ނުރައްކާތެރި ޑްރަގު ޑީލަރު އަލް ޗަޕޯގެ މައްޗަށް ކުށް ސާބިތުވެއްޖެ

ނިއު ޔޯކް (ފެބްރުއަރީ 13) - މެކްސިކޯގެ ނުރައްކާތެރި ޑްރަގު ޑީލަރު ޖޯކިން އަލް ޗަޕޯ ގުޒްމަންގެ މައްޗަށް އެމެރިކާގެ ކޯޓެއްގައި ކުށް ސާބިތުވެއްޖެ އެވެ.

ނިއު ޔޯކުގެ ފެޑެރަލް ކޯޓުގައި 11 ހަފުތާގެ މުއްދަތަށް ކުރިއަށް ގެންދިޔަ އެމެރިކާ އަށް ޑްރަގު އެތެރެކުރި މައްސަލާގައި އޭނާގެ މައްޗަށް އުފުލި 10 ދައުވާ ވެސް ވަނީ ސާބިތުވެފަ އެވެ. އޭގެ ތެރޭގައި ހެރޮއިން އާއި ކޮކެއިންގެ ވިޔަފާރި ހިންގުމާއި ހަތިޔާރު ވަގަށް ގެންގުޅުމާ އަދި މަނީ ލޯންޑަރިންގެ މައްސަލަތައް ހިމެނެ އެވެ.

ގުޒްމަން، 61، ގެ މައްޗަށް ސާބިތުވި ކުށްތަކަށް އޭނާގެ މައްޗަށް އަންނާނީ އުމުރު ދުވަހުގެ ޖަލު ހުކުމެއް ކަމަށްވެ އެވެ.

މެކްސިކޯގެ ޖަލަކުން 2016 ވަނަ އަހަރު ފިލައިގެން ފަސް މަސް ދުވަސް ވަންދެން އުޅެނިކޮށް އޭނާ އަތުލައިގަތީ ޖެނުއަރީގަ އެވެ. އޭނާ އެމެރިކާއާ ހަވާލު ކުރީ 2017 ގަ އެވެ. ނަވާރަ ސަތޭކަ ނުވަދިހަ ތިން ވަނަ އަހަރު ޖަލުގައި ބަންދުކުރި ގުޒްމަން ވަނީ 2001 ވަނަ އަހަރު ވެސް ޖަލުން ފިލައިފަ އެވެ. އެ ފަހަރު އޭނާ ޖަލުން ފިލީ ލޯންޑްރީ ކާޓެއްގައި ފިލައި އޮވެގެންނެވެ. އޭނާ އަތުލައިގަތުމަށް ފަހު ދެ ވަނަ ފަހަރަށް ޖަލަށްލީ 2014 ވަނަ އަހަރު އެވެ.

މެކްސިކޯގެ ސަލާމަތީ ފިޔަވަޅުތައް ވަރުގަދަކޮށްފައިވާ ޖަލުން 2015 ވަނަ އަހަރު ގުޒްމަން ފިލިގޮތް ވެސް ޝަރީއަތުގައި ވަނީ ސާފުކޮށްދީފަ އެވެ. ޖަލަށް ވަނީ ޖީޕީއެސް ގަޑިއެއް ވަގަށް ވައްދާ ގުޒްމަންއާ ހަވާލުކޮށްފަ އެވެ. އޭގެ ފަހުން ގުޒްމަންގެ ދަރިން ވަނީ ޖަލާ ކައިރިން ގެއެއް ގަނެފަ އެވެ. އެ ގޭ ކައިރިން ޓަނަލެއް ކޮނެ ގުޒްމަން އޮތް ޖަލު ގޮޅީގެ ތެރޭން ވަނީ ފޫދުއްވާލައިފަ އެވެ. ޓަނަލް ކޮނުނު މީހުން ގުޒްމަންގެ ގޮޅި އެހާ ސީދާކޮށް ހޯދީ ޖީޕީއެސް ގަޑީގެ އެހީގަ އެވެ.

ސައިނޯލާ ކާޓެލްގެ ލީޑަރު އަލް ޗަޕޯގެ މައްޗަށް ޕްރޮސެކިއުޓަރުން އުފުލާފައިވާ ދައުވާގައިވާ ގޮތުން އެއީ އެމެރިކާ އަށް އެންމެ ގިނައިނ ޑްރަގު ސަޕްލައި ކުރާ މީހާ އެވެ. ޕްރޮސެކިއުޓަރުން ވަނީ އޭނާ އެމެރިކާ އަށް 200 ޓަނުގެ ޑްރަގު އެތެރެކޮށްފައިވާ ކަމަށް ތުހުމަތުކޮށްފަ އެވެ.

ގުޒްމަންގެ މައްޗަށް ކުށް ސާބިތުވާކަން ފަނޑިޔާރު އިއުލާން ކުރި އިރު އޭނާގެ މޫނު މަތިން އެއްވެސް ކަންބޮޑުވުމެއް ފެނިފައި ނުވާ ކަމަށް ސީބީއެސް ނިއުސް އިން ރިޕޯޓްކޮށްފައިވެ އެވެ. ކޯޓުން ނެރެގެން ގެންދިޔަ ވަގުތު ގުޒްމަންގެ އަންހެނުން 29 އަހަރުގެ ކުރީގެ ރީތީގެ ރާނީ އެމާ ކޮރޮނެލް އަށް ލޮލުން ވަނީ އިޝާރާތްކޮށްލައިފަ އެވެ.

އެމެރިކާ އިން އެންމެ ގިނައިން ޑްރަގު އެތެރެކުރި ގުޒްމަން ވަނީ 2009 ވަނަ އަހަރު ފޯބްސްގެ މުއްސަނދިންގެ ލިސްޓުގެ 701 ވަނައިގައި ހިމެނިފަ އެވެ. އޭރު އޭނާގެ މިލްކިއްޔާތުގައި އެއް ބިލިއަން ޑޮލަރު ހުރި ކަމަށްވެ އެވެ.