ލީޑްސް ބަލިކޮށް ލަމްޕާޑާއެކު އެވަޓަން އަށް ލީގުގެ ފުރަތަމަ މޮޅު

މާސީސައިޑް (ފެބްރުއަރީ 13) - އިނގިރޭސި ޕްރިމިއާ ލީގުގައި ރޭ އެވަޓަން އިން ލީޑްސް ޔުނައިޓެޑް 3-0 އިން ބަލިކޮށް ލަމްޕާޑާއާ އެކު ލީގްގައި ފުރަތަމަ މޮޅު ހޯދައިފި އެވެ.

ލަމްޕާޑް، އެވަޓަންއާ މިދިޔަ މަހުގެ 31 ގައި ހަވާލުވިއިރު ޓީމު އޮތީ ރެލިގޭޝަން ޒޯނަށް ވުރެ ހަތަރު ޕޮއިންޓް ކުރީގައި، ޓޭބަލްގެ 16 ވަނައިގަ އެވެ. އާ ކޯޗާއެކު ފުރަތަމަ ކުޅުނީ އެފްއޭ ކަޕް މެޗެކެވެ. އެފްއޭ ކަޕްގައި ފަސޭހަކަމާއެކު ބްރެންޓްފޯޑް ބަލިކުރި ނަމަވެސް ލީގުގައި ފުރަތަމަ ކުޅުނު މެޗުގައި ނިއުކާސަލް ޔުނައިޓެޑް އަތުން ވަނީ ބަލިވެފަ އެވެ.

ރޭގެ މޮޅަކީ އެވަޓަން ލީގްގައި އެންމެ ފަހުން ކުޅުނު ހަތް މެޗުން މޮޅުވި ފުރަތަމަ މެޗެވެ. މިދިޔަ އަހަރުގެ ޑިސެމްބަރު މަހު އާސެނަލް އަތުން އަމިއްލަ ދަނޑުގައި މޮޅުވި ފަހުން އެ ޓީމު ވަނީ ލީގުގައި ފަސް މެޗުން ބަލިވެފަ އެވެ.

ރޭގެ މެޗުގެ 10 ވަނަ މިނިޓުގައި އެވަޓަން އިން ލަނޑެއް ޖަހައި ކުރި ހޯދިިއިރު، އެ ލަނޑު ކާމިޔާބު ކޮށްދިނީ ޝޭމަސް ކޯލްމަން އެވެ. އަދި 23 ވަނަ މިނިޓުގައި މައިކަލް ކީން، އިތުރު ލަނޑެއް ޖަހައި އެވަޓަން އަށް ލީޑު ފުޅާކޮށްދިނެވެ. އެވަޓަންގެ ތިންވަނަ ލަނޑު 78 ވަނަ މިނިޓުގައި ޖަހައިދިނީ ރިޗާލިސަން އެވެ.

މި މެޗުގައި ލީޑްސްގެ ރޮޑްރިގޯ ފޮނުވައިލި ދެ ހަމަލާއެއް ގޯލުގެ ހުރަސް ދަނޑިއަށް އަމާޒުވިއިރު، އެ ޓީމުގެ ސްޓުއާޓް ޑަލާސް އަށް އަނިޔާވެގެން މެޗުގެ ހަތްވަނަ މިނިޓުގައި ބަދަލު ކުރަން ޖެހުނެވެ.

އެވަޓަން މި ވަގުތު 16 ވަނައިގައި އޮތީ ރެލިގޭޝަން ޒޯނަށް ވުރެ ފަސް ޕޮއިންޓް ކުރީގަ އެވެ. މިހާތަނަށް ކުޅުނު 22 މެޗުން އެވަޓަން ވަނީ 22 ޕޮއިންޓް ހޯދައިފަ އެވެ. ލީޑްސް ޔުނައިޓެޑް އޮތީ އެއް މެޗު މަދުން ކުޅެގެން 23 ޕޮއިންޓާ އެކު 15 ވަނައިގަ އެވެ.

ލީޑްސް އަށް މި މަހު ދެން ކުރިޔަށް އޮތީ ލީގުގައި މެންޗެސްޓާ ޔުނައިޓެޑާއި ލިވަޕޫލް އަދި ޓޮޓެންހަމް ހޮޓްސްޕާއާ ދެކޮޅަށް ކުޅޭ މެޗެވެ. އެ އަށް ފަހު އަންނަ މަހުގެ ފުރަތަމަ މެޗުގައި ބައްދަލުކުރާނީ ލެސްޓާ ސިޓީއާ ދެކޮޅަށެވެ.

ލީގު އެއްވަނައިގައި އޮތް މެންޗެސްޓާ ސިޓީ ވެސް ވަނީ ރޭ ނޯރިޗް ސިޓީއާ ދެކޮޅަށް ކުޅެ 4-0 އިން މެޗު ކާމިޔާބު ކޮށް، ޓޭބަލްގެ އެއްވަނައިގައި 12 ޕޮއިންޓަށް ލީޑު ފުޅާކޮށްފަ އެވެ.

ރޭގެ މެޗުގައި މެންޗެސްޓާ ސިޓީގެ ލަނޑުތައް ޖަހައިދިނީ ރަހީމް ސްޓާލިން އާއި ފިލް ފޮޑެން އެވެ. ސްޓާލިން ވަނީ ރޭގެ މެޗުގައި ތިން ލަނޑު ޖަހައި ހެޓްރިކް ހަދައިފަ އެވެ. މިއީ އޭނާ ލީގުގައި ސިޓީއަށް ޖަހައިދިން ފަސްވަނަ ހެޓްރިކެެވެ.

މެންޗެސްޓާ ސިޓީގެ މި މޮޅާއެކު، އެ ޓީމު ވަނީ ކުޅުނު 25 މެޗުން 63 ޕޮއިންޓް ހޯދައިފަ އެވެ. ދެވަނައިގައި އޮތް ލިވަޕޫލް ކުޅުނު 23 މެޗުން ވަނީ 51 ޕޮއިންޓް ހޯދައިފަ އެވެ.

ބްރެންޓްފޯޑާއި ކްރިސްޓަލް ޕެލަސް ރޭ ލީގުގައި ކުޅުނު މެޗު ލަނޑެއް ނުޖެހި އެއްވަރު ވިއިރު، ބްރައިޓަން ވަނީ 2-0 އިން ވަޓްފޯޑް ބަލި ކޮށްފަ އެވެ. ބްރައިޓަންގެ ލަނޑުތައް ޖަހައިދިނީ ނީލް މޯޕޭ އާއި އެޑަމް ވެބްސްޓާ އެވެ.

މިއީ ވަޓްފޯޑުގެ ކޯޗުކަމުން ކްލައުޑިއޯ ރަނިއޭރީ ދުރުކޮށް، ޖެނުއަރީގައި އެ މަގާމު ހަވާލުކުރި، އިނގިރޭސި ގައުމީ ޓީމުގެ ކުރީގެ ކޯޗު ރޯއީ ހޮޑްސަންއާއެކު އެ ޓީމު ކުޅުނު ފުރަތަމަ މެޗެވެ.