ދަތިކުރުން ހުއްޓާލާ، ޕެރިސް މުއާހަދާ ތަންފީޒު ކުރާނަން: އީރާން

ދުނިޔެ ހޫނުވުން ހުއްޓުވުމަށް ދުނިޔޭގެ ގައުމުތަކުން އެއްބަސްވެ އެކުލަވާލާފައިވާ ޕެރިސް މުއާހަދާ އީރާނުން ތަންފީޒު ކުރާނެ ހަމައެކަނި ގޮތަކީ، އީރާނަށް ދަތިކުރުމަށް އަޅާފައިވާ ފިޔަވަޅުތައް އުވައިލުން ކަމަށް އެ ގައުމުން ބުނެފި އެވެ.

އީރާންގެ ތިމާވެއްޓާ ބެހޭ އިދާރާގެ ވެރިޔާގެ މަގާމަށް ދާދި ފަހުން އައްޔަންކޮށްފައިވާ އަލީ ސަލާޖިގާ، ބީބީސީ އަށް ދެއްވި އިންޓަވިއުއެއްގައި ވިދާޅުވީ އެ ގައުމާ ދެކޮޅަށް އަޅާފައިވާ އިގްތިސާދީ އަދި ވިޔަފާރީގެ ދަތިކުރުންތަކުގެ ސަބަބުން، ތިމާވެށީގެ ހިމާޔަތަށް ކުރަންޖެހޭ ވަރަށް ގިނަ މަސައްކަތަށް ހުރަސް އެޅިފައިވާ ކަމަށެވެ. އެގޮތުން އޭނާ ވިދާޅުވީ އިއާދަކުރަނިވި ހަކަތައިގެ ދާއިރާ ތަރައްގީކޮށް ފުޅާ ކުރުމަށް ވަރަށް ބޮޑަށް ހުރަސްއެޅިފައިވާ ކަމަށެވެ.

ޕެރިސް މުއާހަދާ ތަންފީޒު ނުކުރާ މަދު ގައުމުތަކުގެ ތެރޭގައި އީރާން ހިމެނޭއިރު، އެ ގައުމަކީ އަށް ވަނަ އަށް އެންމެ ގިނައިން ޖައްވަށް ވިހަ ގޭސް ބޭރުކުރާ ގައުމެވެ. އިއާދަކުރަނިވި ހަކަތައިގެ ދާއިރާ އިން މިދިޔަ އަހަރުތަކުގައި އެއްވެސް އިންވެސްޓެއް ކޮށްފައިނުވާ އިރު، އެ ގައުމުން ޖައްވަށް ދޫކުރި ވިހަ ގޭހުގެ މިންވަރު ވެސް ވަނީ އިތުރުވެފަ އެވެ.

އީރާނުން ބުނާ ގޮތުގައި، ތިމާވެއްޓާ ގުޅިފައިވާ އިންސާނީ އެތައް ހިދުމަތްތަކަކަށް ވެސް، ދަތިކުރުމުގެ ފިޔަވަޅުތަކުގެ ސަބަބުން ވަނީ ހުރަސްތައް ކުރިމަތިވެފަ އެވެ. ދުނިޔެ ހޫނުވުމުގެ ސަބަބުން ހަނަފަސްކަން އިތުރުވެ، ކޯރުތަކުން ފެންމަދުވަމުންދާއިރު، ފެން އުފެއްދުމުގެ ސިނާއަތުގައި އިންވެސްޓް ކުރެވެން ނެތުމުން، ބޯފެން ހޯދުމުގައި އެތައް ގޮންޖެހުންތަކެއް އެބަހުއްޓެވެ.

އިނގިރޭސި ވިލާތުގެ ގްލާސްގޯގައި މިހާރު ކުރިއަށް ދާ އދ.ގެ ތިމާވެއްޓާ ބެހޭ މަހާސިންތާ، ކޮޕް26 ގައި، ބައިވެރިވެވަޑައިގަތުމަށް އީރާންގެ ރައީސް އިބްރާހީމް ރައީސީ ވަޑައެއްނުގަންނަވަ އެވެ. އޭގެ ބަދަލުގައި އީރާނުން ފޮނުވި ވަފްދުން، ތިމާވެށީގެ މަހާސިންތާގައި ދުނިޔޭގެ ގައުމުތަކަށް ގޮވައިލަމުން ދަނީ، އީރާނަށް ދަތިކުރުމަށް އެމެރިކާ އާއި ވިލާތުގެ ގައުމުތަކުން ފިޔަވަޅުތައް އުވައިލުމަށެވެ.

އީރާންގެ ތިމާވެއްޓާ ބެހޭ އިދާރާގެ ވެރިޔާ ވިދާޅުވީ، ތިމާވެށީގެ ސަބަބުން ދުނިޔޭގެ އެހެން ގައުމުތަކަށް އަސަރުކުރާ ފަދައިން އީރާނަށް ވެސް ވަރަށް ނުރަނގަޅު އަސަރުތައް ކުރަމުންދާ ކަމަށެވެ.

"އަހަރެއްގެ ތެރޭގައި އެވްރެޖްކޮށް ވާރޭ ވެހޭ މިންވަރު މިހާރު ދަށްވެއްޖެ. އީރާންގެ ކޯރުތަކަށް ފަރުބަދަމަތިން އަންނަ ފެނުގެ މިންވަރު ކުރިއަށް ވުރެ 40 ޕަސެންޓް މަދުވެއްޖެ. އޭގެ ސަބަބުން އަހަރެމެންގެ ދަނޑުވެރިކަމަށް ގެއްލުން ލިބޭ. އަހަރެމެންގެ ސިނާއަތްތަކަށް ގެއްލުންތައް އެބަ ލިބޭ. އަދި އަހަރެމެންގެ ބޯފެނުގެ ނިޒާމަށް އަސަރުކުރޭ."

އޭނާ ވިދާޅުވީ ޕެރިސް މުއާހަދާ ވެސް ވާންޖެހޭނީ ދެކޮޅަށް ދަތުރުކުރާ މަގަކަށް ކަމަށެވެ. ގައުމަކާ ދެކޮޅަށް ދަތިކުރުމުގެ ފިޔަވަޅުތައް އަޅާފައި އެ ގައުމުގެ އިންސާނީ ހައްގުތައް ރަނގަޅުކުރަން ގޮވާއިރު، ދަތިކުރުމުގެ ފިޔަވަޅުތަކުގެ ސަބަބުން އެންމެ އަސާސީ އިންސާނީ ހައްގެއް ކަމަށްވާ ބޭސްފަރުވާ ކުރުމަށް ބޭނުންވާ ބޭސް ވެސް އެތެރެ ނުކުރެވޭ ކަމަށް އޭނާ ވިދާޅުވި އެވެ.

"ދަތިކުރުމުގެ ފިޔަވަޅުތައް އުވާލައިފިއްޔާ، އޭރުން އަހަރެމެންނަށް ބައިނަލްއަގުވާމީ މުޖްތަމައު ބޭނުންވާ ކަންތައް ކޮށްދެވިދާނެ. އޭރުން، އިއާދަކުރަނިވި ހަކަތައިގެ ދާއިރާ ފަދަ، ހާއްސަ ދާއިރާތަކާ ގުޅޭ ޒަމާނީ ޓެކްނޮލޮޖީ އާއި ފައިސާ، އެކި ގައުމުތަކުން އަހަރެމެންނަށް ފޯރުކޮށްދެވިދާނެ. އޭރުން އަހަރެމެންގެ މުސްކުޅިވެފައިވާ އޮނިގަނޑު ޒަމާނީ ކުރެވިދާނެ."