ޕެންޝަން އޮފީހަށް ސީއީއޯއަކު އައްޔަންކުރުމުގެ މައްސަލަ ރަޖިސްޓްރާ ބަލައެއް ނުގަތް!

ޕެންޝަން އޮފީހުގެ ކުރީގެ ސީއީއޯ ޖޯން ސްޓެފަން ގްރިންޑަލް ވަޒީފާއާ ބެހޭ ޓްރައިބިއުނަލް އަށް ހުށަހެޅި މައްސަލަ ނިމެންދެން އެ މަގާމަށް މީހަކު އައްޔަން ނުކުރުމަށް ނެރުނު ވަގުތީ އަމުރު ޕެންޝަން އޮފީހުން އިސްތިއުނާފަށް ހުށަހެޅުމުން މައްސަލަ ބަލައިނުގަތުމަށް ހައި ކޯޓުގެ ރަޖިސްޓްރާ މިއަދު ނިންމަވައިފި އެވެ.

އިނގިރޭސި ރައްޔިތެއް ކަމަށްވާ ގްރިންޑަލް ސީއީއޯގެ މަގާމުން ވަކިކުރީ، ޕެންޝަން އޮފީހުން ބުނެފައިވާ ގޮތުގައި، ސުލޫކީ މައްސަލައެއްގަ އެވެ.

ޓްރައިބިއުނަލަށް ގްރިންޑަލް މައްސަލަ ހުށަހެޅުއްވީ އޭނާގެ ވަޒީފާ އިޔާދަކޮށްދީ، ވަކިކުރި މުއްދަތުން ފެށިގެން މުސާރަ އާއި އިނާޔަތްތައް ހޯއްދެވުމަށެވެ. މި މައްސަލަ ޓްރައިބިއުނަލް އިން މި މަހުގެ 16 ގައި ނިންމީ އޭނާއާ އެއްކޮޅަށެވެ.

ޓްރައިބިއުނަލް އިން ނެރުނު އަމުރުގައި ވަނީ އޭނާ ހުށަހެޅުއްވި ވަޒީފާ އިން ވަކިކުރި މައްސަލައިގައި ގޮތެއް ނިމެންދެން އެ މަގާމަށް މީހަކު އައްޔަން ނުކުރުމަށާއި ވޯކް ވިސާ ކެންސަލް ނުކުރުމަށެވެ. އެކަމަކު ޓްރައިބިއުނަލް އިން ނިންމާފައި ވަނީ އޭނާ މަގާމުން ވަކިކުރި މައްސަލައިގައި ގޮތެއް ނިންމަންދެން އެ މަގާމަށް މީހަކު އައްޔަން ނުކުރުމަށެވެ.

ވޯކް ވިސާ މައްސަލައިގައި ނިންމީ ކެންސަލް ނުކުރުމުގެ އަމުރެއް ނެރެދެވެން ނެތް ކަމަށެވެ. އެއީ މައްސަލަ ހުށަހެޅި ފަރާތުގެ ވޯކް ވިސާ ކެންސަލްކުރެވި ރާއްޖެ އިން ބޭރަށް ފުރައިގެން ދިޔަ ނަމަވެސް މައްސަލަ ހުށަހެޅި ފަރާތުގެ މަސްލަހަތަށް އުނި ކަމެއް އަންނާނެ ސަބަބެއް އޮތް ކަމަށް ބުރަ ނުވެވޭތީ ކަމަށް ހުކުމުގައި ވެ އެވެ.

މި ނިންމުމާ މެދު ހިތްހަމަނުޖެހިގެން ޕެންޝަން އޮފީހުން ހައި ކޯޓަށް ހުށަހެޅި މައްސަލައިގައި ބުނީ ވަޒީފާއާ ބެހޭ ޓްރައިބިއުނަލް އިން ސީއީއޯއަކު އައްޔަންކުރުން ހުއްޓުވައި ނެރުނު ވަގުތީ އަމުރު، ސުޕްރީމް ކޯޓުގެ އަމުރަކާ ހިލާފު ކަމަށެވެ.

