ފައިސާ އަށް ވުރެ ކޮންޓެންޓް މާ މުހިއްމު: އަޔޫޝްމަން

އެއްވެސް އިރެއްގައި ފިލްމަކަށް ސޮއިކުރާ އިރު، އެ ފިލްމުން ލިބޭ މާލީ މަންފާ އާއި ބޮކްސް އޮފީހުގައި ފިލްމުކުރާ ވިޔަފާރިއާ ދޭތެރޭ ނުވިސްނާ ކަމަށް ބޮލީވުޑްގެ ކާމިޔާބު އެކްޓަރު އަޔޫޝްމަން ކްރާނާ ބުނެފި އެވެ.

އާންމުކޮށް ހަދާ ބޮލީވުޑްގެ ފިލްމުތަކާ ހިލާފަށް، މުޅިން ވެސް އޯޑިއަންސާ ބީރައްޓެހި ކޮންސެޕްޓަތަކަށް ހަދާ ފިލްމުތައް ކުޅެގެން އާންމުންގެ ލޯބި ހޯދި 37 އަހަރުގެ އެކްޓަރު ބުނި ގޮތުގައި އަބަދުވެސް ފިލްމުތަކަށް ސޮއިކުރަނީ ސްކްރިޕްޓް ކިޔާފައި އޭގެ ވާހަކަ ކަމުދާ ނަމަ އެވެ.

"އަހަންނަށް އަބަދުވެސް އެންމެ ހާއްސަ އެއްޗަކީ ޕްލޮޓްލައިން. ސްކްރިޕްޓަކަށް އަހަރެން ރުހުން ދެނީ އެ ކިޔާފައި އެ ކޮންޓެންޓަކީ އަހަންނަށް ކަމުދާ އެއްޗަކަށް ވާ ނަމަ. ހާއްސަކޮށް ޓިޕިކަލް ފިލްމުތަކަށް ވުރެ ބޮޑަށް ކަމުދަނީ ތަންކޮޅެއް އަންކޮންވެންޝަނަލް ކޮންސެޕްޓްތަކަށް ހަދާ އެއްޗެހި." އަޔޫޝްމަން ބުންޏެވެ.

އޭނާ ބުނި ގޮތުގައި ކެރިއަރުގައި މިހާތަނަށް ކުޅުނު ކޮންމެ ފިލްމަކީ ވެސް ތަފާތު އެއްޗިއްސެވެ. އަދި ބެލުންތެރިން އޭނާ ބަލައިގަތީ ވެސް ސިފަ ރީތި އެކްޓަރަކަށް ވުރެ ބޮޑަށް، ތަފާތު ކޮންޓެންޓްގެ ފިލްމުތައް ކުޅޭ އެކްޓަރެއްގެ ގޮތުގަ އެވެ.

"އަހަންނަކީ ހަމައެކަނި ފިލްމުތަކުން ލިބޭ މަންފާއަކަށް ފިލްމު ކުޅޭ މީހެއް ނޫން. އަހަރެން އަބަދުވެސް ބޭނުން ވަނީ މުޖުތަމައު ތެރޭގައި އާންމުކޮށް ނުދެވޭ ކަހަލަ ވާހަކަތަކަށް ހަދާ ފިލްމުތައް ކުޅެން. އޭގެ ސަބަބުން މުޖުތަމައަށް ހެޔޮ ބަދުލުތަކެއް ވެސް ގެނުވާ." ނެޝަނަލް އެވޯޑް ހާސިލުކޮށްފައިވާ އަޔޫޝް ބުންޏެވެ.

އޭނާ ބުނީ މިހާތަނަށް މުޅިން ވެސް ކެރިއަރުގައި ނަގާފައި ހުންނާނީ ރިސްކް ކަމަށާއި އަދި އެންމެ ބޮޑު ރިސްކަކީ މި މަހުގެ 10 ގައި ރިލީޒްކުރި "ޗަންދީގަޅް ކަރޭ އާޝިގީ" ކަމަށެވެ. އެ ފިލްމުގައި އަޔޫޝްމަން ކުޅެފައި ވަނީ ނޭނގި ޓްރާންސްޖެންޑާ އަންހެނެއް ދެކެ ލޯބިވެވޭ ޓްރެއިނަރެއްގެ ރޯލެވެ.

"ވަރަށް އުފާ ވެސް ކުރަން އެ ފިލްމު ކުޅެވުނީތީ. ޔަގީނުން ވެސް ބެލުންތެރިން މިހާރު އަހަރެންގެ ފަރާތުން އުންމީދު ވެސް ކުރާނީ މި ކަހަލަ ބީރައްޓެހި ކޮންސެޕްޓްތަކުގެ ފިލްމުތައް." އަބީޝެކް ކަޕޫރް ޑައިރެކްޓްކިރި ފިލްމާ ބެހޭ ގޮތުން އޭނާ ބުންޏެވެ.

އަޔޫޝްމަން ބުނި ގޮތުގައި އެއްވެސް ރޯލަކީ އޭނާ އަށް ކުޅެން ނުކެރޭނެ އަދި ޖެހިލުންވާނެ ކަހަލަ ރޯލަކަށް ނުވާނެ އެވެ.

"އަހަންނަކީ އެކްޓަރެއް. އެހެންވީމަ ވަކި ކަހަލަ ރޯލެއް ނުކުޅުމުގެ އިހުތިޔާރެއް ވެސް އޮވެގެން ނުވާނެ. އެއީ އަހަރެން ގަބޫލުކުރާ އުސޫލަކީ." އޭނާ ބުންޏެވެ.

ދެހާސް ބާރައިގެ "ވިކީ ޑޯނާ" އިން ބޮލީވުޑަށް ނުކުމެ ދެ ކުދިންގެ ބައްޕަ ކުޅުނު ފިލްމުތަކުގެ ތެރޭގައި "ދަމް ލަގާ ކޭ ހައިޝާ"، "ޝުބް މަންގަލް ސާވްދާން"، "އަންދާދުން"، "ބަދާއީ ހޯ" "ޑްރީމް ގާލް"، "ބާލާ" އަދި "އާޓިކަލް 15" ފަދަ ފިލްމުތައް ހިމެނެ އެވެ. އަޔޫޝްމަންގެ ކުރިއަށް ހުރި ފިލްމުތަކުގެ ތެރޭގައި "ޑޮކްޓަރު ޖީ" އާއި "އަނޭކް" އަދި "އެކްޝަން ހީރޯ" ހިމެނެ އެވެ.