ކުންފުންޏާ ބެހޭ އާ ގާނޫނެއް އެކުލަވާލައި އާއްމުންގެ ހިޔާލު ހޯދަނީ

މިހާރު އަމަލު ކުރަމުން އަންނަ ކުންފުންޏާ ބެހޭ ގާނޫނު އުވައިލަން ނިންމައި، އާ ގާނޫނެއް އެކުލަވައިލައި އެ އަށް އާއްމުންގެ ހިޔާލު ހޯދަން އިކޮނޮމިކް މިނިސްޓްރީން އިއްޔެ ހުޅުވާލައިފި އެވެ.

އެ މިނިސްޓްރީން ބުނީ މިހާރު އަމަލު ކުރަނީ 25 އަހަރު ވެފައިވާ ގާނޫނަކަށް ކަމަށް ވުމުން، އެ ގާނޫނަށް ބަދަލު ގެންނަން ޖެހިފައިވާ ކަމަށެވެ.

އާ ގާނޫނެއް ފާސްކުރުމުގެ މަރުހަލާ އަށް ދިވެހި ސަރުކާރުން ދަތުރުކުރާއިރު، ކުރިއަރާފައިވާ ގައުމުތަކުން ވެސް ކުންފުނިތަކުގެ ގާނޫނަށް ޒަމާނީ ބަދަލުތައް ގެނެސް، އިންވެސްޓްމެންޓުތަކަށް ފަހި، ދެފުށް ފެންނަ މިންގަނޑުތައް ހިޔާރު ކޮށްފައިވާ ކަމަށް އިކޮނޮމިކް މިނިސްޓްރީން ބުންޏެވެ.

އާ ގާނޫނުގެ ސަބަބުން، ވިޔަފާރިތަކަށް ފަހި މާހައުލެއް އޮތް ގައުމުތަކުގެ ރޭންކިންގައި ކުރިއަށް ދިއުމަށް ރާއްޖެ އަށް އޮތް ހުރަސްތައް ނައްތާލައި، ކުންފުނި އުފެއްދުމާއި ހިންގުމާއި އުވައިލުމުގެ ކަންކަމުގައި މިހާރު ދިމާވާ ދަތިތަކަށް ހައްލުތަކެއް ހޯދޭނެ ކަމަށް އެ މިނިސްޓްރީން ބުނެ އެވެ.

މި ގާނޫނުގެ ދަށުން ގެންނަ އިސްލާހުތައް:

- ޕްރައިވެޓް ކުންފުންޏެއް އުފެއްދުމަށް މަދުވެގެން ދެ ހިއްސާދާރުން ތިބުމަށް އޮންނަ ޝަރުތު އުވާލައި، ސިންގަލް ޝެއާހޯލްޑަ ކުންފުނި އުފެއްދުމަށް މަގުފަހި ކުރުން.

- ޕަބްލިކް ކުންފުންޏެއް އުފައްދާއިރު މަދުވެގެން 10 ހިއްސާދާރުން ނުވަތަ ޕްރޮމޯޓަރުން ތިބެން އޮންނަ ޝަރުތު އުވާލައި، ސިންގަލް ޝެއާހޯލްޑަ ކުންފުނި އުފެއްދުމަށް މަގުފަހި ކުރުން. މި އޮނިގަނޑުގެ ދަށުން ހިންގާ ވިޔަފާރިތަކާއި އިންވެސްޓްމަންޓަށް ހާއްސަ ކުންފުނިތައް ރެގިއުލޭޓް ކުރުމާއި ސެކިއުރިޓީޒް ދޫކުރުމުގައި އަމަލުކުރަންޖެހޭ ގަވާއިދުތައް ހަދައި ހިންގުމުގެ ބާރު މާލީ ސެކިއުރިޓީޒްއާ ބެހޭ ގާނޫނު ތަންފީޒުކުރާ ފަރާތައް މަތި ކުރުން.

