ރެޑް ލިސްޓުން ނެގުމާ އެކު ޔޫކޭގައި ރާއްޖެއަށް ޑިމާންޑް ބޮޑުވެއްޖެ

އިނގިރޭސި ވިލާތުގެ ރެޑް ލިސްޓުން ރާއްޖެ ނެގުމާ އެކު އެ ގައުމުގެ ޓޫރިސްޓުންގެ މެދުގައި ރާއްޖެއަށް އޮތް ޑިމާންޑު އިތުރުވެއްޖެ އެވެ.

އެ ގައުމުގެ ނޫސްތަކުން ރިޕޯޓު ކޮށްފައިވާ ގޮތުގައި މިދިޔަ ހުކުރު ދުވަހު ޓްރެވަލް ލިސްޓަށް ގެނައި ބަދަލުތަކާ އެކު އެ ގައުމުގެ ޓްރެވަލް ސައިޓުތަކަށް ވަނީ ބާރު ބޮޑުވެފަ އެވެ. އެންމެ ގިނަ ބަޔަކު ކުރިއަށް އޮތް މަސްތަކުގައި ދަތުރުކުރަން ބޭނުންވަނީ ރާއްޖެ އާއި ސްރީ ލަންކާ އަދި މެކްސިކޯއަށް ކަމަށް ވަނީ ބުނެފަ އެވެ.

އެ ގައުމުގެ އެންމެ ބޮޑު އެއް ޓްރެވަލް ސައިޓު ކަމަށްވާ ސްކައި ސްކޭނާ އިން ބުނެފައިވާ ގޮތުގައި މިދިޔަ ހަފުތާގައި އެކަނި ވެސް ޓޫރިސްޓުންގެ ޑިމާންޑު 95 ޕަސެންޓަށް ވަނީ އިތުރުވެފަ އެވެ. މިހާ ބޮޑު ތަފާތެއް އައީ ކޮވިޑް-19ގެ ވެކްސިންގެ ދެ ޑޯޒު ފުރިހަމަ ކޮށްފައިވާ މީހުން ކޮވިޑަށް ޕީސީއާރް ޓެސްޓު ހަދަން ނުޖެހޭ ގޮތަށް އިނގިރޭސިވިލާތުގެ ސަރުކާރުން ނިންމުމުން ކަމަށް ވަނީ ބެލެވިފަ އެވެ. އަދި ރެޑް ލިސްޓުން އެމްބާ ލިސްޓަށް ލީ ގައުމުތަކަށް ދިއުމަށް ފަހު އެނބުރި އިނގިރޭސި ވިލާތަށް ދާއިރު ހޮޓަލުގައި އަމިއްލަ ހަރަދުގައި ކަރަންޓީނު ފުރިހަމަކުރަން ޖެހުމުގެ ބަދަލުގައި އަމިއްލަ ގޭގައި ކަރަންޓީނު ވެވޭނެ އެވެ.

ޓްރެވަލް ވެބްސައިޓް އެކްސްޕީޑިއާ އިން ބުނި ގޮތުގައި އިނގިރޭސިވިލާތުގެ ޓޫރިސްޓުންގެ މެދުގައި ރާއްޖެއަށް އޮތް ޑިމާންޑު އެ ވެބްސައިޓުގައި ވަނީ 30 ޕަސެންޓް އިތުރުވެފަ އެވެ.

ކުރިއަށް އޮތީ އިނގިރޭސިވިލާތުގެ ފިނި މޫސުމުވެ. މި މޫސުމުގައި އެ ގައުމުން ދަތުރުކުރާ މީހުންގެ އަދަދު ކޮންމެ އަހަރަކު ވެސް އިތުރުވެ އެވެ.

އިނގިރޭސިވިލާތުގެ އެންމެ ފަހުގެ ރިވިއުގައި ރާއްޖެ ހިމަނާފައިވަނީ "އެމްބާ" ލިސްޓުގަ އެވެ. މިގެނައި ބަދަލާ އެކު ރާއްޖެއިން އެ ގައުމަށް އެނބުރި ދާ މީހުންނަށް އަމިއްލަ ގޭގައި ކަރަންޓީން ވެވޭނެ އެވެ. ރެޑް ލިސްޓުގައި ހިމެނޭ ގައުމުތަކުން ދާ ނަމަ ކަރަންޓީން ވާން ޖެހޭނީ ސަރުކާރުން ކަނޑައަޅާފައިވާ ފެސިލިޓީއެއްގަ އެވެ.

އެ ގައުމުން ޓްރެވަލް ލިސްޓަށް ގެނައި ބަދަލާ އެކު ރާއްޖެއަށް އަންނަ ޓޫރިސްޓުން އިތުރު ކުރަން އިނގިރޭސިވިލާތުގައި ހުންނަ ރާއްޖޭގެ ހައި ކޮމިޝަނުން ވަނީ ފެއާތަކުގައި ވެސް ބައިވެރިވާން ފަށައިފަ އެވެ. އެ ގައުމުގައި މިހާރު ކުރިއަށްދާ "ނެޝަނަލް ވެޑިން" ޝޯގައި ރާއްޖެ ހަނީމޫން މަންޒިލެއްގެ ގޮތުގައި އަންނަނީ އިޝްތިހާރު ކުރަމުންނެވެ.