ލަންކާ އިން ތެޔޮ ގަންނަން އިންޑިއާ އިން އެހީ ދެނީ

ކޮލަމްބޯ (ޖެނުއަރީ 20) - ސްރީ ލަންކާ އިން ޑޮލަރަށް ޖެހި މުދާ އިމްޕޯޓް ކުރާނެ ބޭރު ފައިސާ ނެތުމުން، ތެޔޮ ގަތުމަށްޓަކައި ލައިން އޮފް ކްރެޑިޓް (އެލްއޯސީ) ގެ ދަށުން 500 މިލިއަން ޑޮލަރު ދިނުމަށް އިންޑިއާ އިން އެއްބަސްވެއްޖެ އެވެ.

ސިލޯން އިލެކްޓްރިސިޓީ ބޯޑުން ބުނީ އެކި ގަޑިތަކުގައި ކަރަންޓް ކަނޑަމުން ދަނީ ޕަވަ ޕްލާންޓްތައް ހިންގާނެ ތެޔޮ ނެތުމުގެ ސަބަބުން ކަމަށެވެ. ކެލަނިޓިއްސާ ޕަވަ ޕްލާންޓް ކޮމްޕްލެކްސް އިއްޔެ އިން ފެށިގެން ވަނީ ބަންދުކޮށްފަ އެވެ. ސަބަބަކީ އެ ޕްލާންޓް ހިންގާނެ ތެޔޮ ނެތުމެވެ. އޭގެ ކުރިން ވަނީ ސަޕުގަސްކަންޑާ ޕަވަ ސްޓޭޝަނުގެ ޖަނަރޭޓަރެއް ވެސް ތެޔޮ ނުލިބިގެން ނިއްވާލަން ޖެހިފަ އެވެ.

އިންޑިއާ އިން ދޫކުރާ އެލްއޯސީއާ އެކު ލަންކާ ސަރުކާރުން ބުނެފައި ވަނީ ކަރަންޓް ކެނޑުމަށް ހުއްޓުމެއް ގެނެވޭވަރަށް ތެޔޮ އިމްޕޯޓް ކުރެވޭނެ ކަމަށެވެ. ސިލޯން ޕެޓްރޯލިއަން ކޯޕަރޭޝަން އިން ބުނެފައި ވަނީ ކަރަންޓް އުފައްދަން ބޭނުންވާ ވަރަށް މި މަހު 22 އާ ހަމައަށް ތެޔޮ ސަޕްލައިކޮށްދޭނެ ކަމަށެވެ.

ލަންކާގެ ބޭރު ފައިސާގެ ރިޒާވް ދަށަށް ގޮސް ބޭރުން ތަކެތި ގެނައުމަށް ވަނީ ބޮޑެތި ދަތިތަކާ ކުރިމަތިލާން ޖެހިފަ އެވެ. ނޮވެމްބަރު މަސް ނިމުނުއިރު ލަންކާގެ ފޮރިން ރިޒާވް އަކީ 1.58 ބިލިއަން ޑޮލަރެވެ. ރައީސް ގޯޓާބޭ ރާޖަޕަކްސާ 2019 ވަނަ އަހަރު ވެރިކަމާ ހަވާލުވެވަޑައިގެންނެވި އިރު ފޮރިން ރިޒާވް އަކީ 7.5 ބިލިއަން ޑޮލަރެވެ.