މިސްކް ޖެހުނު ކުއްޖަކު ނިޔާ ވެސް ވެއްޖެ، މިހާރު ފެންނަ އަލާމާތްތައް ތަފާތު

ކޮވިޑް-19 ޖެހުމަށް ފަހު، ކުޑަކުދިންނަށް ޖެހޭ ނުރައްކާތެރި ބައްޔެއް ކަމަށްވާ، "މަލްޓި ސިސްޓަމް އިންފްލެމޭޓްރީ ސިންޑްރޯމް" (މިސްކް) ގައި ރާއްޖޭން ކުއްޖަކު ނިޔާ ވެސް ވެފައިވާ ކަމަށާއި މިހާރު މި ބަލި ޖެހޭ ކުދިންގެ ކިބައިން ކުރިން ނުފެންނަ އަލާމާތްތަތަކެއް ވެސް ފެންނަ ކަމަށް ކުޑަކުދިންގެ ހާއްސަ ޑޮކްޓަރު އަހުމަދު ފައިސަލް ވިދާޅުވެއްޖެ އެވެ.

މިސްކް ޖެހޭ ކުދިން ކޮވިޑުން ރަނގަޅުވުމަށް ފަހު ގަދަ ހުމާ އެކު ކަރާއި ގައިގައި ރިއްސުމާއި ހޮޑުލުމާއި ލޭގެ ޕްރެޝަރު ދަށްވުމާއި އަތާއިފައި އަދި ހަށިގަނޑު ރަތްވެ ދުޅަވުމުގެ އިތުރުން އަތާއި ފައިން ހަން ފޮޅުން ފަދަ އަލާމާތްތައް ވެސް ފެންނަ ކަމަށް ޑޮކްޓަރު ވިދާޅުވި އެވެ.

ކޮވިޑް ޖެހުމަށް ފަހު ރަނގަޅުވާ ކުދިންގެ ގައިން މިސްކްގެ އަލާމާތްތައް ފެންނަކަން މިދިޔަ އަހަރުގެ ޖޫން މަހުގެ ތެރޭގައި ޑރ. ފައިސަލް ހާމަކުރެއްވި ފަހުން މިހާތަނަށް 19 ކުއްޖަކަށް މި ބަލި ޖެހިފައިވާ ކަމުގެ މައުލޫމާތު ލިބިފައިވާ ކަމަށް ފައިސަލް ވިދާޅުވި އެވެ.

"ބޮޑަށް ރަށްރަށުގެ ކުދިންނަށް ބަލި ޖެހިގެން އައިޖީއެމްއެޗުގައި ފަރުވާދިނީ. އެންމެ ފުރަތަމަ ދުވަހުން ފެށިގެން މިހާތަނަށް 19 ކުއްޖަކަށް ބަލި ޖެހުނު ކަމަށް މައުލޫމާތު އެއްކުރީމާ އެނގުނީ. އެއީ އައިޖީއެމްއެޗާއި އޭޑީކޭ އަދި ޓްރީޓޮޕުން ހޯދި މައުލޫމާތުން،" ފައިސަލް ވިދާޅުވި އެވެ.

ފައިސަލް ވިދާޅުވީ އެ ބަލީގެ އަލާމާތެއްގެ ގޮތުގައި ބޮޑަށް ރަތްވުން ފާހަގަކުރެވުނަސް ކުދި ބިހިތައް ނަގައި އަބަދު ރަތްވެފައި ނުހުންނާނެ ކަމަށެވެ. އެއާ އެކު އެހެން އަލާމާތްތައް ވެސް ހުންނާނެ ކަމަށާއި އޭގެ ތެރޭގައި 3-5 ދުވަހަށް ހުން މަޑުނުވެ ހުރުމާއި ހޮޑުލުމާއި ބަނޑަށް ތަދުވުން އަދި ގައިގައި ރިއްސުމާއި ވަރުބަލިވުން ވެސް ހިމެނޭ ކަމަށެވެ.

ފައިސަލް ވިދާޅުވި ގޮތުގައި އައިޖީއެމްއެޗުގައި މިވަގުތު މި ބަލި ޖެހިގެން އެެއްވެސް ކުއްޖަކަށް ފަރުވާއެއް ނުދެ އެވެ. އެންމެ ފަހުން ބަލި ޖެހުނު ކުއްޖާ ބަލިން ރަނގަޅުވެ އިއްޔެ ދޫކޮށްލާފައިވާ ކަމަށާއި މި ބަލީގައި އެއް ކުއްޖަކު ރާއްޖެއިން ނިއާވި ކަމަށް ވެސް ޑޮކްޓަރު ވިދާޅުވި އެވެ.

ކޮވިޑްގެ ތިން ވަނަ ރާޅުގައި މި ބަލި ރާއްޖެއަކުން ނުފެނެ އެވެ. އެކަމަކު ރާއްޖޭގައި ވަރަށް ބޮޑަށް "ޑެލްޓާ" ފެތުރެމުން ދިޔައިރު މިސްކް ބަލި ފެންނަ ވަރު އިތުރުވި އެވެ. އޭރު ބައެއް ކުދިންނަށް އައިސީޔޫގައި ވެސް ފަރުވާދޭން ޖެހުނެވެ. އެކަަމަކު އޮމިކްރޮން ވެރިއަންޓާ އެކު އައި ރާޅާ އެކު އައި ބަދަލު އަދި ނޭނގޭ ކަމަށާއި މިހާރު ބަލި ޖެހޭ ކުދިންގެ އަދަދު އެނގޭނީ ބަލި ޖެހޭ މީހުންގެ އަދަދު ހަމަޔަކަށް އެޅުމުން ކަމަށް އޭނާ ވިދާޅުވި އެވެ.

ރާއްޖެއިން މި ބަލި ޖެހުނީ އުމުރުން 3-11 އަހަރާ ދެމެދުގެ ކުދިންނަށެވެ. އެކަމަކު މިއީ ކޮންމެ ކުޑަކުއްޖަކަށް ވެސް ޖެހިދާނެ ބައްޔެކެވެ. މި ބަލީގެ ނުރައްކާތެރިކަން ބޮޑުވަނީ ލޭގެ ޕްރެޝަރު ދަށްވުމުންނެވެ. މި ބަލީގެ ނުރައްކާތެރިކަން މަދު ފަހަރަކު ބޮޑުވިޔަސް މި ބަލި މަދުކުރެވޭނީ ކޮވިޑުން ރައްކާތެރިވެގެން ކަމަށް ފައިސަލް ވިދާޅުވި އެވެ.

"ކޮވިޑް މަދުކުރެވިގެން ނޫން ގޮތަކަށް މި ބައްޔެއް މަދެއް ނުކުރެވޭނެ. މީގައި މުހިއްމީ ކޮވިޑުން ރައްކާތެރިވުން. މިއީ ގައިން ގަޔަށް އަރާ ބައްޔެއް ނޫން. އެކަމަކު ކޮވިޑަކީ ގައިންގަޔަށް އަރާ ބައްޔަކަށްވާތީ ގައިދުރުކަމާއި މީހުން އެއްވާ ތަންތަނަށް ނުދިއުމާއި މާސްކް އަޅައިގެން އުޅެން ޖެހެނީ،" ފައިސަލް ވިދާޅުވި އެވެ.

މިސްކްގެ އަލާމާތްތައް ފެންނަ ކުދިންގެ ކިބައިން ބަލީގެ އަލާމާތްތައް އާންމު ގޮތެއްގައި، ކޮވިޑުން ރަނގަޅުވާތާ ހަތަރު ހަފުތާގެ ތެރޭގައި ފެނެ އެވެ.