ޖަލުގައި މަރުވާ މީހުންނާއި އަނިޔާގެ މައްސަލަތައް ބަލަން އެމްނެސްޓީން ގޮވާލައިފި

ރާއްޖޭގެ ޖަލުތަކުގައި މަރުވާ މީހުންގެ މައްސަލަތަކާއި އަނިޔާގެ މައްސަލަތައް އިންސާފުވެރި، މިނިވަން ގޮތެއްގައި ތަހުގީގުކުރުމަށް އެމްނެސްޓީ އިންޓަނޭޝަނަލް އިން މިއަދު ގޮވާލައިފި އެވެ.

އެމްނެސްޓީން ރާއްޖޭގެ ޖަލުގެ ހާލާތާ ގުޅޭ ގޮތުން އާންމުކުރި ލިޔުމެއްގައި ބުނީ މިދިޔަ ހޯމަ ދުވަހު ހުޅުމާލޭ ޖަލުގައި މަރުވި މުހައްމަދު އަސްލަމްގެ މަރުގެ މައްސަލައިގައި އެއްވެސް އިހުމާލެއް އޮތް ކަމަށް ކަރެކްޝަނަލް ސާވިސް އިން ގަބޫލުނުކުރާ ކަމަށެވެ. އަސްލަމްގެ މަރު ސެޓްފިކެޓުގައިވާ ގޮތުން އޭނާ މަރުވި ސަބަބު އެނހިފައި ނުވާތީ އެމްނެސްޓީން ވަނީ ކަންބޮޑުވުން ފާޅުކޮށްފަ އެވެ.

އެމްނެސްޓީން ބުނީ ގައިދީއަކު މަރުވި ސަބަބު ނޭނގުމަކީ އެކަމުގެ ކަންބޮޑުވުން އިންތިހާއަށް އޮތް ކަމެއް ކަމަށެވެ.

ގދ. ވާދޫ، އަސްލަމް، 40، މަރުވީ މަސްތުވާތަކެތީގެ މައްސަލައެއްގައި ތިން އަހަރުގެ ޖަލު ހުކުމެއްގައި ހުއްޓާ އެވެ. ކަރެކްޝަންސްއާ ހަވާލާދީގައި އޭގައި ބުނީ އޭނާ ޖަލަށް ވެއްޓުމުން، ހޮސްޕިޓަލަށް ގެންދެވުނު ކަމަށާއި އެތަނުން އޭނާ މަރުވެފައިވާ އަންގާފައިވާ ކަމަށެވެ. އެކަމަކު އޭނާގެ އާއިލާއާ ހަވާލާދީގައި ބުނީ، އެމީހުންނަށް އޭނާ ހޮސްޕިޓަލަށް ގެންދިޔަކަން ވެސް އެނގުނީ އެހެން މީހެއްގެ ފަރާތުން ކަމަށެވެ. އަދި އޭނާގެ ހާލަތު އޮޅުން ފިލުވުމަށް މަސައްކަތް ކުރި ކަމަށެވެ.

އިތުރު ހާދިސާއެއް ހިއްސާކުރަމުން އެމްނެސްޓީން ބުނީ މިދިޔަ އަހަރުގެ ސެޕްޓެމްބަރު 6 ގައި ވައްކަމުގެ މައްސަލައަކާ ގުޅިގެން ހައްޔަރުކުރި މީހަކަށް ފުލުހުން އަނިޔާކޮށްފައިވާ ކަމަށެވެ. އެގޮތުން ސިރާޖު ބުނެފައި ވަނީ ފުލުހުން އޭނާ ކޮޓަރިއަކަށް ވެއްދުމަށް ފަހު ކުށަށް އިއުތިރާފުވުމަށް އަންގައި އަނިޔާކުރި ކަމަށެވެ.

އެހެންވެ އެމްނެސްޓީން ގޮވާލީ އަސްލަމްގެ މަރުގެ މައްސަލައާއި ސިރާޖަށް އަނިޔާކުރި މައްސަލަ ވަކިވަކިން ތަހުގީގުކުރުމަށާއި އެ މައްސަލަ ތަހުގީގުކުރާއިރު އެމީހުންގެ އިންސާނީ ހައްގަށް އަރައިގަތް މީހުން ނުވަތަ އިހުމާލުވި މީހުން އެއް ފަރާތްކޮށްގެން މައްސަލަ ބެލުމަށެވެ.

އެ ލިޔުމުގައި ވަނީ މިދިޔަ ހުކުރު ދުވަހު މާފުށީ ޖަލުގައި އަހުމަދު އިބްރާހީމް ނަމަކަށް ކިޔާ ގައިދީއެއްގެ ގަޔަށް އެހެން ގައިދީއަކު ހޫނު ފެން އުކި މައްސަލައެއް ވެސް ފާހަގަކޮށްފަ އެވެ. ކަރެކްޝަނުން ބުނަނީ އެއީ ދެމީހުންގެ މެދުގައި ހަމަނުޖެހުމެއްގައި ހިނގައި ކުރިމަތިވި ހާދިސާއެއް ކަމަށާއި އެ ދެމީހުން ދެ ތަނަކަށް ބަދަލުކޮށްފައިވާ ކަމަށެވެ.

ޖަލަކީ އަނިޔާގެ ހާއްޔަކަށްވިޔަ ނުދިނުމަށް މި މައްސަލަތައް ތަހުގީގުކުރުމަށް ގޮވަލައި އެމްނެސްޓީން ވަނީ ރާއްޖޭގެ ޖަލުތަކަކީ ކުރިން ވެސް ލާއިންސާނީ އަނިޔާގެ މައްސަލަތައް ފެންމަތިވެފައިވާ ތަނެއްކަން ފާހަގަކޮށްފަ އެވެ.