ހިޔާ ފްލެޓްތަކުގެ ގާކުނޑި ނެގުން އެޗްޑީސީން ހުއްޓާލަނީ

ހިޔާ ފްލެޓްތަކުން އުކާލާ ގާކުނޑި އާއި އެހެނިހެން ކުނިތައް ހުޅުމާލޭ ބަލަހައްޓަމުން އަންނަ އެޗްޑީސީން ނަގަމުން އައި ނަމަވެސް އަންނަ މަހުން ފެށިގެން އެކަން ހުއްޓާލާނެ ކަމަށް އެ ކުންފުނިން މިއަދު ބުނެފި އެވެ.

އެޗްޑީސީން ނެރުނު އިއުލާނެއްގައި ބުނީ ހިޔާ ފްލެޓްތަކުގެ އެތެރޭގެ މަސައްކަތްތައް ކުރުމުގެ އުސޫލުގައި ބަޔާންކޮށްފައިވާ ގޮތަށް، މަސައްކަތްކުރަމުންދާ ގޭބިސީތަކުން އުކާލާ ގާކުނޑި އާއި އެފަދަ އެހެން ކުނިތައް އުކުމަށް ހާއްސަ ސަރަހައްދެއް ކަނޑައަޅައި، އެކަހަލަ ކުނިތައް އުކާލުމުގެ މަސައްކަތްކުރީ އެ ކުންފުނިން ކަމަށެވެ.

އެކަމަކު މި މަހުގެ 31 އިން ފެށިގެން އެކަން ހުއްޓާލަން ނިންމާފައިވާ ކަމަށް އެޗްޑީސީން ބުންޏެވެ.

އެ ކުންފުނިން ބުނި ގޮތުގައި އަންނަ މަހުގެ އެއްވަނަ ދުވަހުން ފެށިގެން ގާކުނޑިތަކާއި އެފަދަ އެހެން ކުނިތައް އުކާނީ އެ ފްލެޓެއްގެ ވެރިފަރާތަކުން އެކަމަށް ހާއްސަކޮށްފައިވާ މުއައްސަސާތަކާ ގުޅިގެންނެވެ.

"އެހެންކަމުން އެޕްރީލް އެކަކުން ފެށިގެން މިދެންނެވި ސަރަހައްދުތަކުން [މިހާރު ގާކުނޑި އެޅުމަށް ހާއްސަކޮށްފައި ހުރި ސަރަހައްދުތައް] އަށް ކުނި އެޅުމަކީ މަނާ ކަމެއް ކަމުގައި ކަނޑައަޅައި އެކަން އާންމުކޮށް އިއުލާންކުރަމެވެ،" އެ އިއުލާނުގައިވެ އެވެ.

ފްލެޓްގެ މަސައްކަތް ނިންމުމަށް ކުރާ މަސައްކަތުން އުފެދޭ ކުނިތައް ނެގުން އެޗްޑީސީން ހުއްޓާލަން ނިންމިއިރު ފްލެޓްތަކުގެ ފިނިޝިންނަށް ކުލި ނުނަގާ ގޮތަށް ސަރުކާރުން ދިން މުއްދަތު ވެސް މި މަހުގެ ނިޔަލަށް ހަމަވާނެ އެވެ.