ޓްރައިބިއުނަލް އިން ހަވާލާ ދިން އަމުރުގައި ބުނެފައި ވަނީ "އިސްތިއުނާފް ރައްދުވާ ފަރާތުން އަދާކުރަމުން ދިޔަ މަގާމަށް ދާއިމީ މުވައްޒަފަކު އައްޔަންކުރުމަކީ އިސްތިއުނާފް ރައްދުވާ ފަރާތުގެ ވަޒީފާ އަނބުރާ ރުޖޫއަކުރަން ޖެހޭ ހާލަތުގައި އެކަން ކުރުމަށް ގާނޫނީ ގޮތުން ނުވަތަ މާއްދީ ގޮތުން ހުރަހެއް އޮތް ކަމެއް ނޫން ކަމަށާއި ދާއިމީ މުވައްޒަފެއް އައްޔަންކުރި ނަމަވެސް އިސްތިއުނާފް ރައްދުވާ ފަރާތުގެ މަސްލަހަތަށް އަންނާނެ އުނިކަމެއް ނުވަތަ ގެއްލުމެއް ނެތް" ކަމަށެވެ.

އެކަމަކު ހައި ކޯޓުން މިއަދު ނެރުނު އަމުރުގައި ބުނަނީ މައްސަލަ ނިމުމުގެ ކުރިން މަގާމަށް ދާއިމީ މުވައްޒަފަކު އައްޔަންކޮށްފި ނަމަ މައްސަލަ ރައްދުވާ ފަރާތަށް ވަޒީފާ އަނބުރާ ދިނުމަށް އަމުރުކުރާ ހާލަތުގައި އެ ފުރުސަތު މުޅިން ގެއްލިގެން ގޮސް އެކަމަކީ އިސްތިއުނާފް ރައްދުވާ ފަރާތަށް އިޔާދަނުކުރެވޭނެ ފަދަ ގެއްލުމެއް ލިބިދާނެ ކަމެއް ކަމަށެވެ. އެހެންކަމުން ޕެންޝަން އޮފީހުން ހުށަހެޅި މައްސަލަ ބަލައިގަނެވެން ނެތް ކަމަށެވެ.

ޕެންޝަން އޮފީހުގެ ސީއީއޯ ވަކިކުރީ މުވައްޒަފަކަށް ޖިންސީ ފުރައްސާރަކުރި ކަމުގެ ތުހުމަތު ވެސް ފެންމަތިވެފައި ވަނިކޮށެވެ. އެކަމަކު މި ވާހަކަ ދޮގުކޮށް އޭނާ ވަނީ ދޮގު ތުހުމަތުތަކަކުން އަބުރަށް ގެއްލުން ލިބިފައިވާ ކަަމަށް ވިދާޅުވެ ބަދަލަށް ވެސް އެދިވަޑައިގެންފަ އެވެ.

ޕެންޝަން އޮފީހުގެ ސީއީއޯއަކަށް އޭނާ އައްޔަން ކުރުމުން ފާޑުކިއުން ވެސް އަމާޒުވި އެވެ. ރާއްޖޭގެ އިސް މަގާމެއް ބޭރުގެ މީހަކަށް ދިނުމުގެ ހިތްހަމަނުޖެހުންތަކާ އެކުގަ އެވެ. ސީއީއޯގެ މަގާމަށް ގްރިންޑަލް އައްޔަންކުރީ ގިނަ ދުވަސްތަކެއް ވަންދެން އެ މަގާމުގައި ހުންނެވި މުހައްމަދު ހުސައިން މަނިކު ރިޓަޔާ ކުރެއްވުމުންނެވެ. އޭނާ އައްޔަން ކުރަންދެން ޕެންޝަން އޮފީސް ހިންގަވަމުން ގެންދެވީ ވަގުތީ ސީއީއޯގެ ގޮތުން ފާތުމަތު ސުޖާތާ ހަލީމެވެ.

ގްރިންޑަލް ވަކިކުރި ފަހުން އެތަނަށް ސީއީއޯ އަކު އަދި އައްޔަނެއް ނުކުރެ އެވެ.