ގުނަވަން ބަދަލުކުރުމާ ބެހޭ ގާނޫނުގެ ޑްރާފްޓް އޭޖީއަށް

އިންސާނުންގެ ގުނަވަން ބަދަލުކުރުމުގެ ހިދުމަތް ދިނުމަށް ބޭނުންވާ ގާނޫނު ޑްރާފްޓްކޮށް ކަމާބެހޭ ފަރާތްތަކަށް ފޮނުވާފައިވާ އައިޖީއެމްއެޗުން ބުނެފި އެވެ.

އައިޖީއެމްއެޗުން "މިހާރު" އަށް މިދިޔަ ހޯމަ ދުވަހު ލިޔުމުން ފޮނުވި ޖަވާބުގައި ބުނީ ގުނަވަން ބަދަލުކުރުމުގެ ހިދުމަތުގެ ރައްކާތެރިކަން ކަށަވަރުކުރުމަށް، އެ ހޮސްޕިޓަލާއި ސަރުކާރުން ބޭނުން ވަނީ ހިދުމަތް ފެށުމުގެ ކުރިން އެކަމާ ގުޅޭ ގާނޫނެއް ހަދާށެވެ.

އެ ގާނޫނުގެ ފުރަތަމަ ޑްރާފްޓް އެޓާނީ ޖެނެރަލް (އޭޖީ) އޮފީހާއި ހެލްތު މިނިސްޓްރީ އަށް ފޮނުވިތާ ދުވަސްތަކެއް ވީ ނަމަވެސް ތަންފީޒުކުރުމުގެ މަސައްކަތް ދަނީ މަޑުދުވެއްޔެއްގައި ކަމަށް އައިޖީއެމްއެޗުން ބުންޏެވެ.

ގުނަވަން ބަދަލުކުރުމުގެ ގާނޫނުގެ ޑްރާފްޓެއް ހެދިއިރު، ސަރުކާރުގެ މައި ހޮސްޕިޓަލުން އަންނަނީ ކިޑްނީ ޓްރާންސްޕްލާންޓް ހެދުމަށް ތައްޔާރުވަމުންނެވެ. މި އަހަރުގެ ތެރޭގައި އެ ހިދުމަތް ފެށުމަށް ކުރިން ނިންމި ނަމަވެސް، ކޮވިޑުގެ ސަބަބުން އެކަން ލަސްވެގެން ދިޔައީ އެވެ.

ހޮސްޕިޓަލުން ބުނީ ކޮވިޑާ ގުޅުންހުރި އެކި ކަންކަމުގައި އެ ހޮސްޕިޓަލްގެ ނަރުހުންނާއި ޑޮކްޓަރުން މެދުކެނޑުމެއްނެތި މަސައްކަތް ކުރަމުންދާތީ އެންމެ އެދެވޭ އަވަސްމިނެއްގައި ޓްރާންސްޕްލާންޓްގެ މަސައްކަތް ކުރިއަށްގެންދެވޭ ގޮތް ނުވާ ކަމަށެވެ.

އެކަމަކު، އެނގިފައިވާ ގޮތުގައި އައިޖީއެމްއެޗުން ތައްޔާރުވަމުން އަންނަނީ އަންނަ އަހަރުގެ ޖޫން މަހުގެ ތެރޭގައި ކިޑްނީ ޓްރާންސްޕްލާންޓް ހެދުމަށެވެ.

"މި ވަގުތު ވެސް ހޮސްޕިޓަލުން މި ހިދުމަތް ފެއްޓުމުގައި އިންޓާނަލްކޮށް މިކަމާ ގުޅޭ ޕްރޮޓޮކޯލްތައް އެކުލަވާލުމާއި ޓްރާންސްޕްލާންޓް ވޯޑްގެ މަސައްކަތް ފަރުމާކުރުމަށް ވާންޖެހޭ ތައްޔާރީތައް ކުރުމާއި މުވައްޒަފުން ތަމްރީންކުރުމަށްޓައި އިދާރީ ގޮތުން ކުރަންޖެހޭ މަސައްކަތް ދަނީ ކުރަމުންނެވެ،" އައިޖީއެމްއެޗުން ބުންޏެވެ.

އެހެން ގައުމުތަކުގައި ވެސް އިންސާނުންގެ ގުނަވަން ބަދަލުކުރަނީ ގާނޫނެއްގެ ދަށުންނެވެ.

ކިޑްނީގެ ބަލިތަކަށް ގިނަ އަދަދެއްގެ ދިވެހިން ފަރުވާ ހޯދަމުން އަންނަ އިރު، ދެ ކިޑްނީ ފެއިލްވެ އޮޕަރޭޝަނެއް ކުރަން ވެއްޖެ ނަމަ، ދާން ޖެހެނީ ރާއްޖޭން ބޭރަށެވެ. އެންމެ އާއްމުކޮށް، ކިޑްނީ ބަދަލުކުރުމުގެ އޮޕަރޭޝަންތައް ދިވެހިން ކުރަނީ، ސްރީ ލަންކާ އާއި އިންޑިއާ އިންނެވެ.

އެ ފަރުވާ އާސަންދައިން ކަވަރުކުރި ނަމަވެސް ރާއްޖެއިން ބޭރުގައި ގިނަ ދުވަސްވަންދެން ތިބުމަށް ބޮޑު ހަރަދެއް ހިނގަ އެވެ. އެހެންވެ، ރާއްޖޭގައި މި ހިދުމަތް ފެށުމަކީ އެތައް ބަޔަކަށް ލިބިގެންދާނެ ފަސޭހައެކެވެ.