މަޑިފުށީގެ ގޮނޑުދޮށް ހިމާޔަތް ކުރުމުގެ މަސައްކަތް ގަވާއިދާ ހިލާފަށް ކުރުމުން ޖޫރިމަނާކޮށްފި

ރިސޯޓެއްގެ ގޮތުގައި ހިންގަމުން އަންނަ މ. މަޑިފުށި ގޮނޑުދޮށް ހިމާޔަތް ކުރުމާއި ގޮނޑުދޮށް ހެދުމުގެ މަސައްކަތްތައް ގަވައިދާ ހިލާފަށް ކޮށްފަައި ވާތީ އެ ރިސޯޓް ހިންގާ ކުންފުނި 20،000ރ. އިން ޖޫރިމަނާކޮށްފި އެވެ.

މަޑިފުށި ރިސޯޓް އޮޕަރޭޓް ކުރާ މޯލްޑިވްސް އިންފްލައިޓް ކޭޓަރިން ޕްރައިވެޓް ލިމިޓެޑަކީ ހުޅުލެ އައިލެންޑް ހޮޓެލް (އެޗްއައިއެޗް) ވެސް ހިންގާ ކުންފުންޏެވެ.

ޖޫރިމަނާކުރި ސަބަބަކީ އީޕީއޭ އިން ބުނިގޮތުގައި، އީއައިއޭ ފުރިހަމަ ނުކުރުމާއި ތިމާވެށީގެ ކްލިއަރެންސް ނުހޯދައި ކުރި މަސައްކަތްތަކާ ގުޅިގެންނެވެ. ޖޫރިމަނާކުރީ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުން ލިބިދޭ ބާރުގެ ދަށުންނ ކަމަށް ވެސް އެ އިދާރާ އިން ބުންޏެވެ. ސަރުކާރު ބަންދު ދުވަސްތައް ހިމަނައިގެން 30 ދުވަހުގެ ތެރޭގައި ޖޫރިމަނާ ފައިސާ ދައްކަން އީޕީއޭ އިން ވަނީ މޯލްޑިވްސް އިންފްލައިޓް ކޭޓަރިން އަށް އަންގައިފަ އެވެ.

މަޑިފުށި ޕްރައިވެޓް އައިލެންޑް ރިސޯޓަކީ މި އަހަރު ހުޅުވި ފުރަތަމަ ރިސޯޓެވެ. އެއީ ވަރަށް ބޮޑަށް ތިމާވެއްޓާ ގުޅުވައިގެން ހަދާފައިވާ ރިސޯޓެކެވެ. އެ ރިސޯޓުގައި 80 ބީޗް އަދި އޯވާ ވޯޓާ ވިލާ ވަނީ ހަދައިފަ އެވެ.