ތިމާވެއްޓަށް ގެއްލުންވާ ގޮތަށް ރިސޯޓް ހަދާތީ 500،000ރ. ގެ ޖޫރިމަނާއެއް

ވ. ވަށުގިރި ރިސޯޓް ތަރައްގީ ކުރުމުގެ މަޝްރޫއުގެ ބައެއް ތިމާވެއްޓަށް ގެއްލުން ލިބޭ ގޮތަށް ކޮށްފައިވާތީ އެ ރިސޯޓު ހަދާ ކުންފުނި ފަސް ލައްކަ ރުފިޔާ އިން ޖޫރިމަނާކޮށްފި އެވެ.

އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އިން މިއަދު ނެރުނު ބަޔާނެއްގައި ބުނީ ވަށުގިރި ޕްރައިވެޓް ލިމިޓަޑް އިން ހިންގާ އެ މަޝްރޫއުގެ ބައެއް މަސައްކަތްތައް ކޮށްފައި ވަނީ ތިމާވެއްޓަށް އަސަރު ފޯރާ މިންވަރު ބަޔާން ކުރާ ރިޕޯޓާ ހިލާފަށް ކަމަށެވެ. އެހެންކަމުން އެ ކުންފުނި 593،750ރ. އިން ޖޫރިމަނާ ކުރަން އިއްޔެ ނިންމާފައިވާ ކަމަށެވެ.

މި ފައިސާ 30 ދުވަސް ތެރޭގައި ދައްކަން ވެސް ރިސޯޓް ހިންގާ ކުންފުންޏަށް އީޕީއޭ އިން ވަނީ އަންގައިފަ އެވެ.

އީޕީއޭގެ ޑިރެކްޓަ ޖެނެރަލް މުހައްމަދު ނައީމް "މިހާރު" އަށް ވިދާޅުވީ ތިމާވެއްޓަށް ގެއްލުންވާ ގޮތަށް ބައެއް ކަންކަން ކޮށްފައިވާ ކަން ފާހަގަވެފައި ވަނީ ޓޫރިޒަމް މިނިސްޓްރީން ހިންގި އިންސްޕެކްޝަނެއް ތެރެއިން ކަމަށެވެ. އެކަމަކު އެ ތަފްސީލުތަކެއް ނައީމް ހިއްސާއެއް ނުކުރެއްވި އެވެ.

އޭނާ ވިދާޅުވި ގޮތުގައި އެ ރިސޯޓު ތަރައްގީ ކުރުމަށް ހެދި އީއައިއޭ ރިޕޯޓާ ހިލާފަށް ގިނަަ ކަންކަން ވަނީ ކޮށްފަ އެވެ.

އީޕީއޭ އިން ދާދި ފަހުން ވަނީ އދ. މާފުށިވަރު ރިސޯޓުގެ މަސައްކަތް ވެސް އީއައިއޭ ރިޕޯޓާ ހިލާފަށް ކޮށްފައިވާތީ 400،000ރ. އިން ޖޫރިމަނާ ކޮށްފަ އެވެ.