ވިދިދިގެން ހަތަރުވަނަ ފަހަރަށް ޕްރިމިއާ ލީގު ޗެމްޕިއަންކަން، ސިޓީ ފަހަތަށް ވައްޓާލެވޭނެ އެހެން ޓީމެއް ނެތް

ފަހު މެޗުގައި، ވެސްޓްހޭމް ޔުނައިޓެޑް ބަލިކޮށް، ޕްރިމިއާ ލީގު ޗެމްޕިއަންކަން ވިދިވިދިގެން ހަތަރުވަނަ ފަހަރަށް މެންޗެސްޓާ ސިޓީ ހޯދައިފި އެވެ.

ސިޓީގެ މި ކާމިޔާބާ އެކު އެ ޓީމުން ވަނީ، އިނގިރޭސި ފުޓްބޯޅައިގައި މިދިޔަ 136 އަހަރުތެރޭ އެހެން ޓީމަކަށް ހެދިފައި ނެތް ރެކޯޑެއް ހަދައިފަ އެވެ.

އުމުރުން 136 އަހަރު ވީ އިނގިރޭސި ލީގުގައި، މިރެއާ ހަމައަށް އެއްވެސް ޓީމަކަށް އެ ލީގު ވިދިވިދިގެން ހަތަރު ފަހަރު ކާމިޔާބު ކުރެވިފައެއް ނުވެ އެވެ. އެކަމަކު މިރޭގެ މޮޅާ އެކު އެ ތާރީހް ސިޓީން މި ވަނީ ބަދަލުކޮށްފަ އެވެ.

އިއްތިހާދު ސްޓޭޑިއަމްގައި މިރޭ ކުޅުނު މެޗުގައި ސިޓީގެ ތިން ލަނޑުގެ ތެރެއިން ދެ ލަނޑު ޖެހީ ޕްރިމިއާ ލީގުގެ މޮޅު ކުޅުންތެރިޔާގެ އެވޯޑް ހޯދި ފިލް ފޯޑެން އެވެ. މެޗު ފެށިގެން ދެވަނަ މިނެޓްގައި އޭނާ ވަނީ ވެސްޓްހޭމްގެ ގޯލް ހުޅުވައިފަ އެވެ. އޭނާގެ ދެވަނަ ލަނޑު ޖެހީ 18 ވަނަ މިނެޓްގަ އެވެ.

ފުރަތަމަ ހާފު ނިމުމުގެ ކުރިން ވެސްޓްހޭމްގެ މުހައްމަދު ކުޑޫސް، ބައިސްކަލްކިކަކުން އެ ޓީމުގެ ހަމައެކަނި ލަނޑު ޖެހި އެވެ.

ދެވަނަ ހާފަށް ނުކުމެ ރޮޑްރީ ހެނާންޑޭޒް، ސިޓީގެ ތިންވަނަ ލަނޑު ޖަހައި އަލުން ދެ ލަނޑުގެ ލީޑެއް ހޯދައި ދިނެވެ.

ސިޓީއާ ވާދަކޮށްލެވެން އޮތް ހަމައެކަނި ޓީމަކީ ވެސް އާސެނަލް އެވެ. އެވަޓަންއާ ދެކޮޅަށް ކުޅުނު މެޗު 2-1 އާސެނަލް ކާމިޔާބު ކުރި އެވެ.މ

ސިޓީން ލީގު ޗެމްޕިއަންކަން ހޯދީ އާސެނަލް އަށް ވުރެ އިތުރަށް ދެ ޕޮއިންޓް ޕޮއިންޓް ހޯދައިގެންނެވެ. މިހާ ހިސާބުން މި ސީޒަނަށް ސިޓީގެ ކާމިޔާބު އަދި ވެސް ނިމޭކަށް ނެތެވެ. އަންނަ ހޮނިހިރު ދުވަހު އެފްއޭ ކަޕް ފައިނަލް މެޗުގައި މެންޗެސްޓާ ޔުނައިޓެޑާ ދެކޮޅަށް ނުކުންނާނެ އެވެ.