ހަ އަހަރު ފަހުން ހުށަހެޅި، ނަޒާހާގެ މައްސަލަ ސުޕްރީމް ކޯޓުން ބަލައިގެންފި

ކުރީގެ ފިރިމީހާ މަރައިލި މައްސަލައިގައި އުމުރަށް ޖަލަށްލާފައިވާ މަރިޔަމް ނަޒާހާގެ ކުށަށް އެކަށީގެންވާ އަދަބެއް ދެވިއްޖެ ކަމަށް ކަނޑައަޅައި އޭނާ މިނިވަން ކޮށްދިނުމަށް އެދި ސުޕްރީމް ކޯޓަށް ހުށަހެޅި މައްސަލަ ބަލައިގަތުމަށް އެ ކޯޓުން ނިންމައިފި އެވެ.

ހ. ބައިކެނޑިގޭ މަރިޔަމް ނަޒާހާ 25 އަހަރަށް ޖަލަށް ލާން 2011 ގައި އޭރުގެ ޖިނާއީ ކޯޓުން ހުކުމް ކުރީ ޖޫން 2010 ގައި އޭނާގެ ކުރީގެ ފިރިމީހާ މއ. އެދުރުގޭ ހަސަން ޝާހިދަށް ވަޅިއަކުން ހަމަލާދީ އޭނާ މަރައިލިކަން ނަޒާހާގެ އިއުތިރާފުން ސާބިތުވުމުންނެވެ. ނަޒާހާ ބުނާ ގޮތުގައި ޝާހިދު މަރައިލީ އޭނާގެ ފަރާތުން ލިބެމުން ދިޔަ އަނިޔާއަށް ކެތް ނުވެގެންނެވެ.

ނަޒާހާގެ މައްޗަށް އިއްވި ހުކުމް 2015 ވަނަ އަހަރު ހައި ކޯޓުން ދަމަހައްޓާފައވާއިރު، އެ މައްސަލަ އޭނާގެ ފަރާތުން ސުޕްރީމް ކޯޓުގައި އިސްތިއުނާފު ކުރަން ހުށަހެޅީ ވަރަށް ފަހުންނެވެ. ނަމަވެސް އެ ކޯޓުގެ ރަޖިސްޓްރާ ނިންމެވީ މައްސަލަ ބަލައިނުގަތުމަށެވެ. އެކަމަކު، ނަޒާހާގެ ފަރާތުން މައްސަލަ ފަނޑިޔާރުންގެ ބެންޗުގައި އިސްތިއުނާފު ކުރީ އެވެ.

ސުޕްރީމް ކޯޓުން މިހާރު ވަނީ އެ މައްސަލަ ބަލައިގެންފައިވާ ކަން އަންގައިފަ އެވެ. ނަޒާހާގެ ވަކީލު މަރިޔަމް ނިހާޔަތު ވަނީ "މިހާރު"އަށް ކަށަވަރުކޮށްދެއްވައިފަ އެވެ.

އެކަމާ ގުޅިގެން މިދިޔަ ހަފުތާގައި ބޭއްވި އިޖުރާއީ އަޑުއެހުމުގައި ދައުލަތުން ބުނެފައި ވަނީ އިސްތިއުނާފީ މުއްދަތު ހަމަވެފައިވާތީ ސުޕްރީމް ކޯޓަށް މައްސަލަ ބަލައިނުގަނެވޭނެ ކަމަށެވެ. އަދި އަދަބު ކުޑަނުކުރެވޭނެ ކަމަށް ވެސް ބުންޏެވެ.

ނަމަވެސް، އެ ހުކުމުގައި ވަނީ އޭނާ އަށް ކޮންމެވެސް ކަހަލަ ލުޔެއް ލިބެން ޖެހޭ ކަމަށެވެ. އެކަމާ ގުޅިގެން ނަޒާހާ އޭނާގެ މައްސަލަ ކްލެމެންސީ ބޯޑަށް ހުށަހެޅުމުން އަދަބުން ފަސް އަހަރު ވަނީ ކުޑަކޮށްދީފަ އެވެ.

ޖިމް އިންސްޓްރަކްޓަރެއްގެ ގޮތުގައި މަސައްކަތް ކުރި ނަޒާހާ މީގެ ކުރިން ކޯޓުގައި ބުނެފައި ވަނީ ޝާހިދު މަރައިލީ ގެވެށި އަނިޔާއިން ސަލާމަތް ވުމަށް އަމިއްލަ ދިފާއުގައި ކަމަށެވެ. މަރައިލުމަށް ފަހު، އެކަން ފުލުހުންނަށް ރިޕޯޓުކޮށް އޭނާ އަމިއްލައަށް އިއުތިރާފު ވެސް ވި އެވެ.

ނަޒާހާގެ މައްޗަށް މަރުގެ ހުކުމެއް ނައީ ޝާހިދުގެ މަންމަ އާއި އާއިލާ އިން ނަޒާހާގެ ކިބައިން މަރަށް މަރު ހިފަން ބޭނުން ނުވުމުންނެވެ. ނަޒާހާގެ ދަރިފުޅު ބަލަނީ ވެސް ޝާހިދުގެ އާއިލާއިންނެވެ.

އެ ހާދިސާ ހިނގި އިރު ނަޒާހާ އާއި ޝާހިދުގެ ދަރިފުޅަށް ހުރީ ދެ އަހަރު ވެފަ އެވެ. އެ ކުއްޖާ މިހާރު ފުރާވަރަށް އަރާފައިވާއިރު، ނަޒާހާ ކޯޓުގައި ބުނެފައި ވަނީ އެހާ ދުވަސް ފަހުން އިސްތިއުނާފު ކުރަން ނިންމީ މައްސަލައާ ގުޅިގެން ކިޔާ ފާޑުކިޔުމަށް ކެތް ކުރާނެ ކަމަށް ދަރިފުޅު ބުނުމުންނެވެ. އަދި ދަރިފުޅު ވެސް އެދެނީ އޭނާ މިނިވަންވާން ކަމަށް ބުނެފައިވެ އެވެ.