ފުރަތަމަ ފަހަރަށް ބޭރުގެ ޔުނިވާސިޓީއެއްގައި ދިވެހި ބަސް ކިޔަވައި ދެނީ

ޗައިނާގެ ބެއިޖީންގެ ފޮރިން ސްޓަޑީޒް ޔުނިވާސިޓީ (ބީއެފްއެސްޔޫ) ގައި ދިވެހި ބަހުގެ ކޯހެއް ކިޔަވައި ދޭން ފަށައިފި އެވެ.

މިއީ އެހެން ގައުމެއްގެ ޔުނިވާސިޓީއެއްގައި ދިވެހި ބަހުގެ ކޯހެއް ރަސްމީކޮށް ހިންގާ ފުރަތަމަ ފަހަރެވެ.

ދިވެހި ކޯސް ފެށުމުގެ ގޮތުން ބީއެފްއެސްޔޫގައި އިއްޔެ ބޭއްވި ހަފުލާއެއްގައި އެ ޔުނިވާސިޓީގެ އިސް ބޭފުޅުންނާއި ޗައިނާގައި ހުންނަ ރާއްޖޭގެ އެމްބަސީގެ އޮފިޝަލުން ބައިވެރިވެވަޑައިގަތެވެ.

އެ ރަސްމިއްޔާތުގައި ވާހަކަ ދައްކަވަމުން ބީއެފްއެސްޔޫގެ ސްޓޭންޑިން ކޮމިޓީގެ މެންބަރު ޒައު ގެންގް ވިދާޅުވީ، ދިވެހި ބަހަކީ ރާއްޖޭގެ ދިގު ތާރީހާއި ސަގާފަތާ ގުޅިފައި އޮންނަ ބަހެއް ކަމަށާއި އެ ކޯހުގެ ސަބަބުން ޗައިނާގެ ޒުވާން ޖީލަށް ދިވެހި ތާރީހާއި ސަގާފަތް ދަސްވާނެ ކަމަށެވެ.

ޗައިނާގައި ހުންނަވާ ރާއްޖޭގެ ޑެޕިއުޓީ އެމްބެސެޑަރު ސޮބާހު ރަޝީދު ވިދާޅުވީ، މިއީ ތާރީހުގައި ވެސް ބައިނަލްއަގްވާމީ ޔުނިވާސިޓީއެއްގައި ދިވެހި ބަސް ކިޔަވައި ދޭ ފުރަތަމަ ފަހަރު ކަމަށާއި ރާއްޖެ އާއި ޗައިނާ ދެމެދު އޮންނަ ގާތް ގުޅުން ދައްކުވައިދޭ ހެއްކެއް ކަމަށެވެ.

ރާއްޖެ އާއި ޗައިނާ ދެމެދު ސިޔާސީ ގުޅުން 1972 ވަނަ އަހަރުން ފެށިގެން ބާއްވަމުން އަންނައިރު، ކޮވިޑް-19 ގެ ކުރިން ރާއްޖެ އަށް އެންމެ ގިނަ ޓޫރިސްޓުން ވެސް އަންނަނީ ޗައިނާ އިންނެވެ. އަދި ކުރީގެ ރައީސް އަބްދުﷲ ޔާމީންގެ ސަރުކާރުން އެ ގައުމާއެކު ވަރަށް ގާތް ގުޅުމެއް ބާއްވައި، ރާއްޖޭގައި ހިންގާ ބޮޑެތި އެތައް މަޝްރޫއެއް ހަވާލު ކޮށްފައި ވަނީ ވެސް ޗައިނާއާ އެވެ.