އެލް ޗަޕޯގެ އަންހެނުން ތިން އަހަރަށް ޖަލަށް

ވޮޝިންޓަން (ޑިސެމްބަރު 1) - މެކްސިކޯގެ ނުރައްކާތެރި ޑްރަގު ލޯޑް ޖެކުއިން "އެލް ޗަޕޯ" ގުޒްމަންގެ އަންހެނުން ތިން އަހަރަށް ޖަލަށްލާން އެމެރިކާގެ ކޯޓަކުން ހުކުމްކޮށްފި އެވެ.

އެލް ޗަޕޯގެ ސައިނާލޯ ކާޓެލްގެ މައުލޫމާތު އެނގި ހުރެ ސިއްރު ކުރުމާއި ޑްރަގު އެއްތަނުން އަނެއް ތަނަށް ގެންދިއުމާއި މަނީ ލޯންޑަރިންގެ ކުށުގައި އެމާ ކޮރޯނެލް އައިސްޕޫރޯ، 32، ގެ މައްޗަށް ކުށް ސާބިތުވެފައި ވަނީ މިދިޔަ ޖޫން މަހު އެވެ. އޭނާ ވަނީ މެކްސިކޯގެ ޖަލުން އެލް ޗަޕޯ ފިލުމަށް ވެސް އެހީތެރިވި ކަމަށް އެއްބަސްވެފަ އެވެ. އެމާގެ މައްޗަށް ސާބިތުވެފައި ވަނީ އުމުރު ދުވަހުގެ ޖަލު ހުކުމެއް އަންނަވަރުގެ ކުށްތަކެވެ. ނަމަވެސް އެމާ ކުށަށް އިއުތިރާފްވެ އޭނާ ކޮށްފައިވާ ކުށްތަކާ މެދު ހިތާމަކުރުމުން އެމެރިކާގެ ޕްރޮސެކިއުޓަރުން ވަނީ އަދަބު ލުއިކޮށްދޭން އެދިފަ އެވެ.

އެމާގެ ފިރިމީހާ އެލް ޗަޕޯ، 64، މިހާރު ހުރީ އުމުރު ދުވަހުގެ ޖަލު ހުކުމެއްގައި އެމެރިކާގެ ކޮލަރާޑޯގެ ޖަލެއްގަ އެވެ. އޭނާގެ މައްޗަށް ހުކުމް އިއްވީ ޖުލައި 2019 ގަ އެވެ.

ކޯޓު ލިޔުންތަކުން އެނގޭ ގޮތުގައި ކުރީގެ ރީތީގެ ރާނީއެއް ކަމަށްވާ އެމާ ވަނީ ސައިނޯލާ ކާޓެލް އިން ކޮކޭން، ހެރޮއިން، މެތަމްފެޓަމިން އަދި މެރުވާނާ އެމެރިކާ އަށް ޓްރެފިކް ކުރުމުގައި އެހީތެރިވެދީފަ އެވެ. ކަމާބެހޭ ފަރާތްތަކުން ލަފާކުރާ ގޮތުގައި މެކްސިކޯގެ ސަލާމަތީ ފިޔަވަޅުތައް ވަރުގަދަކޮށްފައިވާ ޖަލަކުން 2015 ވަނަ އަހަރު އެލް ޗަޕޯ ފިލުވުމަށް ވެސް އެމާ ވަނީ އެހީތެރިވެފަ އެވެ. ޖަލާ ކައިރިން ގެއެއް ގަތުމަށް ވެސް އެމާ ވަނީ އެހީވެފަ އެވެ. އެލް ޗަޕޯ އެ ފަހަރު ޖަލުން ފިލީ ޖަލުގައި އޭނާ ހުރި ގޮޅިން ފެށިގެން އެ ގެއާ ހަމައަށް ބިމު އަޑިން މަގެއް ކޮނެގެންނެވެ.

އެމާ އެންމެ ފުރަތަމަ އެލް ޗަޕޯއާ ބައްދަލުވީ އޭނާގެ އުމުރުން 17 އަހަރުގަ އެވެ. ޖެހިގެން އައި އަހަރު އެލް ޗަޕޯއާ ކައިވެނިކުރި އެވެ.