ރާއްޖޭގެ ހަ ސްކޫލެއްގެ 16 ކުދިން އިއާދަކުރަނިވި ހަކަތައިގެ ތަޖުރިބާ ދަތުރެއްގައި އިންޑިއާ އަށް

ވޯލްޑް ބޭންކުގެ އެހީގައި ތިމާވެއްޓާ ބެހޭ މިނިސްޓްރީން ހިންގާ އެސްޕަޔާ ޕްރޮޖެކްޓުގެ ދަށުން ރާއްޖޭގެ ހަ ސްކޫލެއްގެ 16 ކުދިން އިޔާދަކުރަނިވި ހަކަތައިގެ ތަޖުރިބާ ދަތުރެއްގައި އިންޑިއާ އަށް އިއްޔެ ފުރައިފި އެވެ.

ނިއު ދިއްލީ އަށް ކުރާ އެ ދަތުރުގައި ބައިވެރިވަނީ ހދ. ކުޅުދުއްފުށްޓާއި ބ. އޭދަފުށްޓާއި ޅ. ހިންނަވަރާއި ގދ. ތިނަދު އާއި އައްޑޫ އަދި ފުވައްމުލަކުގައި މަތީ ސާނަވީއަށް ކިޔަވާ ކުދިންނެވެ. އެއީ އެސްޕަޔާ ޕްރޮޖެކްޓުގެ ތިންވަނަ ފިޔަވަހީގެ ދަށުން މަސައްކަތްކުރާ ރަށްތަކުން ހޮވި ކުދިންނެވެ.

ތިމާވެއްޓާ ބެހޭ މިނިސްޓްރީން ނެރުނު ނޫސްބަޔާނެއްގައި ބުނީ ހަކަތައިގެ ދާއިރާ އަށް ކުދިން ޝައުގުވެރި ކުރުވައި، އެ ދާއިރާގެ ފުރުސަތުތަކާ ގުޅިގެން ކުދިން ހޭލުންތެރިކުރުމަކީ އެސްޕަޔާ ޕްރޮޖެކްޓުގެ ވަރަށް ބޮޑު އަމާޒެއް ކަމަށެވެ. ހާއްސަކޮށް އަންހެނުން އެ ދާއިރާގައި މަސައްކަތްކުރުމަށް ބާރުވެރިކުރުވުމަކީ ވެސް އަމާޒެއް ކަމަށް އެ ބަޔާނުގައި ބުންޏެވެ.

"އެގޮތުން 16 ދަރިވަރުންގެ ތެރެއިން 10 ދަރިވަރުންނަކީ އަންހެން ދަރިވަރުން ކަމުގައި ފާހަގަކޮށްލެވެ އެވެ،" މިނިސްޓްރީން ބުންޏެވެ.

މި ދަތުރު ރާވާފައި ވަނީ އެޑިއުކޭޝަން މިނިސްޓްރީ އާއި އިންޑިއާގެ ޓާޓާ ޕަވާ ޑީޑީއެލްއާ ގުޅިގެން ކަމަށް މިނިސްޓްރީން ބުންޏެވެ.

މިނިސްޓްރީން ބުނި ގޮތުގައި، އެ ދަތުރުގައި ހަކަތައިގެ ދާއިރާއާ ގުޅޭ އިންޓްރޮޑަކްޓަރީ ކްލާސްރޫމް ސެޝަންތަކާއި ޓާޓާ ޕަވާގެ އެކި ކަހަލަ ފަންނީ ފެސިލިޓީސްތަކަށް ކުދިން ގޮސް އެ ތަންތަނުގައި މަސައްކަތްކުރާ ގޮތް ދައްކާލުން އޮންނާނެ އެވެ. ހަކަތައިގެ ދާއިރާއާ ގުޅޭ 13 މާއްދާއެއް އެ ދަތުރުގައި ދަރިވަރުން ކިޔަވާނެ އެވެ.

ސްމާޓް ގްރިޑް ލެބް، ސްކާޑާ ކޮންޓްރޯލް ސެންޓަރު، ޓްރާންސްފޯމަރު ވޯކްޝޮޕް އަދި އިޔާދަކުރަނިވި ހަކަތައިގެ އެހެން ބައެއް ސައިޓުތަކާއި އިލެކްޓްރިކް ވެހިކަލް ޗާޖިން ސައިޓުތައް ކަހަލަ ތަންތަނަށް ދިއުމަށް ރާވާފައިވާ ކަމަށް މިނިސްޓްރީން ބުންޏެވެ.

މިނިސްޓްރީން ބުނީ، ނޮއިޑާގައި ހުންނަ ޝިވް ނާދަރް ޔުނިވާސިޓީ އޮފް އެމިނެންސްގެ ދައުވަތަކަށް ދެ ދުވަހަށް ދަރިވަރުން އެ ޔުނިވާސިޓީގެ ކެމްޕަސަށް ޒިޔާރަތްކޮށް، އެ ޔުނިވާސިޓީގެ ޕްރޮގްރާމްތަކާއި ފެސިލިޓީސްތައް ބެލުމަށް ވެސް ހަމަޖެހިފައިވާ ކަމަށެވެ. ނިއު ދިއްލީގެ ބައެއް ތަންތަން ބަލާލުމާއި އާގްރާގެ ތާޖު މަހަލްއަށް ދަރިވަރުން ދިޔުމަށް ވެސް ހަމަޖެހިފައިވާ ކަމަށް ބުންޏެވެ.