އީރާނުން ވައްޓައިލި ބޯޓުގެ މީހުންނަށް 84 މިލިއަން ޑޮލަރުގެ ބަދަލެއް

އީރާން ސިފައިން ދިން މިސައިލް ހަމަލާއެއްގައި ވެއްޓުނު ޔޫކްރޭނުގެ މަތިންދާބޯޓުން ދަތުރުކުރި މީހުންގެ ތެރެއިން މަރުވި ކެނެޑާގެ ހަ މީހެއްގެ އާއިލާއަށް، އެ ހަ މީހުންގެ މަރުގެ ބަދަލުގެ ގޮތުގައި 84 މިލިއަން އެމެރިކާ ޑޮލަރު ދިނުމަށް، ކެނެޑާގެ ކޯޓަކުން އީރާންގެ މައްޗަށް، މިދިޔަ ޑިސެމްބަރު 31 ގައި ހުކުމްކޮށްފި އެވެ.

ޖެނުއަރީ 8، 2020 ގައި އީރާންގެ ވައިގެ ދިފާއީ ލަޝްކަރުން ދިން މިސައިލް ހަމަލާއެއްގައި، ޔޫކްރޭންގެ މަތިންދާބޯޓު ވެއްޓުމުގެ ހާދިސާގައި، އެ ބޯޓުން ދަތުރުކުރި 176 މީހުން ވަނީ މަރުވެފަ އެވެ. އޭގެ ތެރޭގައި ކެނެޑާގެ 55 ރައްޔިތަކާއި ކެނެޑާގެ ދާއިމީ ވިސާގައި ދިރިއުޅޭ 30 މީހުން ހިމެނެ އެވެ.

އީރާނުން ބުނެފައިވާ ގޮތުގައި އެ ބޯޓަށް މިސައިލް ހަމަލާއެއް ދެވުނީ، ސިފައިންނަށް އެރި ވަރަށް ބޮޑު އޮޅުމަކުންނެވެ. އެ ބޯޓަކީ ދުޝްމަނުންގެ ހަނގުރާމަމަތީ ބޯޓެއް ކަމަށް ހީކޮށް، މިސައިލެއް ފޮނުވައިލެވުނީ ކަމަށް ވެސް އީރާނުން ބުންޏެވެ.

ޔޫކްރޭންގެ އެ ބޯޓަށް އަމާޒުކޮށް މިސައިލެއް ފޮނުވައިލުމުގެ ކުރިން، އީރާންގެ ވައިގެ ދިފާއީ ނިޒާމުގެ ލަޝްކަރުން ވަނީ، އިރާގުގައި ތިބޭ އެމެރިކާ ސިފައިންގެ މަރުކަޒުތަކަށް އަމާޒުކޮށް މިސައިލް ހަމަލާތަކެއް ދީފަ އެވެ. އެ ހަމަލާތައް ދީފައި ވަނިކޮށް، ސިފައިންގެ އަސްކަރީ ރާޑަރުތަކަށް ފެނުނު ޔޫކްރޭން ބޯޓަކީ، އެމެރިކާ އިން ބަދަލު ހިފުމުގެ ގޮތުން އީރާންގެ ވައިގެ ސަރަހައްދަށް ވަދެ އުޅޭ އެމެރިކާގެ ބޯޓެއް ކަމަށް ގަބޫލުކުރެވުމުން، އެ ބޯޓަށް މިސައިލުން ހަމަލާ ދިނީ އެވެ.

އިރާގުގައި ތިބޭ އެމެރިކާ ސިފައިންގެ އަމާޒުތަކަށް އީރާނު ސިފައިން ހަމަލާތަކެއް ދިނީ، އޭގެ ދުވަސްކޮޅެއް ކުރިން ޖެނުއަރީ 3، 2020 ގައި އެމެރިކާގެ އަސްކަރީ ޑްރޯންތަކުން ދިން ހަމަލާއެއްގައި، އީރާންގެ އިންގިލާބީ ލަޝްކަރުގެ ކޮމާންޑަރު ޖެނެރަލް ގާސިމް ސުލައިމާނީ އަވަހާރަކޮށްލުމާ ގުޅިގެން، ބަދަލު ހިފުމުގެ ގޮތުންނެވެ.

ޔޫކްރޭންގެ މަތިންދާބޯޓުން ދަތުރުކުރި މީހުންގެ ތެރޭގައި ކެނެޑާގެ އިތުރުން، ޔޫކްރޭނާއި އިނގިރޭސި ވިލާތާއި ސްވިޑްން އާއި އަފްގާނިސްތާނު މީހުން ހިމެނެ އެވެ. އެ ހާދިސާއާ ގުޅިގެން މި ގައުމުތަކުން ވަނީ، އީރާން ޒިންމާދާރުކުރުމުގެ މަސައްކަތް ފަށައިފަ އެވެ.

މި މައްސަލަ ކެނެޑާގެ ކޯޓަށް ހުށަހެޅުމުން މިދިޔަ އަހަރުގެ މެއި މަހުގެ ތެރޭގައި އެ ކޯޓުން ނިންމާފައިވަނީ، އެ ހާދިސާއަކީ ޔޫކްރޭންގެ މަތިންދާބޯޓު ވައްޓައިލުމަށް އީރާނުން ގަސްދުގައި ހިންގި ޓެރަރިޒަމްގެ އަމަލެއް ކަމަށެވެ.

ކެނެޑާ ކޯޓުގެ އެ ނިންމުމަށް އީރާނުން ވަނީ ވަރަށް ބޮޑަށް ފާޑުކިޔައިފަ އެވެ. އީރާނުން ބުނީ އެއީ އެ ކޯޓުން ނިންމި ލަދުވެތި ނިންމުމެއް ކަމަށާއި، އެ ކޯޓަކީ ވައިގެ ދަތުރުފަތުރުގެ އެފަދަ ހާދިސާއެއްގައި ގޮތް ކަނޑައެޅުމަށް ކުފޫހަމަވާ ކޯޓެއް ނޫން ކަމަށެވެ.

އެ ހާދިސާގައި މަރުވި ކޮންމެ މީހެއްގެ އާއިލާއަށް 150،000 ޑޮލަރު ދިނުމަށް، 2020 ވަނަ އަހަރުގެ ފަހުކޮޅު އީރާނުން ވަނީ ނިންމައިފަ އެވެ.