އިންޑިއާގެ 1700 އަށް ވުރެ ގިނަ އިންސްޓިޓިއުޓާ ރާއްޖެ ގުޅާލައިފި

ރާއްޖޭގައި މަތީތައުލީމުގެ ރިސާޗް ނެޓްވޯކެއް ގާއިމްކުރުމުގެ މަސައްކަތް ފަށައި، އެ ނެޓްވޯކާއި އިންޑިއާގެ ނޭޝަނަލް ނޮލެޖް ނެޓްވޯކާ ގުޅާލައިފި އެވެ.

އެ ދެ ނެޓްވޯކް ގުޅާލުމުގެ އެއްބަސްވުމުގައި ރާއްޖޭގެ ނޭޝަނަލް ސެންޓަ ފޯ އިންފޮމޭޝަން ޓެކްނޮލޮޖީ (އެންސީއައިޓީ) އާ އެކު، އިންޑިއާގެ ނޭޝަނަލް އިންފޮމެޓިކްސް ސެންޓަރުން އިއްޔެ ވަނީ ސޮއިކޮށްފަ އެވެ. އެ އެއްބަސްވުމުގައި ސޮއިކުރީ އިންޑިއާގެ އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރް މިހާރު އައްޑު އަށް ކުރައްވާ ދަތުރުގެ ތެރެއިންނެވެ.

ޓެކްނޮލޮޖީ މިނިސްޓްރީން މިއަދު ނެރުނު ނޫސްބަޔާނެއްގައި ބުނީ އެ އެއްބަސްވުމުގެ ދަށުން އިންޑިއާގެ 1،700 އަށް ވުރެ ގިނަ މަތީތައުލީމާއި ރިސާޗް އިންސްޓިޓިއުޓް ގުޅާލައި، އިންޑިއާގެ ނޭޝަނަލް ނޮލެޖް ނެޓްވޯކްގެ ހިދުމަތް ސީދާ ރާއްޖޭގެ މަތީތައުލީމާއި ރިސާޗް އިންސްޓިޓިއުޓްތަކުން ލިބޭނެ ގޮތް ހަމަޖެހޭނެ ކަމަށެވެ.

އެ މަސައްކަތް ފެށުމުގެ ގޮތުން ރާއްޖޭގެ ދެ ޔުނިވާސިޓީ ކަމަށްވާ ގައުމީ ޔުނިވާސިޓީ (އެމްއެންޔޫ) އާއި އިސްލާމިކް ޔުނިވާސިޓީ (އައިޔޫއެމް) މިހާރު އެ ނެޓްވޯކާ ގުޅާލާފައިވާ ކަމަށް ވެސް މިނިސްޓްރީން ބުންޏެވެ.

ރާއްޖޭގެ މަތީ ތައުލީމާއި ރިސާޗުގެ މަސައްކަތް ކުރާ އެހެން އިންސިޓިޓިއުޓްތައް އެ ނެޓްވޯކާ ގުޅާލުމުގެ މަސައްކަތް ހަޔަ އެޑިކޭޝަން މިނިސްޓްރީ އާއި އެންސީއައިޓީ އަދި ޓެކްނޮލޮޖީ މިނިސްޓްރީ ގުޅިގެން ފަށާފައިވާ ކަމަށް އެ ބަޔާނުގައިވެ އެވެ.

އިންޑިއާގެ ނޭޝަނަލް ނޮލެޖް ނެޓްވޯކަކީ 2010 ވަނަ އަހަރު އިންޑިއާ ސަރުކާރުން ގާއިމްކުރި ނެޓްވޯކެކެވެ. އެ ނެޓްވޯކަކީ ރިސާޗް އަދި އިންޓަނެޓްގެ ހިދުމަތް އެއް ޕްލެޓްފޯމްއަކުން ފޯރުކޮށްދިނުމަށް އިންޑިއާގެ ހުރިހާ ނޮލެޖް އަދި ރިސާޗް އިންސްޓިއުޓްތަކެއް ގުޅާލުމަށް ގާއިމްކުރި، ރޯބަސްޓް ހައި ސްޕީޑް ނެޓްވޯކެކެވެ.

ދެ ނެޓްވޯކް ގުޅާލުމުން ލިބޭ ހިދުމަތްތައް

- އިންޓަނެޓްގެ ހިދުމަތް ދޭ ފަރާތެއްގެ ކަނެކްޝަން މެދުވެރިނުކޮށް، ރާއްޖޭގެ މަތީތައުލީމުގެ ނެޓްވޯކްގެ ތެރެއިން، އިންޑިއާގެ ނޮލެޖް ނެޓްވޯކްގައި ޝާއިއުކޮށްފައިވާ މައުލޫމާތުތަކާއި ޑިޖިޓަލް ހިދުމަތްތަކަށް ސީދާ އެކްސެސް ވެވޭނެ.

- ޑިޖިޓަލް ލައިބްރަރީ ކޮންސޯޓިއަމްގެ ހިދުމަތާއި ހަޔަ އެޑިއުކޭޝަން އިންފޮމޭޝަން ސަވިސަސްގެ ހިދުމަތް ލިބި، އޮންލައިން ލަނިން އަށް ފުރުސަތު ފަހިވާނެ.

ޓެކްނޮލޮޖީ މިނިސްޓްރީން ބުނި ގޮތުގައި، އިންޑިއާގެ ނޭޝަނަލް ނޮލެޖް ނެޓްވޯކާ 11 ނޭޝަނަލް ރިސާޗް އެންޑް ހަޔަ އެޑިއުކޭޝަން ނެޓްވޯކްތައް މިހާރު ވެސް ގުޅާލައިފަ އެވެ. އޭގެ ތެރޭގައި އެމެރިކާއި އާއި ޔޫރަޕާއި އަދި އޭޝިއާގެ ގައުމުތަކުގެ މަޝްހޫރު މަތީ ތައުލީމުގެ ނެޓްވޯކްތައް ހިމެނެ އެވެ.

އެ މިނިސްޓްރީން ބުނީ ސާކް ގައުމުތަކަކީ ގުޅާލެވިފައިވާ އަދި ފުދުންތެރި ގައުމުތަކަށް ހެދުމުގެ ވިސްނުމުގައި އިންޑިއާގެ ނޭޝަނަލް ނޮލެޖް ނެޓްވޯކާ މި ސަރަހައްދުގެ އެހެން ގައުމުތައް ގުޅާލުމުގެ ވާހަކަ 2014 ވަނަ އަހަރު ބޭއްވި 18 ވަނަ ސާކް ސަމިޓްގައި އިންޑީއާގެ ބޮޑުވަޒީރު ނަރެންދުރަ މޯދީ ގައުމުތަކުގެ ލީޑަރުންނާއި ހިއްސާކުރައްވާފައިވާ ކަމަށެވެ. ރާއްޖޭގައި ވެސް އެ ނެޓްވޯކް ގާއިމްކުރަނީ ސާކް އިނިޝިއޭޓިވްގެ ދަށުންނެވެ.