ނިއުކްލިއާ މަޝްވަރާތައް ނާކާމިޔާބުވުމުގެ ބިރު ބޮޑު

ވިލާތުގެ ގައުމުތަކާއި އެމެރިކާ އިން އީރާނާ އެކުގައި 2015 ވަނަ އަހަރު ގާއިމުކުރި ނިއުކްލިއާ މުއާހަދާ އަށް އަލުން އަމަލުކުރަން ފެށުމާ ގުޅޭ ގޮތުން، އޮސްޓްރިއާގެ ވިއެނާގައި މިހާރު ކުރިއަށް ދާ މަޝްވަރާތައް ނާކާމިޔާބު ވުމުގެ ފުރުސަތު ބޮޑުކަމަށް، ކަމާ ގުޅުން ހުރި ބައެއް ޑިޕްލޮމޭޓުން ވިދާޅުވާން ފަށައިފި އެވެ.

އދ.ގެ މަޖިލީހުގައި ހުންނަވާ ފަރަންސޭސި ސަފީރު އާލް ނިކޮލައި ޑި ރޭވޭ ވިދާޅުވި ގޮތުގައި އީރާންގެ ނިއުކްލިއާ މުއާހަދާ އަށް އަމަލު ކުރުމުގެ ދޮރު އަދިވެސް ހުރީ ހުޅުވިފަ އެވެ. ނަމަވެސް، އެކަމާ ބެހޭ ގޮތުން ވަކި ގޮތަކަށް އެއްބަސް ނުވެވިގެން އުޅޭއިރު، އެކަމަށްޓަކައި ހިނގަން އޮތް މަގުގެ ނިމޭ ހިސާބާ ކައިރިވަމުން އަންނަ ކަމަށް ވެސް އޭނާ ވިދާޅުވި އެވެ.

މަޝްވަރާތައް ވަކި ކޮޅެއްގައި ނުޖެހިގެން އުޅޭ އިރު، ނިއުކްލިއާ މުއާހަދާ އިން 2018 ވަނަ އަހަރު އެމެރިކާ ވަކިވުމާ އެކު، އީރާނުން ވަނީ އެ ގައުމުގެ ނިއުކްލިއާ މަޝްރޫއު އިތުރަށް ތަރައްގީ ކުރަން ފަށައިފަ އެވެ. ބައެއް ތަޖުރިބާކާރުން ބުނާ ގޮތުގައި، ނިއުކްލިއާ މުއާހަދާ އިން އެމެރިކާ ވަކިވުމާ އެކު، އީރާނުން ވަނީ ޔޫރޭނިއަމް ފައްކާކުރުމުގެ މަސައްކަތް ވަރަށް ބޮޑަށް ކުރިއަށް ގެންގޮސްފަ އެވެ.

ނިއުކްލިއާ މަޝްވަރާތަކާ މެދު ފަރަންސޭސި ވިލާތުން ކަންބޮޑުވުން ފާޅުކޮށްފައިވާ އިރު، އީރާނުން ބުނަމުން އަންނަނީ، އދ.ގެ އެޓޮމިކް ހަކަތައާ ބެހޭ އިދާރާ އާއި އީރާނާ ދެމެދު ވަރަށް އަވަހަށް އެއްބަސްވުމަކަށް އާދެވޭނެ ކަމަށެވެ. އީރާނު ޓީވީން ބުނި ގޮތުގައި އެ ގައުމުގެ ނިއުކްލިއާ އިދާރާގެ ވެރިޔާ މުހައްމަދު އިސްލާމީ އާއި އދ.ގެ އެޓޮމިކް ހަކަތައާ ބެހޭ އިދާރާގެ ވެރިޔާއާ ދެމެދު ކުރެވުނު މަޝްވަރާތަކުން މިހާރު ވަނީ ކުރިއެރުންތަކެއް ލިބިފަ އެވެ.

ދެ ބޭފުޅުންގެ މެދުގައި ކުރެވުނު މަޝްވަރާތަކުން، އީރާންގެ ނިއުކްލިއާ މަޝްރޫއާ ގުޅޭ ގޮތުން ދެ ފަރާތުގެ މެދުގައި ހުރި ކަންބޮޑުވުންތަކަށް އެކަށީގެންވާ ހައްލެއް ހޯދުމާ ވަރަށް ކައިރިއަށް އާދެވިއްޖެ ކަމަށް ވެސް އީރާން ޓީވީން ބުންޏެވެ.

އަނެއްކޮޅުން ފަރަންސޭސި ވިލާތާއި އިނގިރޭސި ވިލާތް އަދި ޖަރުމަން ވިލާތުން ތުހުމަތު ކުރާ ގޮތުގައި، ނިއުކްލިއާ މަޝްވަރާތަކުން ނަތީޖާއެއް ހާސިލް ނުކުރެވެނީ އީރާނުން ގޮތް ދޫނުކުރުމުގެ ސިޔާސަތެއް ގެންގުޅޭތީ އެވެ. ފަރަންސޭސި ސަފީރު ވިދާޅުވި ގޮތުގައި އީރާނަށް މިހާރު އޮތީ ދެ ގޮތުން ކުރެ އެއް ގޮތެވެ.

އެއީ ނިއުކްލިއާ މުއާހަދާގެ ހުރިހާ ބައިވެރިން ޝާމިލްވާ ފަދަ އެއްބަސްވުމެއް ގަބޫލު ކުރުން ނުވަތަ ނިއުކްލިއާ މުއާހަދާ ނާކާމިޔާބު ވާން ދޫކޮށްލުމެވެ. އީރާނުން ނިއުކްލިއާ މަޝްރޫއު އިތުރަށް ތަރައްގީ ކުރުމަކީ، އެއްބަސްވުމަކާ ހަމައަށް ވާސިލުވުމަށްޓަކައި މިހާރު ދަތުރުކުރަމުންދާ މަގު ބެދުން ކަމަށް ވެސް ފަރަންސޭސި ސަފީރު ވިދާޅުވި އެވެ.