ޓޫރިޒަމް ރަނގަޅުވުމާ އެކު ޖެނުއަރީ މަހު ލިބުނު އާމްދަނީ 2.4 ބިލިއަނަށް

ޓޫރިޒަމް ރަނގަޅުވެ، މިދިޔަ މަހު ދައުލަތަށް ލިބުނު އާމްދަނީ 2.4 ބިލިއަނަށް އިތުރުވެއްޖެ އެވެ.

މީރާގެ ތަފާސް ހިސާބުތަކުން އެނގޭ ގޮތުގައި މިދިޔަ އަހަރުގެ ޖެނުއަރީ މަހާ އަޅާބަލާ އިރު ދައުލަތަށް ލިބުނު އާމްދަނީ ވަނީ 31 ޕަސެންޓަށް އިތުރުވެފަ އެވެ. އެ މަހު ލިބުނީ 1.7 ބިލިއަން ރުފިޔާގެ އާމްދަނީއެކެވެ. މިދިޔަ އަހަރަށް ވުރެ މި އަހަރުގެ ޖެނުއަރީ މަހު އާމްދަނީ އިތުރުވީ، ޖީއެސްޓީ، އިންކަމް ޓެކްސް، ގްރީން ޓެކްސް އަދި އެއާޕޯޓް ޓެކުހާއި ފީގެ ގޮތުގައި ލިބިފައިވާ ފައިސާ އިތުރުވުމުންނެވެ. މިދިޔަ އަހަރު ޖެނުއަރީ މަހަށް ވުރެ މިއަހަރުގެ ޖެނުއަރީގައި ރާއްޖެ އައި ޓޫރިސްޓުންގެ އަދަދު ވެސް ވަނީ ދެ ގުނަވެފަ އެވެ.

މީރާއިން ބުނީ މިިދިޔަ މަހު ލީސް ޕީރިއަޑް އެކްސްޓެންޝަން ފީގެ ގޮތުގައި އާމްދަނީ ލިބިފައިވުމަކީ ވެސް މިދިޔަ އަހަރުގެ އެ މުއްދަތަށް ވުރެ ލިބިފައިވާ އާމްދަނީ އިތުރުވުމުގެ އެއް ސަބަބެވެ. ލީސް ޕީރިއަޑް އެކްސްޓެންޝަން ފީ މިދިޔަ އަހަރު ލިބިފައެއް ނުވެ އެވެ.

މިދިޔަ މަހު މީރާއަށް ބަލައިގަތް އާމްދަނީގެ އެންމެ ބޮޑު ބައެއް ހިއްސާކުރަނީ ޖީއެސްޓީ އެވެ. ޖީއެސްޓީގެ ގޮތުގައި އެއް ބިލިއަން ރުފިޔާ ލިބިފައިވެ އެވެ. އާންމު ގޮތެއްގައި ވެސް ކޮންމެ މަހަކު ވެސް އެންމެ ބޮޑު އާމްދަނީއެއް ލިބެނީ ޖީއެސްޓީންނެވެ.

މީގެ އިތުރުން އިންކަމް ޓެކްސްއިން 864 މިލިއަން ރުފިޔާ، ގްރީން ޓެކްސްގެ ގޮތުގައި 95.19 މިލިއަން ރުފިޔާ، ޓޫރިޒަމް ލޭންޑް ރެންޓްގެ ގޮތުގައި 84.49 މިލިއަން ރުފިޔާ، ލީސް ޕީރިއަޑް އެކްސްޓެންޝަން ފީގެ ގޮތުގައި 76.55 މިލިއަން ރުފިޔާ ލިބިފައިވެ އެވެ. މިދިޔަ މަހު ލިބުނު އާމްދަނީގެ ތެރޭގައި ޑޮލަރުން ލިބުނު އާމްދަނީ 74 މިލިއަން ޑޮލަރަށް އަރަ އެވެ.

މިދިޔަ އަހަރު ދައުލަތަށް 19 ބިލިއަން ރުފިޔާގެ އާމްދަނީއެއް ލިބިފައިވެ އެވެ. މި އަހަރު ދައުލަތަށް 24.3 ބިލިއަން ރުފިޔާގެ އާމްދަނީއެއް ލިބޭނެ ކަމަށް އަންދާޒާކޮށްފައިވެ އެވެ. އޭގެ ތެރެއިން ޓެކްސް އިން 15 ބިލިއަން ރުފިޔާގެ އާމްދަނީއެއް ލިބޭނެ ކަމަށް ލަފާކުރެ އެވެ.