ނިއުގެ ދަރަންޏަށް ޒިންމާވާނަމަ ރޭޑިއަންޓަށް ކުރިއަށްދެވޭނެކަމަށް އޭއެފްސީން އެންގި: އެފްއޭއެމް

ފުޓްބޯޅައިގެ ހަރާކަތްތަކުން ސަސްޕެންޑްކޮށްފައިވާ ނިއު ރޭޑިއަންޓް ސްޕޯޓްސް ކްލަބް ރަމްޒުކޮށްދޭނެ ހުރިހާ ސިފައެއް، އަލަށް އުފައްދާފައިވާ ރޭޑިއަންޓް ކްލަބްގައި ހުރިކަމަށް އޭއެފްސީން ގަބޫލުކުރާ ކަމަށާއި ނިއުގެ ދަރަންޏަށް ޒިންމާވެ ދަރަނި އަދާކޮށްފިނަމަ ރޭޑިއަންޓަށް ކުރިއަށް ދެވޭނެ ކަމަށް އޭއެފްސީން އެންގާފައިވާ ކަމަށް އެފްއޭއެމުން މިއަދު ބުނެފި އެވެ.

އެފްއޭއެމުން މިއަދު ބޭއްވި ޕްރެސްކޮންފަރެންސްގައި ޖެނަރަލް ސެކެރެޓަރީ ހުސައިން ޖަވާޒު ވިދާޅުވީ، ނިއު އާއި އެއްގޮތްކަންތައްތަކެއް ހުރި ރޭޑިއަންޓް ކިޔާ ކްލަބެއް ހަރާކާތްތެރިވަމުންދާ ކަމަށް އެފްއޭއެމްުގެ ސަމާލުކަމަށް އިސްވެ އެންމެ ފުރަތަމަ ގެނައީ ވެސް އޭއެފްސީން ކަމަށެވެ.

"ކޮޮންމެވެސް ވަރަކަށް ސުވާލު އުފެދިދާނެ މިކަން ކިހިނެއްތޯ އޭއެފްސީ އަށް ފްލޭގް ވެގެން [ސަމާލުކަން އައިސްގެން] މިއުޅެނީ. އެކަމަކު މިހާރަކަށް އައިސް އޭއެފްސީން މަސައްކަތް ކުރަމުން އަންނަ ގޮތަށް ވަރަށް ބޮޑަށް ބަދަލު އައިސްފި،" ޖަވާޒު ވިދާޅުވި އެވެ.

"ސްޕޯޓްސް ރާޑާ ކިޔާ ބަޔަކާއެކީ (އޭއެފްސީން) އެބައޮވޭ މުއާހަދާތަކެއް ހެދިފައި. ޑޮކިޔުމެންޓޭޝަން އެއްކޮޅުން އަނެއްކޮލަށް ބަދަލު ނުކުރިކަމުގައި ވިޔަސް މަސައްކަތްތަކެއް އެބަކުރެވޭ، ނިއު ރޭޑިއަންޓްގެ ދަރަނީގެ މައްސަލަތަކެއް އެބައުޅޭ ފީފާގައި ވެސް.

"އަޅުގަނޑުމެންނަކަށް އެހާބޮޮޑު ހައިރާކަން ކަމެއް ނުލިބޭ އޭއެފްސީ އަށް މިކަން ފްލޭގްވުމުގައި. [ސަމާލުކަން އައުމުގައި] އެއީ އެބޭފުޅުންގެ ޑޕާޓްމެންޓްތަކެއް ވެސް އެބަހުރޭ މިކަންކަމަށް ހާއްސަވެގެން. އަނެއްކާ ރޭޑިއަންޓް ސްޕޯޓްސް ކްލަބުން ދިޔައީ ވެސް އެބޭފުޅުންގެ ފޭސްބުކް ޕޭޖުގައި ޕޯސްޓް ކުރަމުން."

