އީގަލްސް އާއި ސަސް ވެސް ސެމީ ފައިނަލަށް

އެފްއޭއެމް ޔޫތު ޗެމްޕިއަންޝިޕުގެ ގުރޫޕް އޭ އިން ކްލަބް އީގަލްސް އާއި ސުޕަ ޔުނައިޓެޑް ސްޕޯޓްސް (ސަސް) ސެމީ ފައިނަލުން ޖާގަ ހޯދައިފި އެވެ.

މިހާތަނަށް ހަތަރު ފަހަރު މުބާރާތް ކާމިޔާބު ކޮށްފައިވާ، އީގަލްސް އިން އިއްޔެ ހަވީރު ކުޅުނު ގުރޫޕް ސްޓޭޖުގެ ފަހު މެޗު ކްލަބް ގްރީން ސްޓްރީޓްސްއާ ވާދަކޮށް ކާމިޔާބުކުރީ 11-0 އިންނެވެ. މި ނަތީޖާއާ އެކު ގްރޫޕް މެޗުތައް އީގަލްސް ނިންމާފައި ވަނީ، ފަސް ޓީމު ވާދަކުރި މި ގުރޫޕުގެ އެއްވަނައިގަ އެވެ. އެ ޓީމަށް ލިބިފައި ވަނީ 10 ޕޮއިންޓެވެ.

މެޗުގެ މޮޅު ކުޅުންތެރިޔާގެ މަގާމު ހޯދި އީގަލްސްގެ މުހައްމަދު ސަމާހު މޫސާ ފަތުހީ މި މެޗުގައި ވަނީ ހަތަރު ލަނޑު ޖަހައިފަ އެވެ. ޒައިން ޒަފަރާއި މުހައްމަދު ރަޔާން މުސްއަދު ވެސް ހެޓްރިކް ހެދިއިރު، ހަސަން ސަހާފް ވެސް ވަނީ ލަނޑެއް ޖަހައިފަ އެވެ.

ކޯޗު އަހުމަދު ނިމާދު (ނިމާ) ގެ އިރުޝާދުގެ ދަށުން އީގަލްސް އިން ގުރޫޕް ސްޓޭޖުގެ ހަތަރު މެޗުގައި 18 ގޯލު ޖެހި އިރު އެންމެ ގޯލެއް ވެސް ބައިކޮޅަށް ނުވަދެ އެވެ. ތިން މެޗު ކާމިޔާބު ކުރި އިރު އެއްވަރުވީ މާޒިޔާއާ ކުޅުނު މެޗުންނެވެ.

ގުރޫޕްގެ ދެވަނަ ޓީމުގެ ގޮތުގައި ސެމީއަށް ދަތުރުކުރީ ރޭ ދަ ގްރާންޑޭ ސްޕޯޓްސް ކްލަބާ ވާދަކޮށް 6-0 އިން މެޗު ކާމިޔާބުކުރި ސަސް އެވެ. ކޯޗު ފަރީދު މުހައްމަދުގެ އިރުޝާދުގެ ދަށުން ކުޅުނު ޓީމު ފުރަތަމަ މެޗުގައި އީގަލްސް އަތުން ބަލިވި ނަމަވެސް ސަސް ވަނީ ގުރޫޕް ސްޓޭޖުގެ ބާކީ ތިން މެޗު ވެސް ކާމިޔާބުކޮށްފަ އެވެ.

ރޭގެ މެޗުގައި ސަސްގެ ލަނޑުތައް ޖަހައިދިނީ ޒާލިފް ހުސައިން އާއި އަހުމަދު އައިހަމް މޫސާ އަދި އަލީ ޝާޒް ހަބީބުގެ އިތުރުން މުތާއު މުހައްމަދާއި ވިޝާހު އަބްދުލް މަޖީދެވެ. ވިޝާހު ވަނީ މެޗުގައި ދެ ލަނޑު ޖަހައިފަ އެވެ. އަދި މެޗުގެ މޮޅު ކުޅުންތެރިޔަކަށް ވެސް ހޮވުނީ އޭނާ އެވެ.

މި ނަތީޖާއާ އެކު އީގަލްސް ވަނީ ގުރޫޕް ސްޓޭޖުގެ ހަތަރު މެޗުން ނުވަ ޕޮއިންޓް ހޯދައިފަ އެވެ. ތިންވަނައިގައި ނިންމި މާޒިޔާ އަށް ލިބުނީ ހަތް ޕޮއިންޓެވެ. ގްރާންޑޭ އަށް ތިން ޕޮއިންޓް ލިބުނުއިރު، ގްރީން ސްޓްރީޓްސް އަށް ޕޮއިންޓެއް ނުލިބެ އެވެ.

ސެމީ ފައިނަލުގައި އަންނަ ބުދަ ދުވަހުގެ ރޭ ސަސް ކުޅޭނީ ގުރޫޕް ބީގެ އެއްވަނަ ހޯދި ޔުނައިޓެޑް ވިކްޓަރީއާ ދެކޮޅަށެވެ. ހަމަ އެ ދުވަހު ހަވީރު އީގަލްސް ނުކުންނާނީ ގުރޫޕް ބީގެ ދެވަނައަށް ދިޔަ ޓީސީ ސްޕޯޓްސް ކުލަބާ ދެކޮޅަށެވެ.