ޓާނާގެ ހެޓްރިކުން މާޒިޔާއިން ބޮޑު މޮޅެއް ހޯދައިފި

ސްޕެއިންގެ ފޯވާޑް ޕެޑްރޯ ޑޮމިނިގޭޒް (ޓާނާ) ހެދި ހެޓްރިކާއެކު، ދިވެހި ޕްރިމިއާ ލީގުގައި މާޒިޔާއިން 6-0 ބޮޑު ނަތީޖާއަކުން ކްލަބް ގްރީން ސްޓްރީޓްސް ބަލިކޮށްފި އެވެ.

ޕްރެޒިޑެންޓްސް ކަޕްގައި މާޒިޔާ ބަލި ކުރި ގްރީން އަށް މިއަދުގެ މެޗުގައި މާބޮޑު ކަމެއް ނުކުރެވުނެވެ. މެޗު ފެށިގެން ކޮންޓްރޯލް ކުރީ މާޒިޔާއިންނެވެ. ލަސްޕަލަމްސްގެ ޖޯޒީގައި ރެއާލް މެޑްރިޑް ކޮޅަށް ލަނޑެއް ޖަހައިގެން މަޝްހޫރުވި ޓާނާ ވަނީ މިއަދުގެ މެޗުގައި ވެސް އޭނާގެ މުހިންމުކަން ހާމަ ކޮށްފަ އެވެ.

ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗުގައި މާޒިޔާއިން ވަނީ ކޮންމެ ހާފެއްގައި ތިން ލަނޑު ޖަހައިފަ އެވެ. އެޓީމުގެ ފުރަތަމަ ލަނޑު ޖެހީ ކޯނޭލިއަސް ސްޓެވާޓް (ކޯނޭ) އެވެ. މެޗުގެ 18 ވަނަ މިނެޓްގައި ގްރީންގެ އޭރިއާގެ އަރިމަތިން ނާއިޒު ހަސަން (ދާދު) ދިން ބޯޅަ ޓާނާ ގޯލަށް އަމާޒުކޮށް ފޮނުވާލުމުން އެބޯޅަ ގްރީންގެ ޑިފެންޑަރު ދިފާއު ކުރީ ގޯލް ރޮނގުމަތިންނެވެ. ޑިފެންޑަރު ދިފާއުކުރި ބޯޅަ ރީބައުންސަށް ނުކުތުމުން، ކޯނޭ ވަނީ އެބޯޅަ ގޯލްގެ ތެރެއަށް ފޮނުވައިލައިފަ އެވެ.

ޓާނާގެ ފުރަތަމަ ލަނޑު އޭނާ ޖެހީ 32 ވަނަ މިނެޓްގަ އެވެ ހަމްޒާ މުހައްމަދު (ހަމްޕް) އޭރިއާގެ އަރިމަތިން އޭރިއާ ތެރެއަށް ވަން ގޮތަށް ބޯޅަ ޓާނާ އަށް ދިނީ އޭނާ ހުސްކޮށް ހުރުމުންނެވެ. ބޯޅަ ކޮންޓްރޯލް ކުރުމަށްފަހު އޭނާ ވަނީ ގޯލްގެ ނިއާ ޕޯސްޓަށް ބޯޅަ ފޮނުވައިލައިފަ އެވެ. ގްރީންގެ ކީޕަރު ސާގިބް ހަނީފް އެބޯޅަ ފައިން ދިފާއު ކުރަން މަސައްކަތް ކުރި އެވެ. ނަމަވެސް އޭނާގެ ފައިގައި ބޯޅަ ލައްވައެއް ނުލި އެވެ.