އެފްއޭއެމްގެ އެއްވެސް ހައިސިއްޔަތެއް ރޭޑިއަންޓް ކްލަބަށް ނުދިނުމަށް އިއްޔެ ނިންމުމުން އެކަމާ ގުޅިގެން ދެކެވެމުންދާ ވާހަކަތަކާ ގުޅިގެން މިއަދު ބޭއްވި ޕްރެސްކޮންފަރެންސްގައި އެފްއޭއެމްގެ ޑެޕިޔުޓީ ޖެނަރަލް ސެކެރެޓަރީ އަބްދުﷲ ސީބާއު (ޝިބާ) ވިދާޅުވީ ރޭޑިއަންޓަށް ކުރިއަށް ދެވޭނެ ގޮތެއްއޮތްތޯ ބެލުމަށް އޭއެފްސީ އާއެކު ކުރި މަޝްވަރާތަކުގައި، ރޭޑިއަންޓަކީ ނިއު ރޭޑިއަންޓް ރަމްޒުކުރާނެ ކްލަބެއް ކަމަށް އޭއެފްސީން ގަބޫލުކުރާކަން ހާމަކޮށް ސިޓީ ފޮނުވާފައިވާ ކަމަށެވެ.

ނިއު ރޭޑިއަންޓްގައި ކުރިން މަސައްކަތް ކޮށްފައި ތިބި މީހުން ރޭޑިއަންޓްގެ އެންމެހާ މަގާމުތަކުން އިސްތިއުފާ ދީ އެހެން ބަޔަކު އެކްލަބްގެ މަގާމުތަކަށް އައްޔަން ކުރި ކަމުގައި ވިއަސް އެކްލަބަކީ ނިއު ރޭޑިއަންޓް ރަމްޒުކުރާ ކްލަބް ނޫންކަމަށް ނުވާނެ ކަމަށް އޭއެފްސީން އަންގާފައިވާ ކަމަށް ޝިބާ ވިދާޅުވި އެވެ.

"އެކްލަބްގެ ރައީސް އާއި ހަޒާންދާރު އަދި އެހެން މެންބަރުން އިސްތިއުފާ ދީ އެކްލަބްގެ މެންބަރުން ބަދަލުވުމުން އެކްލަބަކީ ނިއު ރޭޑިއަންޓް ތަމްސީލު ކުރަން އަންނަ ކްލަބެއްކަން ޝައްކު ކުރާނެ ޖާގަ އޮތް ކަމަށް އޭއެފްސީން ގަބޫލު ކުރެޔޭ،" އޭއެފްސީން ސިޓީގައިވާ އިބާރާތްތައްކަމަށް ބުނެ އިނގިރޭސި ބަހުން ޝިބާ ވިދާޅުވި އެވެ.

"ކުރިގެ ކްލަބްގެ ދަރަންޏަށް ގާނޫނީ ގޮތުން ޒިންމާވާނަމަ އާ ކްލަބަށް އެފްއޭއެމްގެ މެންބަރުކަން ދިނުމާމެދު އޭއެފްސީގެ އެއްވެސް އިއުތިރާޒެއް ނެތްކަމަށް ވެސް ވަނީ އަންގާފައި."

ރޭޑިއަންޓް ކްލަބްގެ ފައުންޑާ އަހްމަދު ވާސިފް އާއި ބޯޑު މެންބަރު ޒަހީނުއްދީން ސައިދަކީ ނިއު ރޭޑިއަންޓްގައި އެންމެ ފަހުން އޮތް ހިންގާ ކޮމިޓީގައި މަސައްކަތް ކުރެއްވި ބޭފުޅުންނެވެ.

އެފްއޭއެމްގެ ލީގަލް ހެޑް މުހައްމަދު ޖައުޝަން ޝަރީފް ވިދާޅުވިގޮތުގައި "ސްޕޯޓިން ސަކްސެސާ" އެއްކަމަށް ބަލަނީ އެކި ސަބަބުތަކާ ހުރެ ސަސްޕެންޑްކޮށްފައިވާ ނުވަތަ ހުއްދަ ބާތިލު ކޮށްފައިވާ ކްލަބަކާ ގުޅުންހުރި ކަންތައްތަކެއް އެހެން ކްލަބެއްގައި ހިމެނައިގެން ކުރއަށްދާނަމަ އެވެ.

"އެގޮތުން ބަލާއިރު ރޭޑިއަންޓް ސްޕޯޓްސް ކްލަބްގެ ނަމާއި، އިސްވެ ބަޔާންކުރެވުނު ނިއު ރޭޑިއަންޓް ސްޕޯޓްސް ކްލަބްގެ ނަމާ ވައްތަރު ގޮތްކެއް އެބަހުރި ފެންނަފެނުމަށް. އަޅުގަނޑު ފާހަގަ ނުކުރިޔަސް ތިބޭފުޅުންނަށް ވެސް ފާހަގަ ވާނެ ކަންނޭނގެ،" ޖައުޝަން ވިދާޅުވި އެވެ.

