ނިއުކްލިއާ އޭޖެންސީގެ މަންދޫބުންގެ ހުއްދަ އީރާނުން ބާތިލުކޮށްފި

އީރާންގެ ނިއުކްލިއާ ޕްރޮގްރާމްގެ ހަރަކާތްތައް ހިނގާ ގޮތް ބަލައި ފާރަވެރިވުމަށް، އިންޓަނޭޝަނަލް އެޓޮމިކް އެނާޖީ އޭޖެންސީ (އައިއޭއީއޭ)ގެ ފަރާތުން އެ ގައުމަށް ފޮނުވާފައި ތިބި ނިއުކްލިއާ ތަޖުރިބާކާރުންގެ ތެރެއިން ގިނަ ބައެއްގެ ހުއްދަ، އީރާނުން ބާތިލުކޮށްފި އެވެ.

އައިއޭއީއޭ އިން ބުނި ގޮތުގައި އީރާންގެ ނިއުކްލިއާ އެކުވެނިތަކުގައި ހަރަކާތްތައް ހިނގާ ގޮތް ބެލުމަށް ފޮނުވާފައި ތިބި ކަމާ ބެހޭ ތަޖުރިބާކާރުންގެ ތެރެއިން ތިން ބައިކުޅަ ދެ ބައި މީހުން، އީރާންގައި ހަރަކާތްތެރިވުމަށް އެ ގައުމުން ދޫކޮށްފައިވާ ހުއްދަ މިހާރު ވަނީ ބާތިލުކޮށްފަ އެވެ. އެހެންކަމުން، އެ މީހުންގެ ވާޖިބު އަދާކުރުމަށް ހުރަސްއެޅިފައިވާ ކަމަށް އެ އިދާރާ އިން ބުނެ އެވެ.

އދ.ގެ ތަޖުރިބާކާރުންގެ ޓީމާ ދެކޮޅަށް އީރާނުން ފިޔަވަޅު މި އެޅީ، އީރާންގައި ނިއުކްލިއާ ދިރާސާތައް ނުކުރާ ސަރަހައްދުތަކަކުން ޔޫރޭނިއަމްގެ އަސަރު ފެނިފައިވާތީ، އެކަމުގެ ހަގީގަތް ސާފުކޮށްދިނުމަށް އެ އިދާރާގެ ފަރާތުން އީރާން ސަރުކާރަށް އަންގާފައި ވަނިކޮށެވެ.

އީރާންގެ އެ ނިންމުމާ ގުޅިގެން އައިއޭއީއޭގެ ވެރިޔާ ރަފައޭލް ގްރޮސީ ވިދާޅުވީ، އީރާންގެ އެ އަމަލަކީ، އެ އިދާރާގެ އެންގުމާ ނުބައްދަލު އަދި މީގެ ކުރިން އީރާނުން އަޅާފައިނުވާ ފިޔަވަޅެއް ކަމަށެވެ. އެހެންކަމުން އީރާނުން އަމިއްލައަށް ނިންމި ނިންމުން ކުށްވެރި ކުރާ ކަމަށާއި، އީރާނުގެ އެ ނިންމުމަކީ އެ އިދާރާ އާއި އީރާނާ ދެމެދު ވެފައިވާ އެއްބަސްވުމާ ވެސް ޚިލާފު ކަމެއްކަމަށް އޭނާ ވިދާޅުވި އެވެ.

އެހެންކަމުން، ވީއެންމެ އަވަހަކަށް އެ ނިންމުން މުރާޖައާ ކުރުމަށް ފަހު، އިހު އޮތް ހާލަތަށް އެނބުރި ރުޖޫއަވުމަށް އޭނާ ވަނީ އީރާން ސަރުކާރަށް ގޮވާލައްވައިފަ އެވެ. ރަފައޭލް ވިދާޅުވީ އީރާނުން ފުރިހަމައަށް އެއްބާރުލުން ނުދީ، އދ.ގެ ފަރާތުން އެ އިދާރާއާ މަތިކޮށްފައިވާ ޒިންމާތައް އަދާނުކުރެވޭނެ ކަމަށެވެ.

އެ އިދާރާ އިން މިދިޔަ ހަފުތާގައި ތައްޔާރުކުރި، އަދި މިހާތަނަށް އާންމު ނުކުރާ ރިޕޯޓެއްގައި ބުނެފައިވާ ގޮތުގައި، އީރާންގެ ނިއުކްލިއާ ޕްރޮގްރާމާ ގުޅޭ ގޮތުން އެ ގައުމާއި އައިއޭއީއޭ އާ ދެމެދު ވެފައިވާ އެއްބަސްވުމަށް އަލުން އަމަލުކުރުމުގެ މައްސަލައިގައި މާ ބޮޑު ކުރިއެރުމެއް ނުލިބެ އެވެ.

އެ ގޮތުން އެ އިދާރާ އިން ފާހަގަކުރި އެއް ކަމަކީ، އީރާންގެ ނިއުކްލިއާ އެކުވެނިތަކުގައި އެ އިދާރާގެ ފަރާތުން ހަރުކޮށްފައި ހުއްޓައި އީރާން ސަރުކާރުން ނައްޓައިލި ސީސީޓީވީ ކެމެރާތައް އަލުން ހަރުކުރުމުގެ މައްސަލަ އެވެ. އެ ކެމެރާތައް އަލުން ހަރުކުރުމުގެ ހުއްދަ ދިނުމަށް އީރާން ސަރުކާރުން ނިންމައި އެކަން އިއުލާންކޮށްފައި ވިޔަސް، އެކަން މިހާތަނަށް ފުރިހަމަ ނުކުރާ ކަމަށް އެ އިދާރާ އިން ބުންޏެވެ.

އީރާނުން އެކަމުގައި އެއްބާރުނުލުން ނުދޭ ނަމަ، އެ ގައުމުގެ ނިއުކްލިއާ ޕްރޮގްރާމަކީ ހަތިޔާރުގެ ބަދަލުގައި ހަކަތަ އުފެއްދުމަށް ހިންގާ މަދަނީ އަދި ސުލްހަވެރި ޕްރޮގްރާމެއް ކަމަށް ގަބޫލުކުރުމުގެ ފުރުސަތު ކުޑަ ކަމަށް ވެސް އައިއޭއީއޭ އިން ބުނެ އެވެ. އީރާން ސަރުކާރުގެ އެއްބާރުލުން ހޯދުމުގެ ގޮތުން މި އަހަރު މާޗް މަހުގެ ތެރޭގައި ވެސް ރަފައޭލް އީރާނަށް ވަޑައިގެން އެ ގައުމުގެ ކަމާ ބެހޭ ވެރިންނާ ބައްދަލުކުރައްވައި މަޝްވަރާ ކުރެއްވި އެވެ.

ނަމަވެސް އެ މަޝްވަރާތަކުން އެދެވޭ ނަތީޖާއެއް ނުނެރެވުނު ކަމަށް އޭނާ ވިދާޅުވި އެވެ. އެމެރިކާ އާއި ހުޅަނގުގެ ގައުމުތަކުން ތުހުމަތުކުރާ ގޮތުގައި އީރާންގެ ނިއުކްލިއާ ޕްރޮގްރާމަކީ ނިއުކްލިއާ ހަތިޔާރު އުފެއްދުމަށް ހިންގާ ޕްރޮގްރާމެކެވެ. ނަމަވެސް އީރާނުން ތުހުމަތުކުރާ ގޮތުގައި އެއީ ހަކަތަ އުފެއްދުމަށް ހިންގާ ޕްރޮގްރާމެކެވެ.