ފުޑް ޕްރޮގްރާމުން ޖެހި ހިސާބަށް އީލޮންގެ ސުވާލު

އދ. ގެ ފުޑް ޕްރޮގްރާމުން ޖެހި ހިސާބަށް މަހުޖަނު އީލޮންގެ ސުވާލު

03 ނޮވެމްބަރ 2021

ދުނިޔޭގެ އެންމެ ބޮޑެތި މަހުޖަހުން އެހީވެއްޖެ ނަމަ ހަ ބިލިއަން ޑޮލަރުން ވެސް ދުނިޔެއިން ބަނޑުހައިހޫނުކަން ނައްތާލަން އެހީއަކަށް ވެދާނެ ކަމަށް އދ. ގެ ފުޑް ޕްރޮގްރާމްގެ ޑިރެކްޓަރު ޑޭވިޑް ބީޒްލީ ދެއްކެވި ވާހަކަތަކާ ގުޅިގެން ދުނިޔޭގެ އެންމެ ބޮޑު މަހުނަޖު އީލޮން މަސްކް އެކަން ވާނެ ގޮތަކީ ކޮބައިތޯ ސާފުކޮށް ދޭން އެދިއްޖެ އެވެ.

އަހުމަދު އަދްޝަން

އޭނާ ވިދާޅުވީ ހަ ބިލިއަން ޑޮލަރުން ދުނިޔޭގެ ބަނޑުހައިހޫނުކަން ނައްތައިލެވިދާނެކަން ސާބިތުކޮށް ދީ ނަމަ އަމިއްލަ ކުންފުނި ޓެސްލާގައި އޮތް އޭނާގެ ހިއްސާ ވެސް ވިއްކައިލަން ތައްޔާރަށް ހުރި ކަމަށް ކަމަށެވެ. އެ ކުންފުންޏަކީ މިހާރު ޓްރިލިއަން ޑޮލަރުގެ އަގުހުރި ކުންފުންޏެކެވެ.

"ސާޅީސް ދެ މިލިއަން މީހުންނަށް ކުރިމަތިވެފައިވާ އެ މައްސަލަ އަށް ހަ ބިލިއަން ޑޮލަރުން ހައްލުކޮށް ދެވިދާނެ ގޮތްތަކެއް ޔޫއެންގެ ވޯލްޑް ފިޑް ޕްރޮގްރާމް (ޑަބްލިއުއެފްޕީ) އިން ކިޔައިދީފި ނަމަ އަހަރެން މި ހުރީ ޓެސްލާގެ ހިއްސާތައް ވެސް ވިއްކާލައި ބަނޑުހޫނުކަން ނައްތައިލަން މަސައްކަތް ކުރަން ތައްޔާރަށް." އަމިއްލަ މިލްކިއްޔާތު މިހާރު 311 ބިިލިއަން ޑޮލަރަށް އަރާ މަހުޖަނު ވިދާޅުވި އެވެ.

If WFP can describe on this Twitter thread exactly how $6B will solve world hunger, I will sell Tesla stock right now and do it.
— Elon Musk (@elonmusk) October 31, 2021

ފުޑް ޕްރޮގްރާމްގެ ޑިރެކްޓަރު ވިދާޅުވި ހަ ބިލިއަން ޑޮލަރަށް ބަލާ ނަމަ އެއީ އިލޮންގެ މިލްކިއްތާގެ އެންމެ ދެ ޕަސެންޓެވެ.

.@elonmusk! Headline not accurate. $6B will not solve world hunger, but it WILL prevent geopolitical instability, mass migration and save 42 million people on the brink of starvation. An unprecedented crisis and a perfect storm due to Covid/conflict/climate crises.
— David Beasley (@WFPChief) October 31, 2021

ސީއެންއެން އަށް ދެއްވި އިންޓަވިއުއެއްގައި މިދިޔަ ހަފުތާގައި ޑޭވިޑް ވިދާޅުވީ އީލޮން އާއި ޖެފް ބެޒޮސް ފަދަ މަހުޖަނުން އެ މީހުންގެ ތަނަވަސްކަމުން ދުނިޔޭގެ ހާލަތު ރަނގަޅުކުރަން މަސައްކަތްނުކުރާ ކަމަށެވެ.

.@elonmusk With your help we can bring hope, build stability and change the future.

Let’s talk: It isn’t as complicated as Falcon Heavy, but too much at stake to not at least have a conversation. I can be on the next flight to you. Throw me out if you don’t like what you hear!
— David Beasley (@WFPChief) October 31, 2021

އެ ވާހަކަތަކާ އެކު އީލޮން ކުރި ޓްވީޓްގެ ރައްދުގައި ޑޭވިޑް ކުރެއްވި ޓްވީޓްތަކެއްގައި ވިދާޅުވީ ހަ ބިލިއަނުން މައްސަލަ އަށް ހައްލެއް ހޯދިދާނެ ކަމަށް ވިދާޅުވީ ނިޒާމުގެ ތެރެއިން އެކަން ބެލިފައި އޮތުމުން ކަމަށެވެ.

"ފުޑް ޕްރޮގްރާމަކީ ދެ ފުށް ފެން ގޮތަށް މަސައްކަތްކުރާ އަދި ހަރުދަނާ އެކައުންޓިން ނިޒާމެއް ވެސް އޮތް ތަނެއް،" އޭނާ ވިދާޅުވި އެވެ. "މުޅި މައްސަލަ ހަ ބިލިއަން ޑޮލަރުން ހައްލު ނުކުރުވުނަސް ބަނޑުހައި ހޫނުކަމުގައި ތިބި ސާޅީސް ދެ މިލިއަން މީހުންނަށް އެވަރުގެ އަދަދަކުން އެހީވެވި، އެ މީހުންގެ ފުރާނަ ސަަލާމަތް ކުރެވިދާނެ."

އޭނާ ވިދާޅުވި ގޮތުގައި މިއީ ކުރަން އުޅެފި ނަމަ ނުވާނެ ކަމެއް ނޫނެވެ. އެހެންވެ އެކަމާ "އުޅެން ހިނގާށޭ" އިލޮން ޓެގްކުރައްވައި ޑޭވިޑް ވިދާޅުވި އެވެ.

Comments