އައިޖީއެމްއެޗުގެ ކުޑަކުދިންގެ ވޯޑު ފުރިއްޖެ

އައިޖީއެމްއެޗްގައި ކުޑަކުދިންނަށް ހާއްސަކޮށްފައިވާ ވޯޑު ފުރި، އިމަޖެންސީ ރޫމް ބޭނުންކުރަން ޖެހިއްޖެ އެވެ.

އެ ހޮސްޕިޓަލުގެ ކުޑަކުދިންގެ ޑޮކްޓަރު، ޑރ. އަހުމަދު ފައިސަލް ރޭ ކުރެއްވި ޓްވީޓުގައި ވިދާޅުވީ އެ ވޯޑުގެ 32 އެނދު ފުރި ބައެއް ކުދިން އިމަޖެންސީ ރޫމްގައި އެޑްމިޓްކޮށްފައިވާ ކަމަށެވެ.

އެކަން ހައްލުވާނީ އެހެން ރަށްރަށާއި މާލެ ސަރަހައްދުގެ ސަރުކާރުގެ އެހެނިހެން ތަންތަނުގައި ބަލިތަކަށް ފަރުވާދެވިގެން ކަމަށް އޭނާ ވިދާޅުވި އެވެ.

ކުޑަކުދިންގެ ވޯޑް ފުރުނު ނަމަވެސް، ސީރިއަސް ވާންޖެހޭ ބޮޑު ކަމެއް ނެތެވެ.

"ތަފާތު އެކި ބަލިތަކަށް ފަރުވާ ދިނުމަށް އެޑްމިޓްކޮށްފައިވަނީ،" ޑރ. ފައިސަލް ވިދާޅުވި އެވެ.

އައިޖީއެމްއެޗަކީ ފަރުވާތަކަށް އާސަންދައިން 100 ޕަސެންޓް ކަވަރުކުރާ މާލޭގައި ހުންނަ ހަމައެކަނި ހޮސްޕިޓަލެވެ.

ސަރުކާރުން ހިންގާ ހުޅުމާލޭގެ ހޮސްޕިޓަލްގައި ވެސް ކުޑަކުދިންގެ ބަލިތަކަށް ހާއްސަ ޑޮކްޓަރުން ތިއްބަސް، ކުޑަކުދިންނާ ގުޅޭ އެކި ބަލިތަކަށް ހާއްސަ ސުޕަ-ސްޕެޝަލިސްޓް ޑޮކްޓަރުން ނެތެވެ. އޭގެ ސަބަބުން އައިޖީއެމްއެޗަށް ބާރުބޮޑުވެގެންދެ އެވެ.