ކެލާގައި ކަނޑޫ ހޮވުން މަނާކޮށް، ހިކިފައިވާ ކަނޑޫގަސްތައް ވިއްކާލަނީ

ހއ. ކެލާގެ ކަނޑޫފަލުން ކަނޑޫ ހޮވުން މަނާކޮށް، މަރުވެ ހިކިފައިވާ ކަނޑޫގަސްތައް ވިއްކުމަށް އެ ރަށު ކައުންސިލުން އިއްޔެ ނިންމައިފި އެވެ.

ކެލާ ކައުންސިލުން ކުރި އިއުލާނެއްގައި ބުނެފައި ވަނީ އެ ރަށުގެ ކަނޑޫފަލުގައި މަރުވެފައިވާ ކަނޑޫ ގަސްތައް އެ ސަރަހައްދުން ނަގައި، އަލުން ކަނޑޫ އިންދުމުގެ މަސައްކަތް ކުރަން ރޭވިފައި ވާތީ އެތަނުގައި ހިކިފައިވާ ކާނޑޫގަސްތައް ވިއްކަން ނިންމާފައިވާ ކަމަށެވެ.

މި ހިކިފައިވާ ކަނޑޫގަސްތައް ވިއްކާނެ އަގު ކައުންސިލުން ކަނޑައަޅާފައި ވަނީ އީޕީއޭ އިން އެކުލަވާލައިފައިވާ، ކަނޑޫފާތައް ބެލެހެއްޓުމުގައި ކައުންސިލުތަކުން ސަމާލުކަންދީ އަދި މަރުވެފައިވާ ކަނޑޫ ގަސްތަކާ މެދު އަމަލުކުރަން ޖެހޭ އުސޫލާ އެއްގޮތްވާ ގޮތުގެ މަތިން ކަމަށް ބުނެފައިވެ އެވެ.

މި އިއުލާން އާންމުކުރި ތާރީހުން ފެށިގެން ހަ މަސް ދުވަސް ވަންދެން އެ ރަށުގެ ކަނޑޫފަލުން ކަނޑޫ ހޮވުން ވެސް ވަނީ މަނާކޮށްފަ އެވެ.

ހިކިފައިވާ ކަނޑޫގަސްތައް ވިއްކާ އަގުތައް

- ވަށަމިނުގައި 10 ސެންޓިމީޓަރު ހަމަނުވާ ނަމަ ހިލޭ

- ވަށަމިނުގައި 10 ސެންޓިމީޓަރާއި 20 ސެންޓިމީޓަރާ ދެމެދުގެ ގަސްތައް 5ރ. އަށް

- ވަށަމިނުގައި 20 ސެންޓިމީޓަރާއި 30 ސެންޓިމީޓަރާ ދެމެދުގެ ގަސްތައް 10ރ. އަށް

- ވަށަމިނުގައި 30 ސެންޓިމީޓަރަށް ވުރެ ބޮޑު ނަމަ، އިތުރުވާ ކޮންމެ އެއް ސެންޓިމީޓަރަކަށް 50 ލާރީގެ ރޭޓުން އިތުރުވާނެ

މި ގަސްތައް ގަންނަން ބޭނުންވާ މީހުންނަށް ކެލާ ކައުންސިލުން މިހާރު އަންނަނީ ފޯމު ދޫކުރަމުންނެވެ.

ހއ. ކެލާގެ ޗަސްބިމަކީ މި ސަރުކާރުގައި ބޮޑުތިލަދުންމަތިން ހިމާޔަތް ކުރި އެންމެ ބޮޑު އެއް ސަރަހައްދެވެ. ނަމަވެސް، އެ ސަރަހައްދު މެނޭޖު ކުރާނެ ޕްލޭނެއް ނެތި އޮއްވާ، މިދިޔަ އަހަރުގެ ކުރީކޮޅުން ފެށިގެން، އެތަނުގައި ހެދިފައި އޮތް ބޯ ކަނޑޫފަލުގެ ބޮޑު ބައެއް ވަނީ ކުއްލިއަކަށް މަރުވެގެން ގޮސްފަ އެވެ. އެކަން އެހެން ރަށްރަށުގެ ކަނޑޫފާތަކަށް ވެސް ދިމާވި އިރު، މިހާތަނަށް ވެސް ސަބަބެއް ހޯދިފައެއް ނުވެ އެވެ.

ކެލާ ޗަސްބިމަކީ ކަނޑޫ، ރަނޑޫ، ބުރެވި އަދި ބޮޑުވަކި ހެދިފައި ހުންނަ ސަރަހައްދެކެވެ. މި ގަސްގަހުން ނިވާހޯދާއިގެން އެކި ސޫފިތައް އުޅޭ އިރު އެ ސޫފުތައް ޝިކާރަކުރަން އެ ސަރަހައްދަށް ބޮނޑަނަ ފިނދަނަފަދަ، ކަނބިލި، ކާޅު އަދި ކޮވެލި ފަަދަ ދޫނިތައް ގޮސް އުޅެ އެވެ.

ނަމަވެސް ކަނޑޫފަލުގެ ބޮޑު ބައެއް މަރުވުމުން ގުދުރަތީ އެ ރީތި މާހައުލު ވަނީ ވަރަށް ބޮޑަށް ބަދަލުވެފަ އެވެ.

ބޮޑުމިނުގައި ގާތްގަނޑަކަށް 26 ހެކްޓަރު ހުންނަ ކެލާގެ ޗަސްބިމުން ސަރަހައްދެއްގައި ނޭޗާ ޕާކެއް ހަދަން މިހާރު އަންނަނީ ތައްޔާރުވަމުންނެވެ. އެ މާހައުލާއި ދިރުންތައް ބަލައި އެތަން ތަޖުރިބާ ކުރަން ބޭނުންވާ މީހުންނަށް މަޑުކުރާނެ ތަނަކާއި ފާލަންތައް ހަދަން ނިންމާފައިވާ މި މަޝްރޫއުގެ އެއްބަޔަކީ ކަނޑޫފަލުގެ މަރުވެފައިވާ ސަރަހައްދުގައި އަލުން ގަސް އިންދައި އާލާ ކުރުމެވެ.