ކައިވެނީގެ ރަސްމިއްޔާތެއްގައި ވަޅަކަށް ވެއްޓި 13 މީހަކު މަރުވެއްޖެ

އިންޑިއާގެ އުންތަރް ޕްރެދޭޝްގެ ކުޝީނަގަރު އަވަށުގައި ރޭ ބޭއްވި ކައިވެނީގެ ރަސްމިއްޔާތެއްގައި ބައިވެރިވި މީހުންގެ ތެރެއިން ބަޔަކު ފެންވަޅަކަށް ވެއްޓި ގެނބުމުގެ ސަބަބުން އޭގެ ތެރެއިން 13 މީހަކު މަރުވެއްޖެ އެވެ.

ފުލުހުން ބުނި ގޮތުގައި ކުޝީނަގަރުގައި ރޭ ބޭއްވީ ކައިވެނީގެ ކުރިން ބާއްވާ "ހަލްދީ" (ކައިވެނިކުރާ ދެމީހުންގެ ގައިގައި ރީނދޫ ވެށުމުގެ) ހަފްލާ އެވެ. މި ހާދިސާ ހިނގީ އެ ހަފްލާ ބޭއްވި ސަރަހައްދުގައި ހުރި ފެންވަޅެއްގެ މަތީގައި އަޅާފައި އޮތް ދަގަނޑު ނަރުދާގަނޑެއްގެ މަތީގައި ބަޔަކު އިށީނދެ ތިއްބާ، އެ ދާގަނޑު ކަނޑައިގެން ގޮސް ވަޅު ތެރެއަށް އެ މީހުން ވެއްޓުމުންނެވެ.

މި ހާދިސާގައި މަރުވި މީހުންގެ އިތުރުން 10 މީހަކަށް އެކި ވަރުގެ އަނިޔާތައް ލިބިގެން ހޮސްޕިޓަލުގައި ފަރުވާ ދޭން ޖެހުނެވެ. މި ހާދިސާއާ ގުޅިގެން ޗީފް މިނިސްޓަރު ޔޯގީ އަދިތުޔަނަންތު އާއި ބޮޑުވަޒީރު ނަރެންދުރަ މޯޑީ ވަނީ، މަރުވި މީހުންގެ އާއިލާތަކަށް ތައުޒިޔާ ވިދާޅުވެފަ އެވެ.

މި ހާދިސާގައި މަރުވި މީހުންގެ ތެރޭގައި 18 އަހަރުން ދަށުގެ ހަ ކުދިން ހިމެނެ އެވެ. އަދި އޭގެ ތެރޭގައި އެއް އަހަރުގެ ކުއްޖަކު ވެސް ހިމެނެ އެވެ. ފުލުހުން މި ހާދިސާ ތަހުގީގު ކުރަން ފަށާފައިވާ އިރު، އެ އަވަށުގައި މިއަދު ވަނީ ހިތާމަ ފާޅުކުރުމުގެ ދުވަހެއްގެ ގޮތުގައި ހަމަޖައްސައިފަ އެވެ.