މާޒިޔާގެ ތިންވަނަ ލަނޑު ޓާނާ ޖެހީ، ގްރީންގެ ޑިފެންޑަރު އަލީ ޝާމިސް (ތޮއްޕެ) އަށް ހެދުނު ބޮޑު ގޯހަކުންނެވެ. މާޒިޔާގެ އޭރިއާގެ ތެރެއަށް ހަމްޒާ ބޯޅަ ހިފައިގެން ވަނުމުން، އޭނާ އަތުން ޝާމިސް ބޯޅަ ހޯދި އެވެ. އެވަގުތު ހަމްޒާ އޭރިއާ ތެރެއަށް ވެއްޓުނެވެ. ހަމްޒާ އާއި މާޒިޔާގެ އެހެން ކުޅުންތެރިންގެ އިޝާރާތްތައް ހުރި ގޮތުން ތިބީ ޕެނަލްޓީ އަށް އެޕީލް ކުރާގޮތަށެވެ. އެކަމަކު ޓާނާ ވަނީ ޝާމިސްއާ ގާތުން ވިއްދައި އޭނާ އަތުން ބޯޅަ އަތުލައި ގޯލްގެ ތެރެއަށް ބޯޅަ ފޮނުވައިލައިފަ އެވެ. ޝާމިސް އަށް އެބޯޅަ ދުރަށް ފޮނުވާލަށް ވެސް ވަގުތު ލިބުނެވެ.

ދެވަނަ ހާފުގެ ކުރީ ކޮޅު ނާއިޒު ވަނީ މާޒިޔާ އަށް ލީޑް ފުޅާކޮށްދީފަ އެވެ. ގްރީންގެ އޭރިއާގެ ތެރެއިން އިބްރާހިމް އައިސަމް (ޓޯނީ) ބޯޅަ ދިނީ ކޯނޭ އަށެވެ. އޭރިއާގެ މެދުތެރޭގައި ހުރެފައި ކޯނޭ ފޮނުވައިލި ބޯޅަ ގްރީންގެ ކީޕަރު ސާގިބް ދިފާއު ކުރި އެވެ. އެކަމަކު ރީބައުންސަށް ނުކުތް ބޯޅަ ނާއިޒު ގޯލްގެ ތެރެއަށް ވައްދާލި އެވެ.

ޓާނާ ހެޓްރިކް ހެދީ މެޗުގެ 77 ވަނަ މިނެޓްގައި ޖެހި ލަނޑުންނެވެ. ގްރީންގެ ހާފުގެ ތެރެއިން ކޯނޭ އޭރިއާގެ ތެރެއަށް ބޯޅަ ނަގައިދިނީ އަސަދުﷲ އަބްދުﷲ ހުސްވާން ދިއުމުންނެވެ. އަސަދުﷲ ފައިގައި ޖެހިފައި ބޯޅަ ލިބުނީ އޭރިއާގެ ތެރެއިން ޓާނާ އަށެވެ. އޭނާ ވަނީ ބޯޅަ ކޮންޓްރޯލް ކުރުމަށް ފަހު ގޯލްގެ ތެރެއަށް ބޯޅަ ފޮނުވައިލައިފަ އެވެ. ކީޕަރު ސާގިބް އަށް ވެސް ހުރެވުނީ މާބޮޑު ކަމެއް ނުކުރެވި ބަލަހައްޓައިގެންނެވެ.

މާޒިޔާގެ ހަވަނަ ލަނޑު ހަމްޒާ ޖެހީ ދެވަނަ ހާފުގެ އިތުރު ވަގުތުގެ ތިންވަނަ މިނެޓްގަ އެވެ. ގްރީންގެ ހާފުގެ ތެރެއިން ހައިޝަމް ހަސަން (ބިޑި) ދިން ބޯޅަ ހިފައިގެން ހަމްޒާ އޭރިއާގެ އަރިމަތިން އަރައި ބޯޅަ ފޮނުވައިލީ ގޯލްގެ އެތެރެއިން މަތީ ދާގަނޑަށެވެ. ގްރީންގެ ޑިފެންޑަރު ޝާމިސް ބޯޅަ އަށް ވިއްދިނަމަވެސް އޭނާ އަށް ފުރުސަތު ނުދީ ހަމްޒާ ވަނީ ބޯޅަ ފޮނުވައިލައިފަ އެވެ.

މާޒިޔާ ވަނީ ކުޅުނު ހަ މެޗު ވެސް ކާމިޔާބު 18 ޕޮއިންޓް ހޯދައި ތާވަލުގެ އެއްވަނައިގައި ހަމަޖެހިލައިފަ އެވެ. އެޓީމުން ޖުމުލަ 17 ލަނޑު ޖެހި އެވެ. ބައިކޮޅަށް ވަނީ އެންމެ ލަނޑެކެވެ.