އެމެރިކާގައި ދެވަނަ އަށް އެންމެ މަގްބޫލު މަންޒިލަކީ ރާއްޖެ

އެމެރިކާގައި ދެވަނަ އަށް އެންމެ މަގްބޫލު މަންޒިލަކަށް ރާއްޖެ ވެއްޖެ އެވެ.

އެމެރިކާގެ ޓްރެވަލް ވެބްސައިޓް "ޕާކްސްލީޕްފްލައި" އިން ކޮށްފައިވާ ދިރާސާއިން ދައްކާ ގޮތުން މިދިޔަ ހަ މަސް ދުވަހު އެމެރިކާގައި ރާއްޖެއާ ގުޅޭ މައުލޫމާތު ފަސް ލައްކައާ ގާތްކުރާ އަދަދަކަށް ގޫގުލް ސާޗްކޮށްފައިވެ އެވެ. ރާއްޖެއަކީ މިދިޔަ ދެ އަހަރު ތެރޭ އެމެރިކާގައި އެންމެ ބޮޑު މަގްބޫލުކަމެއް ހޯދަމުން އަންނަ އެއް ގައުމެވެ.

މިދިޔަ ދެ އަހަރު އެ ގައުމުގައި ރާއްޖެއާ ގުޅޭ ގޮތުން ގޫގުލް މެދުވެރިކޮށް މައުލޫމާތު ހޯދާ މިންވަރު ވަނީ 72 ޕަސެންޓް އިތުރުވެފަ އެވެ.

އެމެރިކާގެ އެންމެ މަގްބޫލް މަންޒިލަކީ ޕޯޓޯ ރީކޯ އެވެ. މިދިޔަ ހަ މަހު ޕޯޓޯ ރީކޯއާ ގުޅޭ ގޮތުން 1.1 މިލިއަން ފަހަރު ގޫގުލް ސާޗްކޮޮށްފައިވެ އެވެ.

މިއަހަރު ކުރީ ކޮޅު އޮންލައިން މާކެޓިން އޭޖެންސީއެއް ކަމަށްވާ "ކޯލާ" އިން ހެދި ސާވޭއިން ދައްކާ ގޮތުގައި އެމެރިކާގެ ދަށުގައި އޮންނަ ޕޯޓޯ ރީކޯ އާއި އެމެރިކާގެ އަވަށްޓެރި މެކްސިކޯ ނަގާފައި ތިން ވަނައަށް އެންމެ ގިނައިން އެމެރިކާ މީހުން ގޫގުލް ސާޗްކޮށްފައި ވަނީ ރާއްޖެ އެވެ.

މިދިޔަ އަހަރު ކޮވިޑްގެ އެންމެ ނުރައްކާތެރި ހާލަތުގައި ރާއްޖެ އޮތް އިރު ވެސް އެމެރިކާ އިން 19،000 ވުރެ ގިނަ ޓޫރިސްޓުން ރާއްޖެ އަ އެވެ. މިއަހަރުގެ މިހާތަނަށް އެމެރިކާއިން 50،000 ވުރެ ޓޫރިސްޓުން އައިސްފައިވެ އެވެ. އެމެރިކާ ހިމެނެނީ ކޮވިޑަށް ފަހު ރާއްޖެއަށް އެންމެ ގިނައިން ޓޫރިސްޓުން އަންނަ އެއް މަންޒިލްގެ ގޮތުގަ އެވެ.