"ދެޓީމުގެ ކުލަ އަށް ބަލާއިރު ފެންނަފެނުމަށް ވަރަށް އެއްގޮތް. ލޯގޯ އަށް ބަލާއިރު ކުޑަ ތަފާތެއް އެބަހުރި ކަންނޭނގެ. އެކަމަކު ބޮޑަށް ވައްތަރީ އެއްގޮތް ކަންތައްތަކާ."

ވާސިފް އާއި ޒަހީނަކީ ނިއު ރޭޑިއަންޓްގައި އެންމެ ފަހުން އޮތް ބޯޑުގައި ހިމެނި ވަޑައިގެންނެވި ދެބޭފުޅުން ކަމަށް ވުމުން އެކަމަކީ ވެސް ނިއު ރޭޑިއަންޓް ރަމްޒުކުރާނެ ސިފަތަކެއް ހިމެނޭ ކަމެއްގެގޮތުގައި ފީފާ އާއި އޭއެފްސީގެ ގަވާއިދުގައި ބުނެފައިވާކަން ޖައުޝަން ފާހަގަ ކުރެއްވި އެވެ.

"ކުލައިގެ ކަންތައްތަކެއް އެބަހުރި ގާނޫނީ ގޮތުން އެއްގޮތްކަންތައްތަކެއް އެބަހުރި އޯނާޝިޕްގައި އެއްގޮތްކަންތައްތަކެއް އެބަހުރި ހިއްސާދާރުންނާ ނުވަތަ އެގްޒެކެޓިވް ކޮމިޓީގައި ތިއްބެވި މެންބަރުންގެތެރޭގައި ގުޅުން ހުރި ބޭފުޅުން އެބަތިއްބެވި. އަދި ކެޓަގަރީ އޮފް ކޮމްޕްޓީޝަން އަށް ބެލިޔަސް އެއްގޮތް ކަންތައްތަކެއް އެބަހުރި،" ޖައުޝަން ވިދާޅުވި އެވެ.

"އެހެންވެ މިހުރިހާ ކަމަކަށް ބަލާއިރު އޭއެފްސީ އަށް މިފާހަގަ ކުރެވެނީ ރޭޑިއަންޓް ސްޕޯޓްސް ކްލަބަކީ ނިއު ރޭޑިއަންޓް ސްޕޯޓްސް ކްލަބް ސްޕޯޓިން ސަކްސެސާ އަކަށް ވުމުގެ ފުރުސަތު އެއްގޮތަށް ވުރެ ގިނަ ގޮތްގޮތުން ފާހަގަ ކުރެވެން އެބައޮތް ކަމަށް. އެހެންވީމަ މިކަންމިގޮތަށް މިހެން އޮތްއިރު އެފްއޭއެމްގެ މެންބަރުކަން ދިނުމުގައި މިވަގުތަށް ރޭޑިއަންޓް ކްލަބަށް މެންބަރުކަން ދެވެން ނޯންނާނެ ކަމަށް އޭއެފްސީން މިފާހަގަކޮށްފައި ވަނީ."

ޖަވާޒު ވިދާޅުވީ ރޭޑިއަންޓް އިންތިހާބަކަށް ދިއުމުގެ ކުރިން ވެސް އޭއެފްސީން ފާހަގަކޮށްފައިވާ ކަންކަން، އެކްލަބްގެ ފައުންޑަރުންނަށް ހިއްސާ ކުރެއްވި ކަމަށެވެ. އަދި އެކްލަބުން އެދިފައިވާ ގޮތަށް އެފްއޭއެމްގެ މެންބަރުކަން ދިނުމާމެދު ގޮތެއް ނިންމުމުގެ ކަންތައްތައް މިވަގުތަށް މަޑުޖައްސާލީ އޭއެފްސީން ފާހަގަކޮށްފައިވާ ކަންތައްތަކަށް ހައްލުތަކެއް ލިބެންދެން ކަމަށް ޖަވާޒު ވިދާޅުވި އެވެ.