ކޮލަމްބޯ ޑޮކްޔާޑުގެ ކޮންޓްރޯލް އިންޑިއާ ސަރުކާރުގެ ކުންފުންޏަކަށް

ސްރީ ލަންކާގެ ކޮލަމްބޯ ޑޮކްޔާޑުގެ މެޖޯރިޓީ ހިއްސާ، އިންޑިއާގެ ޑިފެންސް މިނިސްޓްރީގެ ކުންފުންޏެއް ކަމަށްވާ މަޒާގޮން ޑޮކް ޝިޕްބިލްޑާސް ލިމިޓެޑް (އެމްޑީއެލް) އިން 52.96 މިލިއަން ޑޮލަރަށް ގަނެ އެތަނުގެ ކޮންޓްރޯލް ހޯދައިފި އެވެ.

މިއީ އެމްޑީއެލް އިން ބައިނަލްއަގްވާމީ ވިޔަފާރީގެ ތެރެއަށް ނުކުތް ފުރަތަމަ ފަހަރެވެ. މި ޑީލްގައި ޕްރައިމަރީ ކެޕިޓަލް އިންވެސްޓްމަންޓަކާއި ކުރިން 51 ޕަސެންޓް ހިއްސާ އޮތް ޖަޕާނުގެ އޮނޮމިޗީ ޑޮކްޔާޑް ކޯ ލިމިޓެޑުގެ ހިއްސާ ގަތުން ހިމެނެ އެވެ. ޖަޕާނުގެ ކުންފުނި ކޮލަމްބޯ ޑޮކް ޔާޑުން ވަކިވާން ނިންމުމުން އެކަން ބަދަލުކުރަން ލަންކާ ސަރުކާރުން ކުރި މަސައްކަތް ނާކާމިޔާބުވެ މާލީ ގޮންޖެހުންތަކާ ކުރިމަތިލާން ޖެހުމުނެވެ.

ސްރީ ލަންކާގެ އެންމެ ބޮޑު، ޝިޕްބިލްޑިން ފެސިލިޓީ ކަމަށްވާ ކޮލަމްބޯ ޑޮކްޔާޑް އޮންނަނީ ދުނިޔޭގެ އެންމެ ބާރުބޮޑު ޝިޕިން ލޭންތަކުގެ ކައިރީގަ އެވެ. މި ޔާޑުގެ ބޭނުންތެރިކަމާއި ސްޓްރެޓެޖިކް ލޮކޭޝަންގެ ސަބަބުން މިއީ ސަރަޙައްދީ ކަނޑުގެ ވާދަވެރިކަމުގައި އަގުހުރި އެސެޓެއްގެ ގޮތުގައި އޮންނަނީ ބެލެވިފަ އެވެ.

އޮފިޝަލުން ވިދާޅުވާ ގޮތުގައި އެމްޑީއެލްއާ އެކު، ދެކުނު އޭޝިއާގެ ބޯޓް ބިލްޑިން އާއި މަރާމާތު ކުރުމުގެ މަސައްކަތަށް ވެސް ބަދަލުތަކެއް އަންނާނެ އެވެ.

އެމްޑީއެލްގެ ސީއެމްޑީ ކެޕްޓަން ޖަގްމޯހަން އިކޮނޮމިކް ޓައިމްސްގައި ވިދާޅުވެފައިވަނީ މި ޑީލްގެ ސަބަބުން އެމްޑީއެލް އަކީ ދެކުނު އޭޝިއާގެ މުހިންމު ބާރެެއްގެ ގޮތުގައި އޮންނާނެ ކަމަށާއި، ދުނިޔޭގެ ޝިޕްޔާޑެއްގެ ގޮތުގައި ކުރިއަރައިދިއުމުގެ ބިންގާ އެޅޭނެ ކަމަށެވެ.

ރިޕޯޓްތައް ބުނާ ގޮތުން ޝިޕްޔާޑް ކުރިން އޮތް ގޮތަށް ބާއްވަން ލަންކާ ސަރުކާރުން ޖަޕާނުގެ އެހީތެރިކަމަށް އެދުނު ނަމަވެސް އެކަން ނާކާމިޔާބުވުމުން ސްޓްރެޓެޖިކް އިންވެސްޓަރެއްގެ ގޮތުގައި ބައިވެރިވާން އިންޑިއާއަށް ހުށަހެޅި އެވެ.

ގާނޫނީ ކަންކަން ނިމުމާ އެކު ކޮލަމްބޯ ޑޮކްޔާޑް ވާނީ އެމްޑީއެލްގެ ފުރިހަމަ ހިއްސާ އޮންނަ ސަބްސިޑަރީ ކުންފުންޏަކަށެވެ. ކަނޑުދަތުރުފަތުރުގެ ކޮންޓްރޯލް އިތުރަށް ކަނޑުގެ ސަރަހައްދުގެ ވާދަވެރިކަން ބޮޑު މި ސަރަހައްދުގައި މިއީ އިންޑިއާއަށް މުހިންމު ސްޓްރެޓެޖިކް މަގާމެއް ލިބުން ކަމަށް ތަޖުރިބާކާރުން ސިފަކުރެ އެވެ.