ހުޅުމާލޭ ކޯޓުގެ މައްސަލަ އަނެއްކާވެސް ހޫނުވެއްޖެ: ގާނޫނު އިސްލާހު ކުރަނީ

ހުޅުމާލޭ ކޯޓު އުވާލުމުގެ މައްސަލަ ސުޕްރީމް ކޯޓުން ނުބެލިޔަސް، އެ ކޯޓު އުވާލަން ގާނޫނު އިސްލާހު ކުރާނެ ކަމަށް އެޓާނީ ޖެނެރަލް އިބްރާހިމް ރިފްއަތު މިއަދު ވިދާޅުވެއްޖެ އެވެ.

ހުޅުމާލޭ ކޯޓަކީ ސައްހަ ކޯޓެއް ކަމަށް 2012 ވަނަ އަހަރު ސުޕްރީމް ކޯޓުގެ އެންމެ ހަނި އަޣުލަބިއްޔަތުން ހުކުމް ކޮށްފައި ވަނިކޮށް އެ ނިންމުން ރިވިއުކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން ދާދިފަހުން އެދުމުން މިހާރުގެ ސުޕްރީމް ކޯޓުގެ ބެންޗުން ނިންމެވީ އެ ނިންމުން ރިވިއު ނުކުރުމަށެވެ.

ޖޭއެސްސީގެ މެމްބަރުކަން ވެސް ކުރައްވާ އެޓާނީ ޖެނެރަލް ރިފްއަތު ކުރެއްވި ޓްވީޓެއްގައިވަނީ ހުޅުމާލޭ ކޯޓަކީ ސިޔާސީ މަގްސަދެއް ހާސިލްކުރަން އުފެއްދި ތަނެއް ކަމަށާއި އެ ކޯޓުގެ ސައްހަ ކަމަށް އޭރުގެ ސުޕްރީމް ކޯޓުން ނިންމީ ގާނޫނާ ޚިލާފަށް ކަމަށެވެ.

އެކަމަކު މިހާރުގެ ސުޕްރީމް ކޯޓުގެ ބެންޗުގެ ނިންމެވުމާ މެދު ވަކި އެއްޗެއް ވިދާޅުނުވެ، ރިފްއަތު ވިދާޅުވީ "ފާޅުކަން ބޮޑު ބޭ އިންސާފު" ރަނގަޅު ކުރަން ގާނޫނު އިސްލާހު ކުރާނެ ކަމަށެވެ.

ހުޅުމާލޭ ކޯޓުގެ މައްސަލަ ކުރިން ހޫނުވީ ކްރިމިނަލް ކޯޓުގެ ކުރީގެ އިސްގާޒީ އަބްދުﷲ މުހައްމަދު ބަންދުކުރި މައްސަލާގައި ކުރީގެ ރައީސް މުހައްމަދު ނަޝީދުގެ މައްޗަށް 2012 ވަނަ އަހަރު އެ ކޯޓުގައި ދައުވާ އުފުލުމުންނެވެ. އެ ކޯޓުން ސައްހަ ނޫން ކަމަށް ބުނެ އޭރު އުފެދުނު ގާނޫނީ މައްސަލައަށް ސުޕްރީމް ކޯޓުން ގޮތެއް ނިންމިޔަސް، ނަޝީދުގެ މައްސަލަ ކުރިއަށް ނުގެންގޮސް އޮއްވައި ދައުލަތުން 2015 ވަނަ އަހަރު އެ މައްސަލަ އަނބުރާ ގެންދިއުމަށް ފަހު ނަޝީދަށް ޓެރަރިޒަމްގެ ދައުވާކުރީ ކްރިމިނަލް ކޯޓުގަ އެވެ.