ހެދުމުގައި ހިޔާލު ހޯދާފައިވާ ކަމަށް އޭނާ ވިދާޅުވި އެވެ.

އެ ސިލްސިލާގެ އެންމެ ފަހު ބައްދަލުވުން އޮންނާނީ ކާނިވަލުގައި މިރޭ 8:15 ގަ އެވެ.

މުއިއްޒު ވިދާޅުވީ އެ ބައްދަލުވުން ހާއްސަކޮށްފައި ވަނީ ގެދޮރުވެރިކުރުމުގެ ކަންކަމަށެވެ. އެ ބައްދަލުވުމުގައި ރައްޔިތުން ހުށަހަޅާ ކަންކަން ހައްލުކޮށް ނަތީޖާ ނެރެދިނުމަށް މަސައްކަތްކުރައްވާނެ ކަމަށް މޭޔަރު ވިދާޅުވި އެވެ.

ރައްޔިތުންނާ ބައްދަލުކުރަން މީގެ ކުރިން ބޭއްވި ބައްދަލުވުންތަކަށްފަހު މުއިއްޒު ވިދާޅުވީ ކައުންސިލްގެ މަސައްކަތްތައް ކުރުމަށް ސަރުކާރުގެ އެއްބާރުލުމެއް ނުލިބޭ ކަމަށެވެ. އޭގެ ބަދަލުގައި ކުރާ ކަމަކީ ކުންފުނިތައް މެދުވެރިކޮށް ޖެއްސުންކުރުން ކަމަށް އޭނާ ވިދާޅުވެ އެވެ.

"ސަރުކާރުގެ ކިބައިން މި ފެނިގެންދަނީ ޖުމްލަ ގޮތެއްގައި އެއްބާރުލުން ކައުންސިލަށް ނުދޭތަން. ކައުންސިލަށް ސަރުކާރުގެ ކުންފުނިތައް މެދުވެރިކޮށް، ހާއްސަގޮތެއްގައި ޖެއްސުންކުރާތަން. ވަރަށް ހިތާމަކުރަން،" މިދިޔަ ހަފުތާގެ އަންގާރަ ދުވަހު ބޭއްވި ރަސްމިއްޔާތުގައި މުއިއްޒު ވިދާޅުވި އެވެ.