- ކުންފުނީގެ ޑިރެކްޓަރަކަށް ވެވޭނީ ހިއްސާދާރަކަށް ކަމަށް އޮންނަ ޝަރުތު އުނިކުރުން. އަދި ކުންފުންޏަކަށް އިންވެސްޓްކުރާ ކޮންމެ ހިއްސާދާރެއް ޑިރެކްޓަރުންގެ ބޯޑުގައި ހުންނަން ލާޒިމުނުކޮށް، ހިއްސާދާރުންގެ ފަރާތުން ކުންފުނި ހިންގުމަށް ޕްރޮފެޝަނަލް ޑިރެކްޓަރުން އައްޔަންކުރަން ފުރުސަތު ފަހިކޮށްދިނުން.

- ޕްރައިވެޓް ކުންފުންޏެއްގައި ސެކްރެޓަރީއެއް ހުރުމަށް އޮންނަ ޝަރުތު އުނިކުރުން.

- ޕްރައިވެޓް ކުންފުނީގެ ހިންގާ ގަވާއިދުގެ "މޮޑެލް ހިންގާ ގަވާއިދެއް"، ގާނޫނުގެ ދަށުން ގަވާއިދަކުން ކަނޑައަޅައި، ކުންފުނިތަކަށް އެ ގަވާއިދު އިހުތިޔާރު ކުރުމަށް ފުރުސަތު ދީ، ކުންފުނި އުފައްދާއިރާއި އޭގެ ފަހުން ވެސް، ވަކިން ހިންގާ ގަވާއިދެއް ކުންފުނިން ލިޔެ ހުށަހެޅުމަށް ލާޒިމްކޮށްފައި އޮންނަ އޮތުން އުނިކުރުން.

- ކުންފުނީގެ އަސާސީ ގަވާއިދުގައި ކުންފުނީގެ "މަގުސަދު" ތަކުގެ ގޮތުގައި ވަކި ކަންކަން ކަނޑައެޅުމާއި ކުންފުނީގެ ސިއްކައަކީ އިހުތިޔާރީ ކަމެއްގެ ގޮތުގައި ކަނޑައެޅުން.

- ކުންފުނީގެ އަހަރީ ފީ އުވާލައި، ކުންފުނީގެ ފަރާތުން މިނިސްޓްރީން ހޯދާ ހިދުމަތްތަކަށް ފީ ނެގުން.

- ޕްރޮފެޝަނަލް ޑިރެކްޓަރުންނަށް ފުރުސަތު އޮންނަ ގޮތަށް ބަދަލު ގެނެސް، މެންބަރުންގެ އިންވެސްޓްމަންޓް ހިމާޔަތް ކުރުމަށްޓަކައި، ކުންފުނީގެ މެންބަރުންގެ ހައްގުތަކާއި ބާރުތައް ކަނޑައަޅައި ބަޔާންކުރުން.

- ޗެއާޕާސަންގެ ޒިންމާ ކަނޑައަޅައި، ކުންފުނީގެ ޑިރެކްޓަރުންގެ ޝަރުތުތަކާއި ބާރުތަކާއި މަސްއޫލިއްޔަތުތައް ކަނޑައަޅައި ބަޔާންކުރުން.

- ކުންފުނީގެ ހިއްސާގެ މިލްކުވެރި ފަރާތުގެ ގޮތުގައި މެންބަރުންގެ ދަފްތަރުގައި ބަޔާންކުރާ މެންބަރަކީ ފަރުދެއް ނޫން ނަމަ، އެ ހިއްސާއެއްގެ ބެނެފިޝަލް އޯނަރުގެ މައުލޫމާތު ކުންފުންޏަށް އަންގައި، ކުންފުނީގައި ރަޖިސްޓަރީ ކުރުން.

- ފޮރިން އިންވެސްޓަމަންޓް ކުންފުނިތަކާއި ސަރުކާރުގެ ކުންފުނިތަކުގެ ގާނޫނީ ނިޒާމު އިތުރަށް ހަރުދަނާކުރުން.

މި ގާނޫނަށް ހިޔާލު ހުށަހެޅޭނީ މި މަހުގެ 12 ވަނަ ދުވަހުގެ ކުރިންނެވެ. މިނިސްޓްރީގެ މެއިލް [email protected] މެދުވެރިކޮށް ހިޔާލު ހުށަހެޅޭނެ އެވެ.